Imisebenti yebaPhostoli 12

₁Ngalesikhatsi Herodi, inkhosi, wacala kutingela nekuhlupha emalunga elibandla. ₂Wabulala Jakobe, umnakaboJohane, ngenkemba.

₃Watsi nakabona kutsi emaJuda ayakujabulela loko lakwentako, wachubekela nasekubopheni Phetro. Loko kwenteka ngesikhatsi seSidlo Sesinkhwa Lesingenambiliso. ₄Watsi kube ambambe wamfaka ejele lapho aniketwa etigabeni letine temasotja lamane sigaba sisinye, letatimlindza ngekuntjintjana. Herode abehlose kutsi amletse embikwemaJuda emvakweliPhasika. ₅Ngako-ke Phetro walondvolotwa ejele, kodvwa libandla belithandaza limncusela kuNkulunkulu.

₆Ngebusuku bekugcina Herodi atamkhipha amletse ebantfwini, Phetro abelele emkhatsini webalindzi lababili. Abeboshwe ngetinketane letimbili, kwakunebalindzi lapho emnyango welijele balindzile.

₇Masinyane kwefika ingilosi yeNkhosi, kwakhanya ngekhatsi ejele. Lengilosi yanyikinyisa Phetro ngelihlombe, yamvusa yatsi: “Phangisa! Vuka!”

Khona lapho tinketane tadzilika etandleni takhe. ₈Ingilosi yase itsi kuye: “Tibophe ngelibhande, ufake tincabule takho.” Wakwenta loko Phetro, ingilosi yatsi: “Yembatsa ingubo yakho ungilandzele!”

₉Phetro waphuma ejele wayilandzela. Noko akatanga kutsi loku lokwentiwa yingilosi kwenteka ngempela yini; wacabanga kutsi ubona umbono. ₁₀Bendlula balindzi bekucala, nebesibili, befika kubekugcina esangweni lensimbi lelivulekela edolobheni, lativulekela. Baphumela ngephandle. Bahamba bengca sitaladi saba sinye, khona lapho ingilosi yamshiya Phetro. ₁₁Kwangukhona kumkhanyela Phetro kutsi bekwentekani kuye, wase utsi: “Manje sengiyati kutsi kuliciniso kutsi iNkhosi itfumele ingilosi, yangikhulula emandleni aHerodi nakuko konkhe emaJuda abebheke kutsi kutangehlela.”

₁₂Watsi nabona loko, wahamba waya ekhaya laMariya, unina waJohane Makho. Bantfu labanyenti bebabutsene lapho bathandaza. ₁₃Phetro wanconcotsa emnyango; Roda, intfombatana leyayisisebenti, weta kutamvulela. ₁₄Waliva livi laPhetro wajabula kakhulu, wagijima wabuyela emuva angakawuvuli umnyango. Wefika wabatjela kutsi nguPhetro lome ngephandle. ₁₅Batsi kuye: “Uyahlanya!”

Kepha wacinisa watsi kuliciniso. Base baphendvula batsi: “Yingilosi yakhe.”

₁₆Phetro abeseloku anconcotsa. Batsi bavula umnyango bambona Phetro, bamangala. ₁₇Waphakamisa sandla sakhe wababindzisa, wabachazela kutsi iNkhosi imkhulule njani ejele.

Watsi kubo: “Nibotjela Jakobe nebazalwane.” Wase uyabashiya uya encenye.

₁₈Ekuseni kwesuka lesikhulu sidvumo kubalindzi kutsi ushonephi Phetro. ₁₉Herodi watfumela kutsi afunwe, kepha abazange bamtfole. Ngako-ke wabita balindzi wababutisisa, wase utsi ababulawe.

Emvakwaloko Herodi wehlela eKhesariya aphuma eJudiya, wahlala sikhatsi khona.

₂₀Wabatfukutselela kakhulu Herodi bantfu baseThire naseSidoni; ngako-ke baya kanyekanye bayawubonana naye. Kwekucala bavumelana naBlastusi, labengumgcini wesigodlo. Baya kuHerodi bayawucela kuthula, ngobe live labo lalitfola kudla eveni lakhe. ₂₁Ngelilanga lelalikhetsekile Herodi wembatsa tingubo takhe tebukhosi, wahlala esihlalweni sebukhosi, wabeka inkhulumo kubantfu. ₂₂Bamemeta batsi: “Akusiye umuntfu lona lokhulumako, kepha ngunkulunkulu.”

₂₃Khona lapho ingilosi yeNkhosi yashaya Herodi, ngobe abengamniki Nkulunkulu ludvumo. Wadliwa tibungu waze wafa.

₂₄Livi leNkhosi lachubeka landza. ₂₅Bhanabasi naSawula bacedza umsebenti wabo babuyela eJerusalema, bahamba kanye naJohane Makho.