Kubase-Efesu 1

₁Lencwadzi iphuma kuPawula, longumphostoli waKhristu Jesu ngekwentsandvo yaNkulunkulu.

Iya kulabangcwele labase-Efesu labakholwa nguKhristu Jesu ngekwetsembeka.

₂Akube kini umusa nekuthula lokuvela kuNkulunkulu longuBabe wetfu, nakuJesu Khristu iNkhosi.

₃Akabongwe Nkulunkulu longuYise weNkhosi yetfu Jesu Khristu, ngobe usibusise kuKhristu ngato tonkhe tibusiso taMoya tasezulwini. ₄Kwatsi nemhlaba ungakasekelwa, Nkulunkulu wasikhetsa ngaKhristu, kuze sibe ngcwele, singabi nasici emehlweni akhe.

Njengobe asitsandza, ₅Nkulunkulu wavele wasikhetsanchanti ngekwenjongo yentsandvo yakhe, wasenta emadvodzana akhe ngaJesu Khristu. ₆Ngako-ke akudvunyiswe umusa wakhe webukhosi, lasipha wona ngeNdvodzana yakhe letsandzekako. ₇Ngengati yaJesu sinekuhlengwa nekutsetselelwa kwetono, ngekwengcebo yemusa, ₈Nkulunkulu lasipha wona, waze waphuphuma.

Ngekuhlakanipha nekucondza kwakhe ₉Nkulunkulu wakubona kufanele kutsi asatise imfihlakalo yentsandvo yakhe, labeyimisile ngaKhristu kwasekucaleni. ₁₀Wakubona kufanele kutsi lelisu alifeze ngesikhatsi lesingiso ngekutsi indalo yonkhe yalokusemhlabeni nalokusezulwini ayihlanganisele ndzawonye ngaJesu Khristu loyinhloko yako konkhe.

₁₁Nkulunkulu wasikhetsanchanti ngaye kutsi sibe lifa lakhe, yena lowenta konkhe ngekwentsandvo yakhe. ₁₂Tsine lesetsemba kuKhristu kucala sakhetselwa kutsi siphilele kudvumisa bukhosi baNkulunkulu.

₁₃Kwaba njalo-ke nakini futsi. Natsi kube nive livi leliciniso, liVangeli lekusindziswa kwenu, nakholwa nguye futsi, nani nabekwa luphawu lolunguMoya Longcwele labetsenjisiwe. ₁₄Yena usibambiso selifa leliyawuba letfu ngesikhatsi Nkulunkulu ahlenga lokukwakhe, kube ludvumo lwebukhosi bakhe.

₁₅Ngako-ke sengivile ngekukholwa lokukini eNkhosini Jesu, nangelutsandvo lwenu kubo bonkhe labangcwele, ₁₆ngibonga ngingakhawuli ngani, nginikhumbula njalo nje emikhulekweni yami. ₁₇Nkulunkulu weNkhosi yetfu Jesu Khristu, uYise lonebukhosi, aniphe umoya wekuhlakanipha nekwembulelwa ekumatini Yena. ₁₈Akakhanyise emehlo etinhlitiyo tenu, kuze nati lokulitsemba lanibitela kulo, nekutsi buhle kanganani bukhosi belifa lakhe kubo labangcwele, ₁₉nati nalokubukhulu lobumangalisako bemandla akhe kitsi, tsine lesikholwako. ₂₀Lamandla lamakhulu wawasebentisa nakavusa Khristu kulabafile, amhlalisa ngesekudla sakhe ezulwini, ₂₁ngetulu kwako konkhe kubusa, neligunya, nemandla, nebukhosi, nemagama onkhe laphatfwako, hhayi kuleli kuphela, kodvwa nakulelitako. ₂₂Nkulunkulu wabeka konkhe ngaphansi kwemandla akhe, wambeka kutsi abe yinhloko etikwako konkhe ebandleni. ₂₃Libandla lingumtimba waKhristu, lokuphelela kwakhe kuphelelisa konkhe kuko konkhe.