2 Tikhronike 29

₁Hezekiya abeneminyaka lengema-25 budzala, nakabekwa kuba yinkhosi, wabusela eJerusalema iminyaka lengema-29. Libito lenina bekungu-Abiya, indvodzakati yaZakhariya. ₂Hezekiya wenta lokuhle emehlweni aSimakadze, wenta njengobe kwakwenta uyisemkhulu Davide.

₃Ngenyanga yekucala emnyakeni wekucala wekubusa kwakhe, wavula iminyango yelithempeli laSimakadze, wayakha kabusha. ₄Wangenisa baphristi nemaLevi, wabahlanganisela ebaleni ngasemphumalanga, ₅watsi: “MaLevi, lalelani lapha kimi! Tingcweliseni nyalo, bese ningcwelisa nelithempeli laSimakadze, Nkulunkulu waboyihlomkhulu. Susani konkhe lokungcolile endzaweni lengcwele. ₆Bobabe bebangaketsembeki; benta lokubi emehlweni aSimakadze Nkulunkulu wetfu, bamfulatsela. Besusa buso babo endzaweni lapho kuhlala khona Simakadze, bamfulatsela. ₇Baphindze bavala neminyango yemhubhe, bacisha netibane. Abazange bayishise imphepho nome bente umnikelo wekushiswa endzaweni lengcwele kuNkulunkulu wema-Israyeli. ₈Ngako-ke intfukutselo yaSimakadze seyehlele etikwaJuda naseJerusalema; sewubente baba sesabiso, nentfo yekutfutfumelisa kanye neyekuhlekisa, njengobe nibona nje nani ngemehlo enu. ