Genesisi 28

₁Isaka wabita Jakobe, wambusisa wamyala watsi: “Ungamtsatsi umfati kulamaKhenani. ₂Hamba uye eMesophothamiya ekhabonyoko, kaBethuweli, utitsatsele khona umfati emadvodzakatini aLabani, malume wakho. ₃Shangatsi Nkulunkulu Somandla angakubusisa akuchumise, akwandzise, udzimate ube tive letinyenti. ₄Shangatsi angakunika sibusiso sa-Abrahama, wena kanye netitukulwane takho, uze ulitsatse libe lakho lelive losihambi kulo kwamanje, Nkulunkulu lalinika Abrahama!” ₅Ngako-ke Isaka wahambisa Jakobe wamyisa eMesophothamiya kaLabani umsa waBethuweli, um-Aramu, umnakaboRebheka, unaboJakobe na-Esawu.

₆Esawu weva kutsi Isaka abesabusise Jakobe, wabuye wamhambisa watsi akaye eMesophothamiya, kutsi ayewutsatsa khona umfati. Esawu weva nekutsi Isaka abesayale Jakobe watsi: “Ungamtsatsi umfati kulamaKhenani.” ₇Weva nekutsi Jakobe abebahloniphile boyise nenina ngekutsi ahambe aye eMesophothamiya. ₈Esawu watsi kube abone kutsi emadvodzakati emaKhenani abengamjabulisi uyise, ₉wesuka wayawutsatsa Mahalathi wamenta umkakhe etikwalabafati labenabo. Mahalathi abengudzadzewaboNebayothi, indvodzakati ya-Ishmayeli, umsa wa-Abrahama.

₁₀Jakobe wesuka eBherisheba waya eHarani. ₁₁Wefika endzaweni lengcwele wahlala khona busuku, ngobe lilanga lase lishonile. Watsatsa lelinye lematje akuleyo ndzawo wacamela etikwalo, walala. ₁₂Wabhudza abona liladi limiswe emhlabatsini, laze lefika ezulwini, wabona tingilosi taNkulunkulu tehla tenyuka ngalo. ₁₃Simakadze abeme etikwalo; wakhuluma naye watsi: “NginguSimakadze, Nkulunkulu weyihlo Abrahama, naNkulunkulu wa-Isaka. Lelive lolele kulo ngiyawulinika wena kanye netitukulwane takho. ₁₄Titukulwane takho tiyawuba ngangelutfuli lwemhlaba. Uyakwandza nemhlaba wonkhe wenabele enshonalanga, nasemphumalanga, nasenyakatfo, naseningizimu. Tonkhe tive temhlaba tiyawubusiswa ngawe nangetitukulwane takho. ₁₅Ukhumbule kutsi ngitawuba nawe ngikulondvolote nome uyaphi, ngikubuyise kulo lelive. Ngobe ngingeke ngikushiye ngingakakwenti loku lesengikwetsembise kona.”

₁₆Jakobe waphaphama ebutfongweni, watsi: “Kantsi Simakadze ukulendzawo, bengingakwati-ke loku.” ₁₇Wefikelwa kwesaba, watsi: “Maye, lendzawo iyesabeka! Ngempela lendzawo iyindlu yaNkulunkulu. Leli lisango lasezulwini.”

₁₈Ngako-ke Jakobe wavuka ekuseni kuseluvivi, walitsatsa lelitje abecamele kulo, walimisa laba luphawu lwesikhumbuto, watsela emafutsa etikwalo. ₁₉Lendzawo wayetsa libito watsi yiBetheli, kodvwa ekucaleni lelidolobha lalibitwa ngekutsi yiLuzi. ₂₀Jakobe wase wenta sifungo, watsi: “Nangabe Nkulunkulu atawuba nami angilondvolote kuloluhambo lwami, anginike kudla, netimphahla tekwembatsa, ngembatse, ₂₁ngidzimate ngibuyele ngekuthula ekhaya ketfu, khona-ke Simakadze uyawuba nguNkulunkulu wami. ₂₂Lelitje lengilimise la, kutsi libe sikhumbuto, litawuba yindlu yaNkulunkulu. Kuko konkhe langipha kona ngiyakumnika kwelishumi.”