Imisebenti yebaPhostoli 25

₁Emvakwemalanga lamatsatfu Festusi afikile kuleso sifundza, wesuka eKhesariya waya eJerusalema. ₂Baphristi labakhulu nebaholi bemaJuda bachazisisa kungevani kwabo naPawula; base bancenga Festusi ₃kutsi amane ababonelele ngekuletsa Pawula eJerusalema, ngobe phela base bente lisu lekumenta silo sengubo endleleni. ₄Festusi wabaphendvula watsi: “Pawula siboshwa lesiseKhesariya, nami ngitawuncandzeka masinyane ngiye khona. ₅Ngako-ke nangabe kukhona emacala lenimbeka wona, khululani tiphatsimandla tenu ngihambe nato.”

₆Festusi wahlala nabo emalanga lasiphohlongo nome lalishumi, wase wehlela eKhesariya. Ngakusasa wahlala esihlalweni sakhe sekwehlulela, wase utfumela kutsi akuletfwe Pawula. ₇Watsi kube Pawula angene, lamaJuda bekete naye esuka eJerusalema amkaka ngala nangala, ambeka emacala lamanyenti nalamabi, labehluleka nekubeka bufakazi bawo. ₈Kodvwa Pawula wativikela ngekutsi: “Kute lengikonile lokuphambene nemtsetfo wemaJuda, nome nelithempeli, nome naKhesari.”

₉Festusi afuna kujabulisa emaJuda wabuta Pawula watsi: “Ungatsandza yini kuya eJerusalema kuyewutekwa lamacala labakubeke wona la embikwami?”

₁₀Kodvwa Pawula watsi: “Ngime embikwesihlalo sekwehlulela saKhesari, uMbusi, ngulapho-ke lakufanele licala lami litsetfwe khona. Kute lengiwone ngako emaJuda, njengobe nawe ukwati nje loko. ₁₁Nangabe kukhona lapho ngephule khona umtsetfo, ngenta lokufanele kutsi ngijeziswe ngekufa, angiceli kuphepha ekufeni; kodvwa nalingekho liciniso kulamacala labangibeka wona, kute umuntfu lofanele kunginikela etandleni tabo. Ngicela kuyakwembula ingubo kuKhesari, uMbusi.” ₁₂Festusi wase ufakana imilomo nebeluleki bakhe uphendvula Pawula utsi: “Sewucele kutsi lelicala lendluliselwe kuKhesari, ngako-ke utawuvele uhambe uye kuKhesari.”

₁₃Emvakwemalanga inkhosi Agripha naBhenise bavakashela eKhesariya ngenjongo yekwemukela Festusi. ₁₄Kulawo malanga basahleti lapho, Festusi wase utekela inkhosi ngalendzaba yaPawula utsi: “Kukhona indvodza lesiboshwa lesashiywa nguFeliksi; ₁₅nangiya eJerusalema, baphristi labakhulu bemaJuda netibondza tenkholo yabo bambeka emacala lamanyenti, bangicele nekutsi ngimehlulele ngekumlahla ngelicala. ₁₆Ngabaphendvula ngekutsi akusiwo umtsetfo wetfu tsine maRoma kutsi silahle umuntfu ngelicala, angakalitfoli litfuba lekubhekana nebamangaleli bakhe buso nebuso atiphendvulele ngaloko labambeka ngako licala. ₁₇Batsi kube befike bahlangane lapha, angizange ngicitse sikhatsi, kodvwa kwatsi kusa ngakusasa ngavele ngahlala esihlalweni sekwehlulela, ngatfumela kutsi ayiletfwe lendvodza. ₁₈Bamangaleli bakhe abambekanga emacala langako ebugelekece, njengobe ngangibhekile.

₁₉“Kodvwa basuke baphikisana naye ngenkholo yabo nangendvodza letsite lenguJesu lese yafa, lacinisa ngayo Pawula kutsi iyaphila. ₂₀Ngadzidzeka nje kutsi ngingayihlolisisa kanjani lendzaba yakhe, ngako-ke ngase ngibuta yena kutsi angatsandza yini kuya eJerusalema kuyewutekwa lamacala akhe khona. ₂₁Kodvwa Pawula wacela kutsi lokutekwa kwelicala lakhe akwendluliselwe ku-Agustusi, uMbusi, lofanele alijube; ngase ngitjela emasotja kutsi amgadze, kuze kufike sikhatsi sekumetfula kuKhesari.”

₂₂Agripha watsi kuFestusi: “Ngifuna kutivela nayikhuluma lendvodza.”

Festusi waphendvula watsi: “Utamuva kusasa.”

₂₃Ngakusasa bo-Agripha naBhenise beta ngekuhlonipheka lokukhulu, bafike bangena ehholweni lenkhulu yekuhlangana bahamba nabokhenela bemphi kanye nemadvodza labebalulekile kulelo dolobha. Festusi wase utfumela emasotja kutsi alandze Pawula.

₂₄Festusi wase utsi: “Nkhosi Agripha kanye nani nonkhe lenikhona lapha kanye natsi, ngiyo-ke lendvodza lesengemukele tikhalo ngayo kuwo onkhe emaJuda lalapha naseJerusalema; bakhala ngekutsi kufanele iye entsanjeni. ₂₅Kodvwa mine ngekwami kute lokubi lengitfole kutsi ikwentile lokungayenta ize ijeziswe ngentsambo. Kodvwa njengobe yona icele kutsi ilendlulisele ku-Agustusi, nami-ke sengincume kuyitfumela kuye. ₂₆Kodvwa kute lokumcoka lenginako lengingahle ngikubhalele uMbusi ngayo. Ngiko nje ngiyiletse la embikwenu, ikakhulu kuwe, Nkhosi Agripha, khona litawutsi lingahlolwa lelicala layo nami ngibe nako lengingakubhala. ₂₇Ngobe ngibona shangatsi kungaba bulima kimi kutsi ngingatfumela siboshwa kuye ngingachazi kutsi cala lini lesibekwe lona.”