2 kubaseThesalonika 2

₁Bazalwane, macondzana nekubuya kweNkhosi yetfu Jesu Khristu nekuhlangana kwetfu kuye sinincenga, ₂kutsi ningasheshi nidvungeke engcondvweni yenu, ningetfuswa ngumoya nome ngemavi, nome yincwadzi lekungatsi iphuma kitsi. Konkhe loku kunganetfusi kutsi lilanga leNkhosi selifikile. ₃Ningayengwa ngumuntfu nome ngani, ngobe lelo langa lingeke lifike kungakefiki kuhlubuka lokukhulu kucala, kwembulwe umuntfu longenamtsetfo, indvodzana yekubhujiswa. ₄Lowo uyakuhlala aphika atiphakamise ngetulu kwako konkhe lokubitwa ngaNkulunkulu nome lokukhontwako, kuze atewuhlala endzaweni lengcwele yaNkulunkulu, atigabatise yena ngekutsi unguNkulunkulu.

₅Anisakhumbuli yini kutsi ngesikhatsi ngisenani nganitjela ngaletintfo? ₆Nani niyati kutsi usabanjwe yini kwanyalo, kuze kufike leso sikhatsi lesamiswa kutsi embulwe. ₇Ngobe emandla ekubate umtsetfo asacalile kusebenta ngendlela lefihlakele, intfo nje lona losavimbile kwamanje utawuchubeka ente njalo, adzimate asuswe, ₈bese-ke lowo longenamtsetfo uyembulwa; Jesu iNkhosi uyawumbhubhisa ngemoya wemlomo wakhe, amcedze ngekubonakala kwenkhatimulo yekufika kwakhe. ₉Kufika kwalongenamtsetfo ngumsebenti waSathane. Uyawufika anawo onkhe emandla, netibonakaliso, netimangaliso letingemanga, ₁₀nayo yonkhe inkhohliso yekwedukisa lababhubhako, ngobe abazange balitsandze liciniso laKhristu labebangasindziswa ngalo. ₁₁Ngako-ke Nkulunkulu ubatfumelela emandla enkhohlakalo, kuze bakholwe loko lokungemanga. ₁₂Ngako-ke bonkhe labo labangazange balikholwe liciniso, kodvwa baba nenjabulo kuloko lokungakalungi, bayakwehlulelwa ngekulahlwa.

₁₃Kodvwa tsine simelwe kutsi sibonge Nkulunkulu njalo ngani, bazalwane labatsandvwe yiNkhosi, ngobe Nkulunkulu wanikhetsela kutsi nibe bekucala ensindzisweni ngekuhlantwa nguMoya, nangekukholwa liciniso. ₁₄Yena wanibitela kuko ngeliVangeli letfu, kuze nibe nesabelo ebukhosini beNkhosi yetfu Jesu Khristu. ₁₅Ngako-ke, bazalwane, manini nicine, nibambelele kulawo maciniso lesanifundzisa wona ngemavi emlomo nangencwadzi yetfu.

₁₆Shangatsi Jesu Khristu iNkhosi yetfu matfupha, naNkulunkulu, longuBabe lowasitsandza, kwatsi ngemusa wakhe wasikhutsata ngendvudvuto yaphakadze, wasipha nelitsemba lelihle, ₁₇angadvudvuta tinhlitiyo tenu, anakhele kuyo yonkhe imisebenti lemihle nakuwo onkhe emavi lamahle.