Eksodusi 28

₁“Ubobe sewubita umnakenu, Aroni, kanye nemadvodzana akhe boNadabi, na-Abihu, naEleyazare, na-Ithamari, ubehlukanise nema-Israyeli, ngobe ngifuna babe baphristi bekungikhonta. ₂Ubotfungela umnakenu, Aroni, tembatfo letingcwele tebuphristi; ngito letitamnika sitfunti nekuhlonipheka. ₃Tjela bonkhe bantfu labanelikhono lekutfunga, lengibaphe kuhlakanipha, kutsi bafanele bentele Aroni tembatfo tebuphristi kuze angikhonte njengemphristi. ₄Tembatfo lekumele batente ngunati: sembatfo sesifuba, sidziya, nemjiva, nengubo lete umkhono lehlotjisiwe, nemshuculo wenhloko, nelucotfo. Letembatfo letingcwele batawutentela umnakenu Aroni kanye nemadvodzana akhe, kuze bangikhonte njengebaphristi. ₅Letingcweti tibosebentisa imitiya yelineni leyephotselwe ngalokucolisakele, nensontfo leluhlata njengesibhakabhaka, nalebukhwebeletane, nalebovu ngalokutopele, nemicwana yegolide.

₆“Kufanele bente sidziya ngensontfo leluhlata njengesibhakabhaka, nalebukhwebeletane, nalebovu ngalokutopele, naleyigolide kanye nangemtiya welineni lecolisakele. ₇Lesidziya sitawuba nemichilo lemibili ngala nangale yekusibophela nekusihlanganisa emahlombe. ₈Nalelibhande lelelukiwe leliselukhalweni kufanele libe yintfo yinye nalesidziya, lentiwe ngemicwana yegolide, nangensontfo lebukhwebeletane, naleluhlata njengesibhakabhaka, nalebovu ngalokutopele kanye nangemitiya yelineni leyephotselwe ngalokucolisakele. ₉Ubotsatsa ematje lamabili e-oniksi, uwabhale ngekucopha emabito emadvodzana a-Israyeli lali-12, ₁₀ngekwelamana kwawo, lasitfupha kulelitje lelinganhlanye, nalasitfupha kulelitje lelinganhlanye. ₁₁Funa umuntfu lonelikhono lekubhala ngekucopha lamatje lamabili, acophe emabito emadvodzana aka-Israyeli; lamatje abowahlobisa ngegolide lapha emaphetselweni. ₁₂Lamatje ubowafaka kulemichilo lebophela lesidziya emahlombe. Aroni utabowagaca emahlombe lamabito emadvodzana aka-Israyeli njalo nje naketa kimi, kuze kube sikhumbuto. ₁₃Ubenta imiphetfo yegolide ibe mibili, ₁₄nemigaco yegolide lecengekile lephotsene njengentsambo leyelukiwe, bese uyibophela emiphetfweni.”

₁₅“Ubenta sembatfo sesifuba ngebungcweti lobukhulu, sibe ngesekwehlulela kwemPhristi Lomkhulu; njengesidziya sibe nalokuyigolide, nalokubukhwebeletane, nalokuluhlata njengesibhakabhaka, nalokubovu ngalokutopele kanye nemitiya yelineni lecolisakele. ₁₆Kufanele siphindvwe kabili, khona sitewuba sikhwama lesilingene ndzawo tonkhe, budze baso bube ngemasentimitha langaba ngema-22, nebubanti lobungemasentimitha langaba ngema-22. ₁₇Unamatsisele kuso imigca lemine yematje laligugu; emgceni wekucala unamatsisele isadiyusi, nethophazi, nerubhi; ₁₈emgceni wesibili unamatsisele simaragidu, nesafire, nedayimani; ₁₉emgceni wesitsatfu unamatsisele ihiyakinte, ne-agathe, ne-amethiste; ₂₀emgceni wesine unamatsisele ikhrisolithe, ne-oniksi, nejasiphi. Lamatje kufanele ephetfwe ngegolide. ₂₁Kufanele kube nematje lali-12, ngulelo nalelo litje libe nelibito lendvodzana ya-Israyeli; ngulelo nalelo litje libekwe luphawu ngekusikwa kwelibito lesive setive letili-12 taka-Israyeli. ₂₂Lesembatfo sesifuba kufanele usentele imigaco yegolide lecengekile lephotsene njengentsambo leyelukiwe. ₂₃Lesembatfo sesifuba kufanele usentele emajiva lamabili egolide, uwacoboshele kulamakona lamabili langetulu. ₂₄Uyawubophela lemigaco lemibili yegolide kulamajiva lamabili lasemakoneni alesembatfo sesifuba. ₂₅Letinye tihloko talemigaco kufanele utibophele kulemiphetfo lemibili, ngalendlela titawuba ngembili emichilweni yemahlombe yalesidziya. ₂₆Ubenta emajiva lamabili egolide uwatfungele kulamakona lamabili langentansi ngaphansi kulesembatfo sesifuba, ngekhatsi macondzana nesidziya. ₂₇Wente lamanye emajiva lamabili egolide uwatfungele ngaphansi kulemichilo lemibili yesidziya ngembili kwaso, eceleni kwemtfungo, ngetulu kwalelibhande lelelukwe kahle. ₂₈Bopha lamajiva lasesembatfweni sesifuba uwahlanganise nalamajiva esidziya ngentsambo leluhlata njengesibhakabhaka. Loko kutakwenta sembatfo sesifuba sibe ngetulu kwelibhande singaceki.

