2 kuThimothi 3

₁Khumbula naku: Emalangeni ekugcina kuyawufika tikhatsi letimatima. ₂Bantfu bayawutitsandza, batsandze imali, batigcabhe, batigabatise, balulate Nkulunkulu ngenhlamba. Bayawuba ngulabangalaleli batali babo, bangabongi, babete bungcwele, ₃babete lutsandvo, bangatsetselelani. Bayawuba tinyoka, bangatitsibi, babe nebulwane, batondze lokuhle, ₄batsengise ngalabanye bantfu, babe nemawala, bakhukhumukiswe kutatisa, batsandze kutijabulisa kunekutsi babe ngulabatsandza Nkulunkulu. ₅Bayawuba nesimo sekumesaba Nkulunkulu, kodvwa babe bawaphika emandla ako; labo-ke ubakhweshele. ₆Ngobe emkhatsini wabo laba kukhona labakhokhobela kungena etindlini talabasikati lababutsakatsaka ngekusindvwa tono tabo, baholwa tinkhanuko letimihibahiba. ₇Laba labasikati bafundza njalonjalo, kodvwa bangeke befike ekulatini liciniso. ₈Njengobe boJanesi naJambresi bamelana naMosi, nabo-ke labantfu bamelene neliciniso, babantfu labanengcondvo leyonakele netehluleki ekukholweni. ₉Kodvwa bangeke bafike ndzawo; ngobe bulima babo butakwembuleka kubo bonkhe bantfu, njengebulima balabo bobabili.

₁₀Kodvwa wena ungilandzele kunaku: esifundzisweni, nasekutiphatseni, nasemgomeni, nasekukholweni, nasekubeketeleni, naselutsandvweni, nasekubambeleleni, ₁₁nasekutingelweni, nasekuhluphekeni lokwangehlela e-Antiyokhi, nase-Ikhoniyumi, naseListra; ngacinisela kuko konkhe lokutingelwa, futsi iNkhosi yangikhulula kuko konkhe. ₁₂Yebo, bonkhe labafisa kuphila ngekukholwa nguKhristu Jesu bayawutingelwa bahlushwe, ₁₃kepha lababi nebakhohlisi bayawudlanga ngebubi, bedukise, nabo bedukiswe. ₁₄Kodvwa wena chubeka kuloko lokufundzile wakukholwa, wati kutsi ukufundze kubobani, ₁₅nekutsi kusukela ebuntfwaneni bakho wayati imiBhalo lengcwele lenemandla ekuhlakaniphisa kube kusindziswa ngekukholwa nguKhristu Jesu. ₁₆Yonkhe imiBhalo iphefumulelwe nguNkulunkulu; ilungele kufundzisa, nekusola, nekucondzisa, nekuyala ngekulunga, ₁₇kuze umuntfu waNkulunkulu atewuhlonyiswa alungele kwenta wonkhe umsebenti lomuhle lamiselwe wona.