Kutalwa kwa-Isaka
1Simakadze wabusisa Sara njengobe abeshito. Simakadze wentela Sara loko abemetsembise kona. 2Sara wakhulelwa, watalela Abrahama indvodzana ngesikhatsi lesasikhonjwe nguNkulunkulu. Abrahama abesamdzala kakhulu. 3Abrahama wayetsa libito watsi ngu-Isaka lendvodzana yakhe labeyitalelwe nguSara. 4Abrahama wayisoka indvodzana yakhe lengu-Isaka seyinemalanga lasiphohlongo budzala, njengobe Nkulunkulu abemyalile. 5Abrahama abesaneminyaka lelikhulu budzala, ngesikhatsi kutalwa indvodzana yakhe Isaka. 6Sara watsi: “Nkulunkulu ungiphe luhleko, bonkhe labayivako lendzaba bayawuhleka njengami.” 7Wachubeka watsi: “Ngubani nje labengahle asho ku-Abrahama kutsi Sara uyawuse amunyise bantfwana? Noko sengimtalele indvodzana ebudzaleni bakhe.”
8Umntfwana wakhula, kwatsi mhlazana alunyulwa Abrahama wenta lelikhulu lidzili.
Hagari na-Ishmayeli bayacoshwa
9Ngalelinye lilanga Sara wabona indvodzana yaHagari, umGibhithe, labeyitalele Abrahama, yeyisa Isaka, indvodzana yakhe. 10Ngako-ke wase utsi ku-Abrahama: “Sicoshe lesigcilikati nalendvodzana yaso, ngobe indvodzana yalesigcilikati akufanele ibe yindlalifa kanye nendvodzana yami Isaka.” 11Loku kwamkhatsata kakhulu Abrahama, ngobe bekuphatselene nalendvodzana yakhe. 12Kodvwa Nkulunkulu watsi ku-Abrahama: “Ungakhatsateki ngenca yalomfana nangenca yalesigcilikati sakho. Loko lokushiwo nguSara kuwe kwente njengobe akutjelile, ngobe titukulwane takho tiyawubitwa nga-Isaka. 13Ngiyakwenta sive nangendvodzana yesigcilikati sakho, ngobe nayo iyintalo yakho.”
14Ngakusasa ekuseni Abrahama wavuka kuseluvivi, watsatsa sinkhwa nesigubhu semanti wakwetjatsisa Hagari, wamnika nemntfwana wabahambisa. Wahamba-ke Hagari azulazula ehlane laseBherisheba. 15Atsi kube aphele lamanti esigujini, wabeka umntfwana ngaphansi kwalesinye sihlahla. 16Wase uhamba libanga lemjikijelo, wayawuhlala khona acabanga atsi: “Ngingeke ngikumele kubuka umntfwanami afa.” Asahleti phansi afulatsele lomfana, tehla tinyembeti, wakhala kabuhlungu.
17Nkulunkulu wakuva kukhala kwalomfana; ingilosi yaNkulunkulu yakhuluma isezulwini, yatsi kuHagari: “Hagari, uhlushwa yini? Ungesabi, ngobe Nkulunkulu sewulivile livi lalomfana lapho akhona. 18Sukuma, utsatse lomntfwana, umgone, ngobe ngitakumenta abe sive lesikhulu.” 19Nkulunkulu wawavula emehlo aHagari, wabona sicobho semanti, waya kuwo wafike wagcwalisa sigubhu ngemanti, wanatsisa lomntfwana.
20Nkulunkulu waba naye lomntfwana. Wakhula, akhulela ehlane, waba yingcweti kutebutjoki. 21Ngesikhatsi ahlala ehlane lasePharani, unina wamtsatsela umfati labengumGibhithe.
Sivumelwane emkhatsini wa-Abrahama na-Abimeleki
22Ngaso leso sikhatsi Abimeleki waya ku-Abrahama ahamba naPhikoli, indvuna yemabutfo akhe, wafike watsi: “Nkulunkulu unawe kuko konkhe lokwentako. 23Ngako ase ufunge la kimi embikwaNkulunkulu kutsi ungeke ungiyenge mine, nebantfwabami, netitukulwane tami, kepha ngekwemusa wami lengiwente kuwe, wente nakimi nakulo lelive lokhosele kulo.”
24Abrahama watsi: “Ngiyafunga.”
25Abrahama wase ubeka sikhalo sakhe ku-Abimeleki macondzana nemtfombo wemanti lowawuchwagwe tisebenti ta-Abimeleki. 26Abimeleki watsi: “Hhawu, nami ngiyayicabuka nje lendzaba. Angati kutsi kwentiwe ngubani loko, nawe awuzange sewungitjele, kantsi futsi angizange sengive ngako.” 27Abrahama wase upha Abimeleki timvu netinkhabi, benta sivumelwane bobabili. 28Abrahama wakhetsa emazinyane etimvu lamasikati lasikhombisa emhlambini wakhe. 29Abimeleki wabuta Abrahama watsi: “Usho kutsini ngalokukhetsa lamazinyane etimvu lamasikati lasikhombisa?”
30Abrahama waphendvula watsi: “Yemukela lamazinyane lasikhombisa etimvu la esandleni sami, kube bufakazi bami kutsi lomtfombo wembiwa ngimi.” 31Ngako-ke leyo ndzawo yabitwa ngekutsi yiBherisheba; ngobe ngulapho benta khona sifungo bobabili.
32Batsi kube basente lesivumelwane eBherisheba, bo-Abimeleki nendvuna yakhe, Phikoli, besuka kuleyo ndzawo babuyela eveni lemaFilisti. 33Abrahama wahlanyela sihlahla selitamariske eBherisheba. Wadvumisa Simakadze, Nkulunkulu waphakadze. 34Abrahama wahlala eveni lemaFilisti sikhatsi lesidze.