₂₉“Ngesikhatsi Aroni angena endzaweni lengcwele utabokwembatsa lesembatfo sesifuba lesinemabito emadvodzana aka-Israyeli, khona atawubokhumbuleka njalo nje kuSimakadze. ₃₀Kulesembatfo sesifuba sekwehlulela ubofaka i-Urimu neThumimu, kubesetikwenhlitiyo ya-Aroni sonkhe sikhatsi nangena ebukhoneni baNkulunkulu. Kanjalo-ke Aroni uyawuphatsa letehlulelo tema-Israyeli etikwenhlitiyo yakhe nasembikwaNkulunkulu.”

₃₁“Umjiva wonkhe longetulu kwalesidziya kufanele wentiwe ngendvwangu leluhlata njengesibhakabhaka. ₃₂Lomjiva kufanele ube nembobo yekufaka inhloko; lembobo kufanele yephetfwe ngekugocotwa, bese iyatfungwa khona ingetiwudzabuka. ₃₃Emphetfweni wawo ngaphansi kufanele uwuhlobise ngemahananandza entiwe ngensontfo leluhlata njengesibhakabhaka, nalebukhwebeletane, nalebovu ngalokutopele atungelete lomphetfo, kube netinsimbi tegolide emkhatsini wawo. ₃₄Kufanele kube nelihananandza lilandzelwe yinsimbi yegolide wonkhe umphetfo wemjiva.

₃₅“Aroni kufanele embatse lomjiva njalo nje nakakhonta njengemphristi, nangena endzaweni lengcwele eme embikwaSimakadze nome aphuma, letinsimbi titabovakala tikhala, khona angetikufa.

₃₆“Yenta ngcwengcwe wegolide lecengekile bese ubhala ngekucopha nankha emagama: ‘Kwehlukaniselwe Nkulunkulu’. ₃₇Longcwengcwe ubombophela ngembili kulomshuculo wenhloko ngentsambo leluhlata njengesibhakabhaka. ₃₈Aroni kufanele akufake ebuntini lakhe, khona atekutsatsa onkhe emaphutsa esive sema-Israyeli lababe nawo, khona iminikelo yabo itekwamukeleka, nome ngabe bebonile ekunikeleni ngayo.

₃₉“Ingubo ya-Aroni lengenamkhono uboyitfunga ngendvwangu yelineni lecolisakele, nalomshuculo wenhloko uwente ngendvwangu yelineni lecolisakele kanye nelibhande lekufanele lihlotjiswe.

₄₀“Ubenta tingubo letingenamkhono nemabhande, nemishuculo yenhloko, wentele emadvodzana a-Aroni, khona atewuba nesitfunti ahlonipheke. ₄₁Letimphahla ubotembatsisa umnakenu Aroni nemadvodzana akhe. Ubobagcoba ngemafutsa emncumo, ungehlukanisele bona babe ngcwele bangene esigabeni sekungikhonta njengebaphristi.

₄₂“Kufanele ubentele imibekelo yelineni kusukela elukhalweni kuze kufike ematsangeni, khona batewufihla bungcunu babo. ₄₃Aroni nemadvodzana akhe kufanele batifake njalo nje nabaya ethendeni lekuhlangana nome beta kutekungikhonta elatini endzaweni lengcwele, khona bangetiwubulawa ngenca yekona ngebungcunu babo.

“Lona-ke ngumyalo wa-Aroni netitukulwane takhe kuze kube phakadze naphakadze.”