2 Tikhronike 30

₁Hezekiya watfumela livi kulo lonkhe laka-Israyeli, nelakaJuda, waphindze wabhala tincwadzi atibhalela baka-Efrayimu nebakaManase, abamema kutsi bete ethempelini laSimakadze eJerusalema kutawugubha liPhasika kuSimakadze, Nkulunkulu wema-Israyeli. ₂Inkhosi netiphatsimandla tayo kanye nalo lonkhe libandla laseJerusalema bancuma kugubha liPhasika enyangeni yesibili. ₃Babehlulekile kuligubha ngetikhatsi talo ngembili kwaloko, ngobe babengakeneli baphristi lababetingcwelisile, kantsi nebantfu babesengakahlangani ndzawonye eJerusalema. ₄Lelicebo labonakala lilihle enkhosini nakulo lonkhe libandla. ₅Bancuma kutfumela lesimemetelo kulo lonkhe laka-Israyeli, kusukela eBherisheba kuye kulakaDani, kumenywa bonkhe bantfu kutsi bete eJerusalema kutawugubha liPhasika kuSimakadze, Nkulunkulu wema-Israyeli. Lalingazange like ligujwe bantfu labanyenti kangaka ngembili njengobe kwakubhaliwe.

₆Inkhosi yakhipha tigijimi, talihamba lonkhe laka-Israyeli nelakaJuda tiphetse tincwadzi letatiphuma kuyo nakutiphatsimandla tayo, letatitsi:

“Sive sonkhe saka-Israyeli, buyelani kuSimakadze Nkulunkulu wa-Abrahama, na-Isaka, na-Israyeli, khona atewubuyela kini, nine lenisele ngekuphunyula esandleni semakhosi ase-Asiriya. ₇Ningalingisi boyihlo nabomnakenu, labangazange betsembeke kuSimakadze, Nkulunkulu waboyisemkhulu, ngenca yaloko wabenta baba yinkoyoyo yekuhlupheka, njengobe nibona nje. ₈Ningabi netinhloko letilukhuni njengaboyihlo, kodvwa titfobeni kuSimakadze. Wotani endzaweni lengcwele, layingcwelise kuze kube phakadze. Khontani Simakadze Nkulunkulu wenu, khona intfukutselo yakhe leyesabekako ingetikunehlela. ₉Nanibuyela kuSimakadze, labomnakenu nebantfwabenu batawutfola sihawu kulabatfumbi babo, bese babuya kulelive, ngobe Simakadze Nkulunkulu wenu unemusa nebubele. Angeke anifulatsele, nanibuyela kuye.”

₁₀Tigijimi taphuma tangena kuwo onkhe emadolobha aka-Efrayimu, newakaManase, kuze kuyewufika kulakaZebuloni, kodvwa sive sasiteya sihlekise ngato. ₁₁Noko, lamanye emadvodza aka-Asheri, newakaManase, newakaZebuloni atitfoba aya eJerusalema. ₁₂NakaJuda sandla saNkulunkulu sasisetikwebantfu kutsi sibanike bunye bengcondvo ekwenteni loko inkhosi netiphatsimandla tayo babetsite akwentiwe, ngekulandzela livi laSimakadze.

₁₃Kwahlangana lesikhulu sicumbi sebantfu eJerusalema kutawugubha uMkhosi Wesinkhwa Lesingenambiliso enyangeni yesibili. ₁₄Besusa emalati eJerusalema, besusa emalati emphepho bawajikijela eSigodzini saseKhidroni.

₁₅Bahlaba lizinyane lemvu leliPhasika mhlazana tili-14 enyangeni yesibili. Baphristi nemaLevi baba nemahloni, base bayatingcwelisa bona cobo lwabo, baletsa iminikelo yekushiswa ethempelini laSimakadze. ₁₆Batsatsa tindzawo tabo, njengobe kubhaliwe encwadzini yemtsetfo waMosi, umuntfu waNkulunkulu. Baphristi bafafata ingati lababenikwe yona ngemaLevi. ₁₇Njengobe linyenti lebantfu lababekulesicumbi babengatingcwelisi bona, emaLevi kwawabita kutsi ahlabe emazinyane etimvu eliPhasika egameni labo bonkhe lababengcolile ngekwemtsetfo, aze abangcwelisele lamazinyane etimvu kuSimakadze. ₁₈Nome linyenti lalabantfu lababephuma kulaka-Efrayimu, nelakaManase, nelaka-Isakhari kanye nelakaZebuloni babengakatihlanti bona cobo lwabo, noko balidla liPhasika, lokwakuphambene naloko lokubhaliwe. Kodvwa Hezekiya wabathandazela watsi: “Shangatsi Simakadze lomuhle angabatsetselela bonkhe ₁₉labo labatimisele ngenhlitiyo yabo kufuna Nkulunkulu, Simakadze Nkulunkulu waboyisemkhulu, nome bangakahlanteki njengekusho kwemtsetfo wendzawo lengcwele.” ₂₀Simakadze wawuva lomthandazo waHezekiya, wase uyasiphilisa sive.

₂₁Ema-Israyeli labekhona eJerusalema awugubha uMkhosi weSinkhwa Lesingenambiliso kwaze kwaphela emalanga lasikhombisa kunekujabula lokukhulu, ngesikhatsi emaLevi nebaphristi bona babehlabela kuSimakadze onkhe lawo malanga, basekelwa tingubhu taSimakadze tekudvumisa.

₂₂Hezekiya wakhuluma awakhutsata onkhe emaLevi labekhombisa kuyicondza kahle lenkonzo yaSimakadze.

Onkhe lamalanga lasikhombisa babedla leso sabelo sabo banikela ngeminikelo yebudlelwane, badvumisa Simakadze Nkulunkulu waboyise.

₂₃Lonkhe lelo bandla lavuma kutsi liwugubhe lomkhosi emalanga lasikhombisa ngetulu; ngako baphindze bawugubha ngekujabula lomkhosi emalanga lasikhombisa ngetulu. ₂₄Hezekiya, inkhosi yakaJuda, waletsa kulelibandla tinkunzi letiyinkhulungwane, netimvu netimbuti letiti-7 000, kwase kutsi letiphatsimandla tona taletsa tinkunzi letiyinkhulungwane netimvu netimbuti letiti-10 000. Baphristi labanyenti base batingcwelisa bona matfupha. ₂₅Lonkhe lelo bandla lakaJuda lajabula kakhulu likanye nebaphristi nemaLevi kanye nawo onkhe ema-Israyeli ndzawonye nebetive lababephuma kulo lonkhe laka-Israyeli nelakaJuda. ₂₆Kwaba nekujabula lokukhulu eJerusalema, ngobe kusukela etikhatsini taSolomoni, umsa waDavide, inkhosi yaka-Israyeli, kwakungazange kube khona lokufanana naloko eJerusalema. ₂₇Baphristi nemaLevi bema babusisa sonkhe sive, naNkulunkulu wabeva, ngobe umthandazo wabo wafinyelela ezulwini, endzaweni yakhe lengcwele lahlala kuyo.