Hezekeli 33

₁Livi laSimakadze lefika kimi, latsi: ₂“Ndvodzana yemuntfu, khuluma kubantfu bakini, utsi: ‘Nase ngiletsa inkemba ngimelana nelive lelitsite nebantfu balo, bese bakhetsa indvodza ibe yinye emkhatsini wabo bayente ibe ngumlindzi wabo, ₃lotawutsi nakabona inkemba ita itekumelana nelive, bese ushaya impalampala ecwayise bonkhe bantfu, ₄nangabe lomunye ayiva lempalampala kodvwa angasinaki lesecwayiso, inkemba ize ifike imbulale, ingati yakhe iyawubasenhloko yakhe. ₅Njengobe abeyivile impalampala nayikhala, kodvwa wangete wasinaka lesecwayiso, ingati yakhe iyawubasetikwakhe. Kube abesinakile lesecwayiso, abetawusindzisa kuphila kwakhe. ₆Kodvwa nangabe lomlindzi abona inkemba ita, angayishayi impalampala kwecwayisa bantfu, bese kuta inkemba idle munye wabo, lowo muntfu uyawususwa ngenca yesono sakhe, kodvwa ingati yalowo muntfu ngiyawuyibita kulowo mlindzi.’

₇“Ndvodzana yemuntfu, sengikubeke kutsi ube ngumlindzi wendlu yaka-Israyeli; ngako-ke vani livi lengilikhuluma kuwe, ubanike secwayiso lesiphuma kimi. ₈Nangikhuluma kumuntfu lomubi, ngitsi: ‘Awu wena muntfu lomubi, ngempela utakufa,’ wena-ke ungabe usakukhuluma loko kuye kutsi atiyekele tindlela takhe letimbi, lowo muntfu lomubi uyakufa ngenca yesono sakhe, mine-ke ngiyakuyibita kuwe ingati yakhe. ₉Kodvwa nangabe wena umecwayisa lomuntfu lomubi kutsi atiyekele tindlela takhe letimbi, yena angete atiyekela, lowo muntfu uyakufa ngenca yesono sakhe, kodvwa wena uyawube utisindzisile.”

₁₀“Ndvodzana yemuntfu, khuluma kuyo indlu yaka-Israyeli, utsi: ‘Naku lenikushoko nitsi: “Tikhubekiso tetfu netono tetfu kusidvonsela phansi, natsi sesiyahusheka ngenca yato. Manje-ke sitawuphila kanjani?” ’ ₁₁Khuluma kubo utsi: ‘Ngifunga kuphila kwami, kusho iNkhosi Simakadze, angikujabuleli kufa kwalomubi, kodvwa ngitsandza kutsi agucuke etindleleni takhe letimbi aphile. Gucukani! Gucukani etindleleni tenu letimbi! Ningafelani, ninendlu yaka-Israyeli?’

₁₂“Ngako-ke, ndvodzana yemuntfu, khuluma kulabantfu bakini, utsi: ‘Kulunga kwemuntfu lolungile kungeke kumsindzise nangabe aphambuka, nebubi bemuntfu lomubi bungeke bumente awe, nangabe agucuka kubo. Umuntfu lolungile, nangabe ona, angeke avunyelwe kutsi aphile ngenca yekulunga kwakhe kwakucala.’ ₁₃Nangabe ngitjela lolungile kutsi ngempela utawuphila, kodvwa yena bese wetsembela kuloko kulunga kwakhe, ente lokubi, kute nome sinye kuletento takhe letinhle latente kucala lesiyawukhunjulwa; uyakufa ngenca yaloko lokubi lakwentile. ₁₄Nangabe ngikhuluma kumuntfu lomubi, ngitsi: ‘Ngempela utakufa,’ kodvwa bese uyaphendvuka esonweni sakhe, ente loko lokucotfo nalokulungile, ₁₅nangabe abuyisela loko lakutsatsa njengesibambiso seseboleko, abuyisele naloko lakweba, alandzele timiso tekuphila, angakwenti lokubi, ngempela uyawuphila; angeke afe. ₁₆Kute nome sinye sono kuleto latentile lesiyawukhunjulwa simelane naye. Wente lokucotfo nalokulungile; ngempela uyawuphila.

