Genesisi 24

₁Abrahama abesamdzala kakhulu ngeminyaka. Simakadze abembusisile etintfweni tonkhe. ₂Abrahama wakhuluma nenceku yakhe lenkhulu ekhaya lakhe, leyayiphetse konkhe labenako, watsi: “Beka sandla sakho ngaphansi kwelitsanga lami. ₃Ngitekufungisa Simakadze longuNkulunkulu welizulu nemhlaba, kutsi ungacali utsatsele indvodzana yami umfati emkhatsini wemadvodzakati emaKhenani, lengihleti emkhatsini wawo. ₄Kodvwa ubohamba ubuyele eveni lakitsi lemdzabu, nasetihlotjeni takitsi, ufike umtsatsele khona Isaka, umsa wami, umfati.”

₅Lenceku yatsi kuye: “Nangabe lentfombi ingavumi kungilandzela ite nami kulelive, ngibobe sengenta njani? Ngiboyitsatsa yini lendvodzana yakho ngincandzeke nayo ngiyibuyisele kulelo live lakini?”

₆Abrahama watsi kuyo: “Caphela ungacali uyibuyisele emuva lendvodzana yami. ₇Simakadze, Nkulunkulu welizulu, lowangitsatsa endlini yababe, naseveni lakitsi lemdzabu, wakhuluma kimi waphindze wangetsembisa ngesifungo watsi: ‘Lelive ngiyawulinika titukulwane takho,’ utawutfuma ingilosi kutsi ikuhambele embili. Wena-ke, lomsa wami uyawumtsatsela intfombi kuleyo ndzawo ute nayo la. ₈Kodvwa nangabe lentfombi ayifuni kukulandzela, utawube sewukhululekile kulesifungo. Intfo nje, ungayibuyiseli indvodzana yami kulelo live.” ₉Ngako-ke lenceku yabeka sandla sayo ngaphansi kwelitsanga la-Abrahama, inkhosi yayo, yafunga kuye ngalendzaba.

₁₀Lenceku yatsatsa emakamela lalishumi emkhatsini wemakamela enkhosi yayo, yahamba netinhlobonhlobo tetipho letiphuma enkhosini yayo. Yesuka yaya eMesophothamiya edolobheni lakaNahori. ₁₁Yefika entsambama yakanekisa ngaphandle kwelidolobha, yagucisa emakamela eceleni kwesicobho, ngesikhatsi labakha ngaso emanti labasikati. ₁₂Lenceku yathandaza yatsi: “Simakadze, Nkulunkulu wenkhosi yami, ngicela ungiphe imphumelelo lamuhla, ukhombise umusa wakho enkhosini yami Abrahama. ₁₃Naku manje sengime la eceleni kwalesicobho, lapho kukha khona emadvodzakati ebantfu bakulelidolobha. ₁₄Akutsi kuleyo ntfombi lengitawutsi kuyo: ‘Ngicela ubeke phansi imbita ngitewunatsa,’ yona-ke itsi: ‘Natsa, ngitawunatsisa wena kanye nemakamela akho,’ ngicela kutsi leyo kube ngiyo-ke loyimisele Isaka, inceku yakho. Ngiyawukwati ngaloko-ke kutsi ukhombise umusa enkhosini yami.”

₁₅Watsi asengakacedzi nje kuthandaza, kwase kuchamuka Rebheka labetalwa nguBethuweli, umsa waMilkha, umkaNahori, umnakabo-Abrahama. Rebheka weta etjetse imbita yemanti ehlombe lakhe. ₁₆Lentfombi yayiyinhle, ibukeka, iyintfombi, ingazange seyilale nemuntfu lomdvuna. Yewukela esicojeni, yakhelela, yagcwalisa imbita yayo ngemanti, yakhuphuka. ₁₇Lenceku yagijima yaya kuyo iyihlangabeta, yafike yatsi: “Ngicela sewumane unginatsise emantana nje la embiteni yakho.”

₁₈Yaphendvula yatsi: “Natsa, nkhosi yami.” Yaphangisa yetfula imbita, yanatsisa lenceku. ₁₉Yatsi kube icedze kuyinatsisa, yatsi: “Ngitawunatsisa nalamakamela akho, aze enele onkhe.” ₂₀Ngako-ke, yashesha yatfululela lamanti enkelebheni, yagijima yaya kukha lamanye esicojeni, yawanatsisa onkhe lamakamela enceku. ₂₁Lendvodza yayibukisisa lentfombi, ibindzile, ifundzisisa kahle nome Simakadze abeyiphumelelisa indlela yayo, nome cha.

