1Simakadze wakhuluma kuMosi, watsi: “Buka la, wena ngitakwenta ufane naNkulunkulu kuFaro; Aroni, umnakenu, yena abe ngumphrofethi wakho. 2Wena utawutjela Aroni konkhe loko lengikuyale ngako; yena-ke utabe sewutjela Faro kutsi akhulule sive sami, ema-Israyeli, siphume eveni lakhe. 3Kodvwa ngitayenta ibe lukhuni inhlitiyo yaFaro, nome ngingaze ngente tibonakaliso netimangaliso letinyenti la eveni laseGibhithe. 4Faro angeke anilalele, ngako-ke ngiyakwehlisela sandla sami eGibhithe, ngiyijezise kabuhlungu, ngikhiphe sive sami, bantfwana baka-Israyeli, eGibhithe. 5EmaGibhithe ngulapho ayawungati khona kutsi nginguSimakadze, nase ngelule sandla sami ngikhulula ema-Israyeli emkhatsini wawo.” 6BoMosi na-Aroni benta njengobe babeyalwe nguSimakadze. 7Mosi abesaneminyaka lengema-80, kantsi Aroni abesaneminyaka lengema-83, nabakhulumisana naFaro.
Indvuku ya-Aroni
8Simakadze wakhuluma kuboMosi na-Aroni, watsi: 9“Faro nakatsi: ‘Ase nente ummangaliso lotanifakazela,’ ubotsi ku-Aroni: ‘Tsatsa indvuku yakho uyijike phansi embikwaFaro, itawugucuka ibe yinyoka.’ ” 10Ngako-ke boMosi na-Aroni baya kuFaro befike benta njengobe Nkulunkulu abebayalile. Aroni wajika indvuku yakhe phansi embikwaFaro netiphatsimandla takhe, indvuku yagucuka yaba yinyoka. 11Faro wabita tihlakaniphi kanye nalabalumbako bakakhe. Nabo labalumbi baseGibhithe bakwenta loko ngemilingo yabo. 12Nabo batijika phansi tindvuku tabo, tagucuka taba tinyoka. Kodvwa indvuku ya-Aroni yatimita tonkhe leti letinye tindvuku. 13Inhlitiyo yaFaro yajinge yaba lukhuni, akazange abalalele, njengobe Simakadze abeshito.
Tinhlupheko taseGibhithe
Sishayo sekucala: Emanti agucuka aba yingati
14Simakadze wakhuluma kuMosi, watsi: “Inhlitiyo yaFaro seyilukhuni, uyala kukhulula labantfu kutsi bahambe. 15Hamba uye kuFaro ekuseni ngesikhatsi aya emfuleni iNayili, ubommela elusentseni lwayo. Uboyiphatsa lendvuku leyagucuka yaba yinyoka. 16Ubokhuluma kuye utsi: ‘Simakadze, Nkulunkulu wemaHebheru, ungitfume kuwe watsi ngibofike ngitsi: “Khulula sive sami sihambe, khona sitewungikhonta ehlane;” kodvwa kuze kube ngumanje usengakakwenti loko lengikutjela kona. 17Utsi-ke Simakadze: “Loku lengitakwenta ngiko lokutakwenta wati kutsi nginguSimakadze.” Ngitawushaya lamanti emfula iNayili ngalendvuku lesesandleni sami, bese-ke onkhe lamanti ayagucuka aba yingati. 18Tonkhe tinhlanti titakufa, bese lomfula unuka luvundze kangangobe emaGibhithe atakwehluleka ngisho nekunatsa emanti awo.’ ”
19Simakadze wakhuluma kuMosi, watsi: “Khuluma ku-Aroni utsi: ‘Tsatsa indvuku yakho uyengamise yonkhe imifula, nemisele yayo, netitiba tayo, netitiba tekwakhiwa la eGibhithe. Lamanti atawugucuka abe yingati, lonkhe live laseGibhithe, ngisho nasetitjeni letentiwe ngetigodvo naletentiwe ngematje.’ ”
20BoMosi na-Aroni benta njengobe babeyalwe nguSimakadze. Aroni waphakamisa indvuku yakhe embikwaFaro netiphatsimandla takhe washaya emanti emfula iNayili. Onkhe emanti lakuyo agucuka aba yingati. 21Tinhlanti temfula tafa, iNayili yanuka luvundze kangangekutsi emaGibhithe ehluleka kuwanatsa emanti ayo. Live lonkhe laseGibhithe lagcwala ingati. 22Labalumbi baseGibhithe nabo bakwenta loko ngemilingo yabo. Ngako-ke inhlitiyo yaFaro yachubeka yaba lukhuni kakhulu, akazange akulalele loko babemtjela kona, kwaya njengobe Simakadze abeshito. 23Faro wancandzeka wabuyela esigodlweni sakhe; akazange akunake ngisho nakancane loko. 24Onkhe emaGibhithe agubha emanti elusentseni lwemfula iNayili, ngobe emanti ayo abengasanatseki. 25Kwendlula emalanga lasikhombisa Simakadze awashayile emanti emfula iNayili.
