Genesisi 34

₁Ngalelinye lilanga, Dina, indvodzakati yaJakobe layitala kuLeya, wavakashela lamanye emantfombatana akuleyo ndzawo labengemaKhenani. ₂Shekhemu, umsa waHamori umHivi, labesikhulu saleyo ndzawo, watsi nakambona, wamtsatsa wayakumdlwengula, wamhlazisa. ₃Inhlitiyo yakhe yanamatsela kuDina, wayitsandza lentfombatana, ngako wayisoma. ₄Shekhemu wakhuluma kuyise, Hamori, watsi: “Ngicela ungitsatsele lentfombi, ngifuna kuyiteka ibe ngumkami.”

₅Jakobe weva kutsi Shekhemu ungcolise indvodzakati yakhe; kodvwa akazange akhulume lutfo, kwaze kwabuya emadvodzana akhe labengekho asekweluseni. ₆Hamori, uyise waShekhemu, wahamba wayawukhuluma naJakobe. ₇Atsi emadvodzana aJakobe nakefika eva ngaloku, eva buhlungu atfukutsela agcwala kokana, ngobe Shekhemu abente sento lesibi lesiphambene nesive saka-Israyeli ngekudlwengula lendvodzakati yaJakobe. Leyo kwakuyintfo lengentiwa nje vele ka-Israyeli. ₈Hamori wefika kuJakobe watsi: “Shekhemu, indvodzana yami, utsandze intfombi yakakho. Ngiyakucela kutsi umane umnike yona ayiteke ibe ngumkakhe. ₉Yendziselanani natsi: nisendzisele tintfombi tenu nani nititsatsele bafati etintfombini tetfu. ₁₀Ningakha kulelive letfu nihlale kanye natsi, ningahlala nome ngukuphi lapho nitsandza khona, ningasebenta ngekukhululeka nome kukuphi, nome nitisikele yenu indzawo.”

₁₁Shekhemu wakhuluma kuyise waDina kanye nebanakabo watsi: “Ngicela nimane ningihawukele, ngitaninika nome ngabe yini leniyifunako. ₁₂Ningabita lapho nitsandza khona ngelilobolo kanye nesipho, ngitakukhipha, kuphela nje naningivumele kutsi ngiteke lentfombi.”

₁₃Njengobe Shekhemu abesangcolise Dina, dzadzewabo lamadvodzana aJakobe, wona aphendvula boShekhemu neyise Hamori ngebucili, ₁₄atsi: “Ngeke sesikwente-ke loko! Dzadzewetfu singeke simnike indvodza lengakasoki, ngobe phela loko kulihlazo lapha kitsi. ₁₅Singavuma kuphela, nangabe nani ningalingisa tsine, nisoke bonkhe labadvuna benu. ₁₆Nase nente njalo-ke, singendziselana nani, sihlale emkhatsini wenu, sibe sive sinye nani. ₁₇Kodvwa nangabe asivumelani kuloko, sitamtsatsa lodzadzewetfu sihambe naye, sisuke kulendzawo.”

₁₈Lesiphakamiso semukeleka kuboHamori nemsa wakhe Shekhemu. ₁₉Lelijaha lelibaluleke kakhulu ekhaya kubo alicitsanga sikhatsi, lavele lasokwa ngekushesha, ngobe beliyitsandza kakhulu lendvodzakati yaJakobe.

₂₀Ngako-ke Hamoni nemsa wakhe Shekhemu bancandzeka baya enkhundleni yakubo esangweni lelidolobha, bafike bamemetela kutakhamiti tabo batsi: ₂₁“Labantfu balungile, asibavumele kutsi bakhe bahlale ngekukhululeka kulelive letfu. Lelive lingasenela tsine nabo. Singawateka emadvodzakati abo, nabo bateke emadvodzakati etfu. ₂₂Kodvwa lamadvodza ayavuma kutsi angahlala natsi sibe sive sinye nabo kuphela nasingenta naku: kutsi sisoke bonkhe labadvuna betfu sibe njengawo. ₂₃Kepha nitsi tifuyo tawo kanye nako konkhe kwawo kungeke yini kube kwetfu? Ngako-ke asivume, kuze atekwakha emkhatsini wetfu.” ₂₄Tonkhe takhamiti telidolobha tasemukela siphakamiso saHamori naShekhemu. Ngako-ke bonkhe labadvuna basokwa.

₂₅Kwatsi ngelilanga lesitsatfu basokile, basesebuhlungwini, emadvodzana lamabili aJakobe, lekwakubomnakaboDina, boSimeyoni naLevi, batsatsa tinkemba tabo. Banyenya, bangenela lelidolobha, bafike babulala bonkhe labadvuna. ₂₆Bahlahlela Hamori naShekhemu, indvodzana yakhe, ngenkemba. Batsatsa Dina, dzadzewabo, endlini kaShekhemu bahamba naye. ₂₇Emvakwekubulawa kwalabantfu, lamanye emadvodzana aJakobe eta kulelidolobha afike akhipha sibhongo sekungcoliswa kwadzadzewabo baze baphanga lelidolobha. ₂₈Batsatsa imihlambi yetimvu, netimbuti, netinkhomo, netimbongolo, nako konkhe lokwakungekhatsi nangaphandle kwelidolobha, nasemaphandleni. ₂₉Bahamba nato tonkhe timphahla, batfumba bonkhe labasikati nebantfwana, batsatsa konkhe lokwakusetindlini.

₃₀Jakobe wakhuluma kuboSimeyoni naLevi watsi: “Manje seningiletsele luhlupho, seningibangele kutsi ngitondzeke lapha kulabantfu bakulendzawo, kumaKhenani nakumaPheresi. Mine nginemadvodza lambalwa, ngako nabangahlangana bangihlasele bonkhe kanyekanye, bangangibhubhisa kanye nemndeni wami.”

₃₁Kodvwa bamphendvula batsi: “Besingeke sivume kutsi dzadzewetfu entiwe ingwadla.”