₂₂Yatsi kube icedze lentfombi kunatsisa emakamela, lendvodza yatsatsa indandatho yegolide leyayinesisindvo sencenye yelishekheli yayifaka ekhaleni lalentfombi; yatsatsa emajiva egolide labenesisindvo semashekheli lalishumi yawegabisa lentfombi emikhonweni, ₂₃yatsi: “Ase ungitjele kutsi wena utalwa ngubani? Singayitfola yini indzawo lena ekhaya kini, simane siyewufihla inhloko lenemehlo?”

₂₄Lentfombi yaphendvula yatsi: “Mine ngiyindvodzakati yaBethuweli, umsa waMilkha naNahori.” ₂₅Yachubeka yatsi: “Sinetjani lobunyenti bemakamela kanye nendlu leyenele kutsi ningangenisa khona.”

₂₆Lendvodza yase iyakhotsama, yakhuleka kuSimakadze ₂₇yatsi: “Akabongwe Simakadze, Nkulunkulu wenkhosi yami Abrahama, longakayekeli kukhombisa umusa wakhe nekwetsembeka kwakhe enkhosini yami Abrahama. Mine-ke Simakadze ungihole endleleni, waze wangingenisa endlini yetihlobo tenkhosi yami.”

₂₈Lentfombi yagijima, yaya kubendlu yenina, yafike yabatjela ngako konkhe loko. ₂₉Rebheka abenemnakabo, anguLabani. Labani waphuma wagijima waya kuyo lendvodza, ngasesicojeni. ₃₀Watsi nakabona indandatho ekhaleni kanye nemabhengela emikhonweni yadzadzewabo, watsi nakeva emavi aRebheka, dzadzewabo, atsi: “Lendvodza ikhulume kimi,” waya kuyo. Wayikhandza ime eceleni kwemakamela madvutane nesicobho. ₃₁Wafike watsi: “Ngena, wena lobusiswe nguSimakadze, umeleni ngaphandle? Ngobe indzawo sengiyilungisile endlini, ngisho nendzawo yemakamela imbala.”

₃₂Ngako-ke lendvodza yeta, yangena endlini. Labani wakhumula lamakamela, wawafaka esibayeni wawanika kudla, adla. Wanika lendvodza emanti ekugeza tinyawo tayo, nalamadvodza abehamba nawo ageza tinyawo tawo. ₃₃Kwase kuletfwa kudla, kwabekwa embikwayo kutsi itekudla. Kodvwa yona yatsi: “Ngingeke ngidle, ngingakayikhulumi indzaba lengite ngayo.” Labani watsi: “Khuluma phela.”

₃₄Ngako-ke yatsi: “Mine ngiyinceku ya-Abrahama. ₃₅Simakadze uyibusise kakhulu inkhosi yami, injinge kakhulu. Simakadze uyibusise ngemihlambi yetimvu netinkhomo, isiliva negolide, tisebenti letidvuna naletisikati, emakamela kanye netimbongolo. ₃₆Sara, inkhosikati yenkhosi yami, watalela inkhosi yami indvodzana, asamdzala kakhulu. Inkhosi yami seyinike lendvodzana yayo konkhe lenako. ₃₇Inkhosi yami yangifungisa yatsi: ‘Ungayitsatseli indvodzana yami umfati kuletintfombi taseKhenani, kulelive lengihleti kulo. ₃₈Kodvwa ubohamba uye elusendvweni lwaketfu esiveni sakitsi, uyitsatsele khona indvodzana yami umfati.’ ₃₉Ngabuta enkhosini yami ngatsi: ‘Nangabe ayivumi kuta nami lentfombi, ngibobe sengenta njani?’

₄₀“Yangiphendvula yatsi: ‘Simakadze lengihamba embikwakhe utawutfumela ingilosi yakhe ihambe nawe, akuphumelelise endleleni yakho. Indvodzana yami uyawuyitsatsela umfati esiveni sakitsi, elusendvweni lwaketfu. ₄₁Nawuye esiveni sakitsi, uyawube sewuyakhululeka-ke kulesifungo sakho; nome befike bala kukunika lentfombi, uyawukhululeka-ke kulesifungo sakho.’

