Imitsetfo yaNkulunkulu lebhalwe ematjeni
1Mosi kanye nebaholi bema-Israyeli bakhuluma esiveni sonkhe, batsi: “Yigcineni yonkhe lemiyalo lengininika yona lamuhla. 2Mhlazana newela umfula iJordane ningena eveni Simakadze Nkulunkulu wenu lanipha lona, niyawumisa ematje lamakhulu, bese niwahuca ngemcakaco lomhlophe. 3Niyawubhala kuwo onkhe emavi alomtsetfo, nase newele nangena kulelive Simakadze Nkulunkulu wenu lanipha lona, live leligcwele lubisi neluju lwetinyosi, njengobe Simakadze Nkulunkulu waboyihlomkhulu anetsembisa. 4Niyawutsi ningewela umfula iJordane, bese nimisa lamatje, niwembele eNtsabeni i-Ebhali, njengobe sengishito lamuhla, bese niwahuca ngemcakaco lomhlophe. 5Lilati laSimakadze Nkulunkulu wenu niyawulakha khona lapho, lilati lematje. Aniyikuwacopha ngelishizolo lensimbi. 6Lilati laSimakadze Nkulunkulu wenu niyakulakha ngematje esiganga langakacotwa, lasuka esigangeni, ngulapho niyawunikelela khona umhlatjelo wekushiswa kuSimakadze Nkulunkulu wenu. 7Niyakuyinikelela lapho iminikelo yekuthula, niyidle nijabule embikwaSimakadze Nkulunkulu wenu. 8Niyakuwabhala kahle ngalokucacile onkhe emavi alomtsetfo, niwabhala kulamatje leniwagcumekile.”
9Mosi kanye nebaphristi labangemaLevi bakhuluma kuwo onkhe ema-Israyeli, batsi: “Thulani, sive sema-Israyeli, nilalele kahle! Lamuhla senisive saSimakadze Nkulunkulu wenu. 10Lalelani Simakadze Nkulunkulu wenu, nilandzele yonkhe imiyalo yakhe netimiso takhe lengininika tona lamuhla.”
Ticalekiso tekungaleleli
11Ngalona lelo langa Mosi wayala sive watsi: 12“Niyakutsi nase newelele ngesheya kweJordane, tive letiyakuma eNtsabeni iGerizimu tibusise sive sonkhe kuyawuba bakaSimeyoni, nebakaLevi, nebakaJuda, nebaka-Isakhari, nebakaJosefa kanye nebakaBhenjamini. 13Letive leti ngito futsi letiyakuma naseNtsabeni i-Ebhali tikhulume ticalekiso: sive sakaRubeni, nesakaGadi, nesaka-Asheri, nesakaZebuloni, nesakaDani kanye nesakaNaftali. 14Sive sakaLevi siyawukhuluma siphakamise livi laso kuwo onkhe ema-Israyeli sitsi:
15“ ‘Ucalekisiwe umuntfu lobata sitfombe nome ente sithico, intfo lesinengiso kuSimakadze, umsebenti wengcweti yetekubata ngetandla, akubeke ngasense endzaweni lesitsekile.’
“Bonkhe bantfu bayawuphendvula batsi: ‘Amen.’
16“ ‘Ucalekisiwe umuntfu lowedzelela uyise nome unina.’
“Bonkhe bantfu bayawuphendvula batsi: ‘Amen.’
17“ ‘Ucalekisiwe umuntfu lotfutsa akhweshise sikhonkhwane semnyele wamakhelwane wakhe.’
“Bonkhe bantfu bayawuphendvula batsi: ‘Amen.’
18“ ‘Ucalekisiwe umuntfu lohola imphumphutse ayedukise endleleni.’
“Bonkhe bantfu bayawuphendvula batsi: ‘Amen.’
19“ ‘Ucalekisiwe umuntfu logodla emalungelo kuto tindzindzi, nakuto tintsandzane kanye nakubafelokati.’
“Bonkhe bantfu bayawuphendvula batsi: ‘Amen.’
20“ ‘Ucalekisiwe umuntfu lolala nemkayise, ngobe uhlambalata licansi leyise.’
“Bonkhe bantfu bayawuphendvula batsi: ‘Amen.’
21“ ‘Ucalekisiwe umuntfu lolala nesilwane nome ngangusiphi.’
“Bonkhe bantfu bayawuphendvula batsi: ‘Amen.’
22“ ‘Ucalekisiwe umuntfu lolala nadzadzewabo, indvodzakati yeyise nome yenina.’
“Bonkhe bantfu bayawuphendvula batsi: ‘Amen.’
23“ ‘Ucalekisiwe umuntfu lolala neninatala.’
“Bonkhe bantfu bayawuphendvula batsi: ‘Amen.’
24“ ‘Ucalekisiwe umuntfu lobulala makhelwane wakhe ngasense.’
“Bonkhe bantfu bayawuphendvula batsi: ‘Amen.’
25“ ‘Ucalekisiwe umuntfu lotsatsa umdizo, khona atewubulala umuntfu longenacala.’
“Bonkhe bantfu bayawuphendvula batsi: ‘Amen.’
26“ ‘Ucalekisiwe umuntfu longawemukeli emavi alomtsetfo ngekutsi awente.’
“Bonkhe bantfu bayawuphendvula batsi: ‘Amen.’ ”
