Sawula utingela libandla
1Sawula abevumelene nabo kutsi abulawe loStefano. Ngalo lelo langa libandla laseJerusalema lacala lahlupheka ngekutingelwa kabuhlungu. Onkhe emakholwa, ngaphandle kwebaphostoli, asakateka netigodzi tonkhe taseJudiya naseSamariya. 2Lamanye emadvodza lakholwako asingcwaba sidvumbu saStefano; akhala kakhulu amlilela.
3Kodvwa Sawula wetama kulibhubhisa libandla, aphuma angena tindlu ngetindlu, awahudvula emakholwa, labadvuna nalabasikati, abafaka ejele.
LiVangeli lishunyayelwa eSamariya
4Lamakholwa lasakateka kuto tonkhe tindzawo, abehamba alishumayela lelivi. 5Filiphu waya edolobheni laseSamariya ayawushumayela ngaloKhristu kubantfu bakhona. 6Sicumbi sebantfu salalela nganhlitiyo yinye loko kwakukhulunywa nguFiliphu, sabona netimangaliso labetenta. 7Bomoya lababi babephuma kubantfu bakhala kakhulu; bonkhe lababefe tinhlangotsi nalababechuta nabo baphiliswa. 8Kwaba nekutfokota lokukhulu kulelo dolobha.
9Kulelo dolobha kwakukhona indvodza leyayinguSimoni, lobesanesikhatsi lesidze amangalisa emaSamariya ngemilingo yakhe. Abetigabatisa ngekutsi ungumuntfu lomkhulu kabi. 10Bonkhe bantfu, betinhlobo tonkhe, babembukisisa bese batsi: “Ungemandla ankulunkulu latiwa ngekutsi: ‘Ngemandla Lamakhulu.’ ”
11Abesabamangalise ngemilingo yakhe sikhatsi lesidze kangangekutsi base bambukisisa. 12Kodvwa kwatsi nase bakholwa yinshumayelo yaFiliphu ngeliVangeli lembuso waNkulunkulu nangelibito laJesu Khristu, babhajatiswa, labadvuna nalabasikati. 13NaSimoni matfupha wakholwa; emvakwekubhajatiswa kwakhe wahlala njalo asedvute kwaFiliphu, wamangala nakabona letimanga letinkhulu kanye netibonakaliso labetenta.
14Baphostoli eJerusalema beva kutsi bantfu baseSamariya balemukele livi laNkulunkulu; ngako batfumela boPhetro naJohane kubo. 15Nase befikile, bawathandazela emakholwa kutsi emukele Moya Longcwele. 16Phela Moya Longcwele abesengakehleli nome kumunye nje wabo; bebabhajatiselwe egameni leNkhosi Jesu kuphela. 17Ngako boPhetro naJohane babeka tandla etikwabo, base bemukela Moya Longcwele.
18Watsi Simoni nakabona kutsi Moya bamemukele ngekubekwa tandla baphostoli, wakhipha imali afuna kuyinika boPhetro naJohane, 19watsi: “Nami nginikeni lamandla, kuze kutsi nami lowo lengibeka tandla etikwakhe emukele Moya Longcwele.”
20Kodvwa Phetro waphendvula watsi: “Wena nemali yakho hamba uyekufa; ucabanga kutsi ungatsenga sipho saNkulunkulu ngemali? 21Awunasabelo nalifa kulomsebenti, ngobe inhlitiyo yakho ayikalungi emehlweni aNkulunkulu. 22Ngako, phendvuka kulelichinga lakho lelibi, uthandaze eNkhosini kutsi ikutsetselele ngekucabanga intfo lembi kangaka. 23Ingani ngiyabona kutsi ugcwele umona, kantsi usiboshwa sesono.”
24Simoni watsi kuPhetro naJohane: “Ngiyacela kutsi ningithandazele eNkhosini, khona tingetikwenteka kimi letintfo lenitishoko.”
25Emvakwekufakaza nekushumayela livi leNkhosi boPhetro naJohane babuyela eJerusalema, bahamba bashumayela liVangeli emitini leminyenti yaseSamariya.
Kuphendvuka kwesiphatsimandla saseTopiya
26Ingilosi yeNkhosi yakhuluma kuFiliphu yatsi: “Tilungiselele kuya endleleni leseNingizimu lesuka eJerusalema yehlele eGaza.” (Lendlela ilihlane).
27Wasukuma, wahamba. Bheka, wabona umTopiya labengumtsenwa, asiphatsimandla saKhandase, indlovukazi yaseTopiya, abebalulekile futsi angumgcinisikhwama sendlovukazi; abephuma eJerusalema kuyawudvumisa Nkulunkulu, 28asabuyela ekhaya agibele inkalishi abefundza encwadzini yemphrofethi Isaya. 29Moya Longcwele watsi kuFiliphu: “Sondzela kulenkalishi uhambe eceleni kwayo!” 30Nangempela Filiphu wagijima wasondzela, weva umTopiya afundza incwadzi yemphrofethi Isaya, wase uyabuta Filiphu utsi: “Uyakuva yini loku lokufundzako?”
31Waphendvula watsi: “Ngingeva kanjani kute longichazelako nje?”
Wase ucela yena Filiphu kutsi agibele ahlale eceleni kwakhe. 32Abefundza indzawana emBhalweni lapho kutsi:
“Njengemvu ilandzelwe kuyawuhlatjwa,
nome lizinyane lemvu
embikwemhhuli walo lithulile,
akazange awuvule umlomo wakhe.
33Wedzelelwa, wehlulelwa ngalokungemtsetfo.
Ngubani longachaza imphandze yakhe?
Akashiyanga namliba,
ngobe imphilo yakhe yesuswa emhlabeni.”
34Siphatsimandla satsi kuFiliphu: “Ngiyakubuta ngitsi: Abekhuluma ngabani lomphrofethi la, abetisho yena yini, nome abekhuluma ngalomunye umuntfu?”
35Filiphu wakhuluma nalesiphatsimandla, wacala ngalendzawana emBhalweni asitjela liVangeli ngaJesu. 36Basachubeka nendlela yabo befika lapho kunemanti khona siphatsimandla satsi: “Ingani nankha emanti, kwalani kutsi ngibhajatiswe?” [ 37Filiphu watsi kuso: “Nawukholwa ngenhlitiyo yakho yonkhe, kungentiwa.” Saphendvula satsi: “Ngiyakholwa kutsi Jesu Khristu yiNdvodzana yaNkulunkulu.”]
38Wase utsi akumiswe inkalishi yakhe, behla bobabili, baya emantini, siphatsimandla naFiliphu, wase uyasibhabhatisa. 39Batsi kube baphume emantini, Moya weNkhosi watsatsa Filiphu, siphatsimandla asizange siphindze simbone, noko sachubeka neluhambo lwaso sesihamba sijabula.
40Kodvwa Filiphu wabonakala asase-Azothosi ahamba ashumayela liVangeli kuwo onkhe emadolobha, waze wefika naseKhesariya.
