2 kubaseKorinthe 3

₁Sesiphindze siyatincoma yini? Siyatidzinga yini tsine tincwadzi tekusincoma letiya kini nome letiphuma kini, njengobe labanye batidzinga? Cha! ₂Nine niyincwadzi yetfu, lebhalwe etinhlitiyweni tetfu, leyatiwa ifundvwe bantfu bonkhe. ₃Kuyakhanya kutsi niyincwadzi yaKhristu leletfwe ngitsi, lengakabhalwa ngenki, kepha ngaMoya Longcwele, waNkulunkulu lophilako, hhayi etibhelekeceni tematje kepha etinhlitiyweni tebantfu.

₄Loko sikusho ngobe setsembele kuNkulunkulu ngaKhristu. ₅Akusho noko kwekutsi sinemandla ekwenta lutfo ngekwetfu; kute lokuphuma kitsi, kepha emandla etfu avela kuNkulunkulu, ₆lowasenta safaneleka kuba baphatsi besivumelwane lesisha, lesingesiso semtsetfo lobhaliwe, kodvwa saMoya; umtsetfo lobhaliwe uyabulala, kodvwa Moya uyaphilisa.

₇Inkonzo yemtsetfo lobhalwe etibhelekeceni tematje igcine iletse kufa noko yeta ngeludvumo, kangangekutsi baka-Israyeli abazange bakhone kubuka buso baMosi ngenca yenkhatimulo yayo, nome yabuye yaphela. ₈Iyawuba yinkhulu kangakanani-ke leyo nkhatimulo yenkonzo yaMoya? ₉Nangabe inkonzo yemtsetfo leletsa kulahlwa yefika nenkhatimulo lengaka, iyawuba yinkhulu kangakanani-ke inkhatimulo yalenkonzo lesenta silungelane naNkulunkulu? ₁₀Nangempela loko lokwase kwefika ngenkhatimulo seyakulahlekela, sekuvulele litfuba kuloko lokunenkhatimulo lenkhulu kuneyako. ₁₁Ngobe nangabe loko lobekutawuphela kwaba neyako inkhatimulo, iyawuba yinkhulu kangakanani-ke inkhatimulo yaloko lokungayikuphela?

₁₂Ngulelo litsemba letfu, ngiko nje sikhuluma ngesibindzi. ₁₃Tsine asifanani naMosi yena lowambonya buso bakhe ngendvwangu kuze baka-Israyeli bangetiwusibona siphetfo saleyo nkhatimulo lebeyitawuphela. ₁₄Kodvwa ingcondvo yabo yaba lukhuni, ngisho nalamuhla loku nakufundvwa sivumelwane lesidzala, leyo ndvwangu isehleti; nanyalo ayikembulwa, ngobe yembuleka ngaKhristu kuphela. ₁₅Yebo, kudzimate kube ngulamuhla, nakufundvwa tincwadzi taMosi, kuba shangatsi kukhona indvwangu lembonye tingcondvo tabo, baka-Israyeli. ₁₆Kodvwa “umuntfu nakaphendvukela kuNkulunkulu, indvwangu iyesuswa.” ₁₇INkhosi inguye Moya, lapho akhona Moya nenkhululeko ikhona. ₁₈Ngako tsine sonkhe lesibuka ngebuso lobembuliwe, inkhatimulo yeNkhosi ibonakala kitsi njengasesibukweni, sibe siguculwa sibe njengaye ngekusuka ezingeni lelitsite lenkhatimulo siye kulelinye lizinga. Ngulowo-ke umsebenti weNkhosi lenguMoya.