₄₂“Nangifika esicojeni lamuhla, ngitsite: ‘Simakadze, Nkulunkulu wenkhosi yami, Abrahama, nakuyintsandvo yakho, ngiphumelelise kuloluhambo lwami. ₄₃Njengobe ngime la, eceleni kwalesicobho semanti, akutsi intfombi letewukha emanti nangitsi kuyo: “Ngicela unginatsise emantana ngalembita yakho,” ₄₄yona itsi kimi: “Natsa wena, ngitawube senginatsisa nalamakamela akho,” kube ngiyo-ke intfombi Simakadze layimisele indvodzana yenkhosi yami.’ ₄₅Ngitsite ngisengakacedzi nje kuthandaza ngenhlitiyo, kwachamuka Rebheka etjetse imbita yemanti. Wewukela esicojeni wefike wakha emanti. Ngase ngitsi kuye: ‘Ngicela unginatsise.’ ₄₆Waphangisa wetfula imbita yakhe, watsi: ‘Natsa wena kucala, ngitawube senginatsisa nalamakamela akho futsi.’ Nganatsa-ke, wase unatsisa nemakamela ami futsi. ₄₇Ngase ngiyambuta ngitsi: ‘Wena uyindvodzakati yabani?’ Wangiphendvula watsi: ‘Ngiyindvodzakati yaBethuweli, umsa waMilkha naNahori.’ Ngako-ke ngase ngimfaka lendandatho ekhaleni lakhe ngamegabisa nalamajiva emikhonweni yakhe. ₄₈Ngase ngikhotsamisa inhloko yami, ngakhuleka kuSimakadze, ngimbonga yena longuNkulunkulu wenkhosi yami Abrahama, ngobe angihole ngendlela lekungiyo sibili kutsi ngitewutsatsa lendvodzakati yesihlobo senkhosi yami itewuba ngumfati wendvodzana yayo. ₄₉Manje-ke, njengobe nine nitinini tenkhosi yami, ngitjeleni, nanitsandza kuvelana nayo ngekwetsembeka. Naningatsandzi, ngitjeleni, khona phela ngitekwenta loko lokufanele ngikwente.”

₅₀BoLabani naBethuweli baphendvula batsi: “Lendzaba le iphuma kuSimakadze. Tsine kute lesingakusho. ₅₁Nangu Rebheka embikwakho; mtsatse, uhambe naye ayekuba ngumfati wendvodzana yenkhosi yakho, njengobe Simakadze asakhulumile.”

₅₂Yatsi kube ikuve loko inceku ya-Abrahama, yakhotsama yakhuleka kuSimakadze. ₅₃Lenceku yakhipha tintfo tesiliva netegolide, netingubo, yatipha Rebheka. Yaphindze yapha umnakabo nenina tintfo letingemagugu.

₅₄Lenceku kanye nemadvodza beyihamba nawo badla, banatsa, bahlala khona busuku bonkhe. Nabavuka ngakusasa ekuseni lenceku yatsi: “Ngikhululeni, ngibuyele enkhosini yami.”

₅₅UmnakaboRebheka nenina batsi: “Ase ihlalahlale natsi lentfombatane emalangana langacishe abe lishumi. Emvakwaloko nitawube seniyahamba-ke.”

₅₆Kepha inceku yatsi kubo: “Ningangibambeleli, ngobe Simakadze uyiphumelelisile indzaba yami. Ngikhululeni ngiye enkhosini yami.”

₅₇Base batsi: “Ake sibite lentfombatana sitewuva kuyo.”

₅₈Babita Rebheka, bambuta batsi: “Utawuhamba nayo yini lendvodza?”

Waphendvula watsi: “Yebo, ngitawuhamba nayo.”

₅₉Bamhambisa-ke Rebheka, dzadzewabo, kanye nemongi wakhe. Wahamba nenceku ya-Abrahama kanye nemadvodza leyayihamba nawo.

₆₀Bambusisa Rebheka batsi kuye:

₆₁Rebheka netimphekeleteli takhe batilungisela bagibela emakamela, bahamba nalendvodza. Yamtfola kanjalo-ke Rebheka lendvodza.

₆₂Isaka abephuma eBheri Lahayi Royi, ngobe abehlala eNegevu. ₆₃Waphuma entsambama waya esigangeni ayewudla ematsambo engcondvo khona; watsi uphakamisa emehlo wabona kuchamuka emakamela eta ngakuye.

₆₄Rebheka watsi uphakamisa emehlo akhe, wabona Isaka, wase uyehlika ekameleni. ₆₅Wabuta kulenceku watsi: “Ngubani leya ndvodza lesihlangabetako?”

Inceku yaphendvula yatsi: “Yinkhosi yami.” Ngako-ke watsatsa iveyili yakhe watimbonya.

₆₆Lenceku yafike yalandzisa Isaka ngako konkhe leyase ikwentile.

₆₇Isaka watsatsa Rebheka wamfaka ethendeni lakabo lapho kwake kwahlala unina khona, watsatsa Rebheka wamenta umkakhe, Isaka wamtsandza umkakhe. Ngako-ke Isaka wadvudvuteka emuva kwebuhlungu bekufelwa ngunina.