Eksodusi 35

₁Mosi wasihlanganisa sonkhe sive sema-Israyeli, wakhuluma kuso watsi: “Naku-ke Simakadze laniyale ngako kutsi nikwente: ₂Kufanele nente imisebenti yenu emalanga lasitfupha, kodvwa lilanga lesikhombisa nilingcwelise kube liSabatha, lilanga lekuphumula, lilanga lelinikelwe kuSimakadze. Losebenta ngalelo langa kufanele abulawe. ₃Ningawubasi ngisho nemlilo emitini yenu ngelilanga leSabatha.”

₄Mosi wakhuluma kuso sonkhe sive sema-Israyeli, watsi: “Naku-ke Simakadze laniyale ngako kutsi nikwente: ₅Tsatselani Simakadze umnikelo kuloko leninako. Wonkhe lonenhlitiyo levumako akaletse umnikelo kuSimakadze: umnikelo wegolide, newesiliva, newelitfusi, ₆newensontfo leluhlata njengesibhakabhaka, nalebukhwebeletane, nalebovu ngalokutopele, newendvwangu yelineni lecolisakele, neweboya bembuti, ₇newetikhumba tetihhanca letishukiwe taguculwa taba bovu, newetikhumba temahhashi aselwandle, newetingodvo temgamba, ₈newemafutsa ekukhanyisa tibane; newetinongo temafutsa ekugcobisa, newemphepho lenuka kamnandzi, ₉newematje e-oniksi, nawelamanye ematje laligugu ekuhleliswa esidziyeni nasesembatfweni sesifuba semPhristi Lomkhulu.”

₁₀“Onkhe emadvodza lanelikhono lasemkhatsini wenu kufanele ente naku Simakadze latsite akwentiwe: ₁₁lithende lekukhontela, nelithende lalo, nesimbonyo salo, nemahhuka alo, netinsikabhaluko talo, nemakabha alo, netinsika talo, nemaseko alo; ₁₂libhokisi lesivumelwane, netimboko talo, nesimbonyo salo lesisihlalo semusa, nendvwangu levimbe libhokisi lesivumelwane; ₁₃litafula netimboko talo, nako konkhe lokuhambisana nalo, nesinkhwa sebukhona; ₁₄lutsi lwetibane kanye netimphahla letihambisana nalo, netibane kanye nemafutsa ekukhanyisa tibane; ₁₅nelilati lemphepho, netimboko talo, nemafutsa ekugcoba, nemphepho lenuka kamnandzi, nendvwangu lelengiswa ekungeneni kwelithende lekukhontela; ₁₆nelilati lemnikelo wekushiswa, nemhlobiso walo welitfusi losasisefo, netimboko talo, netimphahla letihambisana nalo, nemgezelo nesibunu sawo, ₁₇netindvwangu tesibuya, netinsika taso, kanye nemaseko ato, nendvwangu lelengiswa emnyango wesibuya, ₁₈netiphunti, netintsambo telithende lekukhontela netesibuya; ₁₉netembatfo letihlotjiswe kahle letisetjentiswa ekukhonteni endzaweni lengcwele, lekutembatfo letingcwele ta-Aroni, umphristi, kanye netembatfo temadvodzana akhe labatisebentisa nabenta inkonzo yabo yebuphristi.”

₂₀Onkhe ema-Israyeli esuka kuMosi, ahamba. ₂₁Ngulowo nalowo lonelikhono kanye nabo bonkhe labatsintseka etinhlitiyweni nasemoyeni wabo baletsa umnikelo kuSimakadze wekutsi usetjentiswe ethendeni lekuhlangana nasekukhonteni kanye nasekwelukeni tembatfo letingcwele. ₂₂Beta bonkhe lababenetinhlitiyo letivumako, labadvuna nalabasikati: baletsa tonkhe tinhlobo temhlobiso, letatentiwe ngegolide, baletsa ticobosho temhlobiso, nemacici, netindandatho, nebuhlalu bekwegaba. Bonkhe baletsa igolide yabo, kwaba ngumnikelo wekujikitiswa kuSimakadze. ₂₃Bonkhe labo lababenensontfo leluhlata njengesibhakabhaka, nalebukhwebeletane, nalebovu ngalokutopele, nendvwangu yelineni lecolisakele, neboya bembuti, netikhumba tetihhanca letishukiwe taguculwa taba bovu, netikhumba temahhashi aselwandle, bakuletsa. ₂₄Bonkhe labo lababenemandla ekunikela ngesiliva nangelitfusi bakuletsa, kwaba ngumnikelo kuSimakadze, bonkhe lababenemgamba lewawungaba lusito bakuletsa. ₂₅Bonkhe labasikati lababenelikhono lekwephotsa baletsa insontfo leluhlata njengesibhakabhaka, nalebukhwebeletane, nalebovu ngalokutopele, netindvwangu telineni lecolisakele. ₂₆Bonkhe labasikati lababenetinhlitiyo letitsintsekile lababenelikhono bephotsa boya betimbuti. ₂₇Baholi baletsa ematje layi-oniksi nalamanye ematje laligugu kutsi atewufakwa esidziyeni nasesembatfweni sesifuba, ₂₈netinongo, nemafutsa ekukhanyisa, newekugcoba, newemphepho lenuka kamnandzi. ₂₉Onkhe ema-Israyeli, labadvuna nalabasikati, lababenetinhlitiyo letivumako tekunikelela wonkhe lomsebenti, Simakadze labeyale Mosi kutsi awente, bakuletsa kuSimakadze, kwaba ngumnikelo wesihle.

₃₀Mosi wakhuluma kuma-Israyeli, watsi: “Simakadze ukhetse Besaleli umsa wa-Uri, lotalwa nguHure, wesive sakaJuda. ₃₁Nkulunkulu umgcwalise ngaMoya wakhe; wamupha likhono, nekuhlakanipha, nelwati emisebentini yonkhe yebungcweti, ₃₂kutsi akwati kwenta tinhlobonhlobo temihlobiso ngegolide, nangesiliva, nangelitfusi, ₃₃nekusika ematje, nekubata lukhuni, nekwenta nome ngabe ngumuphi umsebenti webungcweti. ₃₄Simakadze uphe yena na-Oholiyabi, umsa wa-Ahisamaki, wesive sakaDani, kutsi bakwati kufundzisa labanye bantfu. ₃₅Ubaphe likhono lekutsi bakwati kwenta yonkhe inhlobo yemisebenti leyentiwa ngetandla, tingcweti, nebahlobisi, nebeluki betindvwangu letelukwe ngensontfo leluhlata njengesibhakabhaka, nalebukhwebeletane, nalebovu ngalokutopele, kanye nangemitiya yelineni lecolisakele. Bayakwati kwenta yonkhe inhlobo yemsebenti, kantsi futsi bonkhe sebanebungcweti.”