Hezekeli 7

₁Livi laSimakadze lefika kimi, latsi: ₂“Ndvodzana yemuntfu, naku lokushiwo yiNkhosi Simakadze, eveni laka-Israyeli, itsi: Kuphela! Kuphela sekufikile emagumbini omane elive. ₃Siphetfo nyalo sesifikile kuwe, ngiyawutfululela lulaka lwami etikwakho. Ngiyakukwehlulela njengekutiphatsa kwakho, ngikukhokhele ngangekwetento takho tonkhe letinengekako. ₄Angiyikukubuka ngesihawu, nome ngikushiye, ngempela ngiyakukubuyisela njengekutiphatsa kwakho nangaletinengiso letisemkhatsini wenu. Ngulapho-ke niyawukwati khona kutsi mine nginguSimakadze.

₅“Naku lokushiwo yiNkhosi Simakadze, itsi: Sigemegeme! Sigemegeme lekungazange sekuvakale ngaso siyeta. ₆Kuphela sekufikile! Kuphela sekufikile! Sekufikile kulwa nawe. Sekufikile! ₇Kubhujiswa sekufikile kuwe, wena lohlala eveni. Sikhatsi sesifikile, lilanga selisondzele, kunekwesaba, hhayi kujabula etikwetintsaba. ₈Sengitawutfululela lulaka lwami etikwakho, ngifeze intfukutselo yami kuwe; ngitakwehlulela njengekutiphatsa kwakho, ngikukhokhele ngangekwetento takho tonkhe letinengekako. ₉Ngingeke ngikubuke ngesihawu nome ngikushiye, ngitakukhokhela njengekutiphatsa kwakho nangaletinengiso letisemkhatsini wenu. Khona-ke utawube sewuyati kutsi mine Simakadze ngimi lona logalela ngalendvuku.

₁₀“Lilanga selilapha! Selifikile! Imbhubhiso seyehlile, indvuku seyihlumile, kutidla kwachakaza! ₁₁Budlwangudlwangu sebukhule baba yindvuku yekujezisa bubi, kute namunye loyawusala angajeziswa kulabo bantfu, kute namunye kuleso sicumbi, kute lokuyawusala ebunjingeni nasebukhosini babo.

₁₂“Sikhatsi sesifikile, lilanga selikhona. Lowo lotsengako akangajabuli, nalowo lotsengisako angadzabuki, ngobe lulaka lusetikwaso sonkhe lesicumbi. ₁₃Umtsengisi angeke aphindze abuyelwe ngaloko lakutsengisile, yingci nabasaphila bobabili, ngobe umbono macondzana naso sonkhe lesicumbi ngeke usahlehliselwa nyovana. Ngenca yetono tabo, kute namunye wabo loyawuphephisa kuphila kwakhe. ₁₄Nome bakhalisa licilongo, batilungiselele ngako konkhe, kute namunye loyakuya emphini, ngobe lulaka lwami lusetikwalesicumbi sonkhe.”

₁₅“Ngephandle yinkemba, ngekhatsi sifo lesibulalanako nendlala; labo labasemaphandleni bayakufa ngenkemba, nalabo labasedolobheni bayawudliwa yindlala nesifo lesibulalanako. ₁₆Bonkhe labasele labaphunyulile bayawubasetintsabeni babubule njengematuba asetihosheni, ngulowo ngenca yetono takhe. ₁₇Tonkhe tandla tiyawube ticeka, nemadvolo onkhe ayawugedletela. ₁₈Bayawukwembatsa emasaka, bagcokiswe lusizi. Buso babo bonkhe buyakwembatsa emahloni, netinhloko tabo bonkhe tiyawuhhulwa. ₁₉Bayawulahla isiliva yabo etitaladini, negolide yabo iyawuba yintfo lengcolile lengenamsebenti. Isiliva negolide yabo ingeke ikhone kubasindzisa ngelilanga lelulaka lwaSimakadze. Ingeke ikwesutsise kulamba kwabo, futsi bangeke batigcwalise tisu tabo ngayo, ngobe ngiyo lebente bakhubatela baze bangena esonweni. ₂₀Babetigabatisa ngetimvunulo tabo nangekwekugaba kwabo lokuhle lababekusebentisa ekubumbeni kwabo letithico tabo letisinengiso, netitfombe letingenamsebenti. Ngako-ke ngiyawutigucula ngitente tingcole tingabi namsebenti. ₂₁Ngiyawukunikela konkhe kube yimphango yebetive nentfo lephangwe ngulababi bemhlaba, futsi bayawukungcolisa. ₂₂Ngiyawubafulatsela, nabo bayawuyonakalisa lendzawo yami leligugu kangaka; bosidlani bayawungena ngekhatsi kuyo bayingcolise.

₂₃“Lungisani tinketane, ngobe lelive ligcwele kugobhota kwengati, nelidolobha ligcwele budlwangudlwangu. ₂₄Ngiyawuletsa tive letimbi kakhulu kutsi titewutsatsa tindlu tabo; ngiyawukucedza kutigabatisa kwalabanemandla, netindzawo tabo lekutsiwa tingcwele tiyawungcoliswa. ₂₅Nakufika kwesabisa, bayawukufuna kuthula, kodvwa abayiwukutfola. ₂₆Kuyawufika sigemegeme etikwesigemegeme, nemahemuhemu etikwemahemuhemu. Bayakwetama kutfola sembulo kumphrofethi; kulahleke nemfundziso yemtsetfo kumphristi, kuphele neteluleko talabadzala. ₂₇Inkhosi iyawulila, sikhulu sembatse kujabha, netandla tebantfu eveni tiyawuchachatela. Ngiyawubaphatsa njengalokufanele kutiphatsa kwabo, ngibehlulele njengekwemitsetfo yabo. Ngulapho-ke bayawungati khona kutsi mine nginguSimakadze.”