Genesisi 32

₁Jakobe wachubeka nendlela yakhe, tingilosi taNkulunkulu tamhlangabeta. ₂Jakobe watsi kube atibone letingilosi watsi: “Lesi sikanekiso saNkulunkulu!” Wetsa leyo ndzawo libito watsi yiMahanayimu.

₃Jakobe watfumela tigijimi ku-Esawu umnakabo, eveni laseSeyiri, kulaka-Edomu. ₄Watibamba ngendlebe watsi: “Nitawufika enkhosini yami, Esawu, niyitjele nitsi: ‘Inceku yakho, Jakobe, itsi: Seloku ngahamba bengisolo ngihleti kaLabani, kuze kube ngulamuhla. ₅Nginetinkhabi, netimbongolo, netimvu, netimbuti netisebenti letidvuna naletisikati. Sengitfumele ligama enkhosini yami kutsi kumbe ngingatfola umusa ngemukeleke.’ ” ₆Titfunywa tabuya kuJakobe, tafike tatsi: “Simkhandzile umnakenu Esawu; naye sewuyeta utekuhlangabeta, uta nemadvodza langemakhulu lamane.” ₇Jakobe wesaba kakhulu waba neluvalo. Wehlukanisa labantfu abehamba nabo, wabenta emacembu lamabili, kanjalo nemihlambi yetimvu, neyetimbuti, neyetinkhomo kanye neyemakamela nako wakwenta njalo. ₈Loku abekwenta acabanga atsi: “Nangabe Esawu efika ahlasela lelinye licembu, leli lelinye-ke lelisasele lisengabaleka.”

₉Jakobe wase uyathandaza watsi: “Nkulunkulu wababemkhulu Abrahama, naNkulunkulu wababe wami Isaka! Simakadze, wena wakhuluma kimi watsi: ‘Ncandzeka ubuyele eveni lakini, nasetihlotjeni takho, mine ngitakwentela lokuhle.’ ₁₀Umusa wakho awukangifaneli nako konkhe kwetsembeka kwakho lokubonakalise kimi, inceku yakho, akukangifaneli. Ngobe lomfula iJordane ngawewela ngiphetse ludvondvolo lwami lodvwa, manje senginemacembu lamabili. ₁₁Ngicela kutsi umane ungephule esandleni semnaketfu Esawu, ngobe ngiyamesaba, kutsi angahle angihlasele abulale bantfwana kanye nabonina. ₁₂Kodvwa wena wakhuluma kimi watsi: ‘Ngiyawukwentela lokuhle, ngandzise nentalo yakho ibe ngangesihlabatsi sangaselwandle, ingete yabaleka ngenca yebunyenti.’ ”

₁₃Jakobe wacitsa busuku bonkhe kuleyo ndzawo, wakhetsela Esawu, umnakabo, sipho etifuyweni takhe, wakhetsa ₁₄timbutikati letingemakhulu lamabili, netiphongo letingemashumi lamabili, netimvukati letingemakhulu lamabili, netihhanca letingemashumi lamabili, ₁₅nemakamela lasengwako langemashumi lamatsatfu kanye nemankhonyane awo, netinkhomati letingemashumi lamane, netinkunzi letilishumi, netimbongolo letinsikati letingemashumi lamabili, naletindvuna letilishumi. ₁₆Tonkhe letifuyo watehlukanisa emkhatsini, taba ngimihlambi leyehlukene, ngulowo nalowo umhlambi wabasesandleni senceku yakhe letsite. Watiyala letinceku takhe watsi: “Hambani ngembili kwami, nishiyelane imikhawu yemabanga latsite, emikhatsini yemihlambi yenu.” ₁₇Inceku yekucala wayiyala watsi: “Nawuhlangana na-Esawu, umnaketfu, akubuta atsi: ‘Wena uwakabani? Uyaphi? Ngetabani letifuyo lotichubako?’ ₁₈ubotsi: ‘Tenceku yakho Jakobe. Utitfumele njengesipho enkhosini yakhe Esawu. Naye, Jakobe, usilandzela ngemuva.’ ” ₁₉Wachubeka wayiyala kanjalo futsi neyesibili, neyesitsatfu, nato tonkhe letinceku lebetichuba lemihlambi atsi: “Ngiko loko-ke leniyakukhuluma ku-Esawu, nanihlangana naye. ₂₀Nibotsi: ‘Yebo, Jakobe inceku yakho, ita ngemuva, iyangilandzela.’ ” Jakobe abecabanga atsi uyatincengela ngaletipho ngekutitfumela kucala, khona kutawutsi nakahlangana naye, abe asamcolele. ₂₁Ngako-ke letipho takhe tahamba embili, yena Jakobe wasala ngemuva esikanekisweni, wabucitsa khona busuku.

₂₂Ngabona lobo busuku Jakobe wavuka watsatsa bafati bakhe bobabili, netincekukati takhe letimbili, nebantfwabakhe labalishumi namunye, wabeweta etubukweni lemfula iJabhoki. ₂₃Bonkhe wabewetela ngesheya kwemfula nako konkhe labenako, ₂₄ kodvwa yena wasala ngemuva.

Kwase kufika indvodza labambana nayo, kwadzimate kwadzabuka kusa. ₂₅Yatsi kube ibone lendvodza kutsi iyehluleka kuphunyula kuJakobe, yase imtsintsa enyongeni. Inyonga yaJakobe yenyela solomane tibambene etulu nalendvodza. ₂₆Lendvodza yatsi: “Ngiyekele ngihambe, ngobe sekuyasa.”

Jakobe watsi: “Ngingeke ngikuyekele uhambe ungakangibusisi.”

₂₇Yabuta yatsi: “Ngubani libito lakho?”

Waphendvula watsi: “NginguJakobe.”

₂₈Lendvodza yatsi: “Libito lakho lingeke lisaba nguJakobe, kodvwa sewutawuba ngu-Israyeli, ngobe ubambene naNkulunkulu nebantfu, wajinge wancoba.”

₂₉Jakobe wabuta watsi: “Wena-ke ungubani libito lakho?”

Yaphendvula yatsi: “Ufunelani kwati libito lami?” Yase iyambusisa.

₃₀Jakobe lendzawo wayetsa libito watsi: “yiPheniyeli,” lokusho kutsi: “Ngibonene naNkulunkulu buso nebuso, noko umphefumulo wami waphephiswa.” ₃₁Jakobe wesuka ePheniyeli nakuphuma lilanga, asahamba achuta ngenca yenyonga yakhe. ₃₂Ngako-ke kuze kube ngulamuhla titukulwane taka-Israyeli atiwudli umsipha wenyonga, ngobe ngiwo lowo msipha lowatsintfwa kuJakobe.