₁₇“Noko bantfu bakini batsi: ‘Indlela yaSimakadze ayikalungi.’ Kodvwa yindlela yabo lena lengakalungi. ₁₈Nangabe umuntfu lolungile agucuka ekulungeni kwakhe ente lokubi, loko uyawukufela. ₁₉Kantsi nangabe umuntfu lomubi agucuka ebubini bakhe ente lokucotfo nalokulungile, uyawuphila ngekwenta loko. ₂₀Noko, wenandlu yaka-Israyeli, utsi: ‘Indlela yaSimakadze ayikalungi.’ Kodvwa ngulowo nalowo wenu ngiyakumehlulela ngekwetindlela takhe.”

₂₁Ngemnyaka weli-12 wekutfunjwa kwetfu, enyangeni yelishumi, ngelilanga lesihlanu, indvodza leyayibaleke eJerusalema yeta kimi, yefika yatsi: “Lidolobha seliwile!” ₂₂Ngayitolo kusihlwa lendvodza isengakefiki, sandla saSimakadze sasisetikwami, wavula umlomo wami ekuseni lendvodza isengakefiki. Ngako umlomo wami wavuleka, ngangabe ngisabindza.

₂₃Livi laSimakadze lase liyefika kimi, latsi: ₂₄“Ndvodzana yemuntfu, bantfu labahlala kulawo madzibikelo eveni laka-Israyeli, batsi: ‘Abrahama bekunguye yedvwa, noko lonkhe lelive belilakhe. Kodvwa tsine sibanyenti; nakanjani lelive linikwe tsine kutsi libe letfu.’

₂₅“Ngako-ke khuluma kubo, utsi: ‘Naku lokushiwo yiNkhosi Simakadze, itsi: Njengobe senidla inyama lenengati, nibuke tithico tenu, nicitse ingati, kufanele yini kutsi lelive libe lenu? ₂₆Netsembele enkembeni yenu, nente tintfo letinengekako, ngulowo nalowo wenu ungcolisa umkamakhelwane wakhe. Kufanele yini kutsi lelive libe lenu?’

₂₇“Khuluma kubo, utsi: ‘Naku lokushiwo yiNkhosi Simakadze, itsi: Ngifunga kuphila kwami, labo labasemadzilikelweni bayawubulawa ngenkemba, labo labasemaphandleni ngiyawubanikela etilwaneni tesiganga kutsi tibashwabudzele, kutsi labo labasetinqabeni nasemigedzeni babulawe sifo lesibulalanako. ₂₈Live ngiyawulenta libe lihlane lelingenalutfo, nemandla abo labebatigcabha ngawo ayakuphela atsi nya, tintsaba taka-Israyeli tiyakuba sikhotsa, kangangekutsi kubete nalowengca kuto. ₂₉Ngulapho-ke bayawukwati khona kutsi mine nginguSimakadze, nase ngente lelive laba lihlane lelingenalutfo ngenca yato tonkhe letintfo letinengekako labatentile.’ ”

₃₀“Wena-ke, ndvodzana yemuntfu, bantfu bakini bakhuluma ngawe ngasetindvongeni nangaseminyango yetindlu, bakafana imilomo ngawe, batsi: ‘Wotani nitekuva livi leliphuma kuSimakadze.’ ₃₁Bantfu bami beta kuwe, njengobe bavame kwenta, bahlale embikwakho balalele emavi akho, kodvwa abawenti. Ngemilomo yabo bakhuluma kutsi batinikele, kodvwa tinhlitiyo tabo tibukhali, tifuna inzuzo lembi. ₃₂Yebo, kubo awusilutfo, ufanana nemuntfu lohlabela tingoma telutsandvo ngeliphimbo lelimnandzi, adlale nemntjingozi kamnandzi, ngobe emavi akho bayaweva, kodvwa bangawenti.

₃₃“Kuyawutsi konkhe loku nase kwenteka, ngobe vele kutakwenteka, ngulapho-ke bayawukwati khona kutsi umphrofethi abesemkhatsini wabo.”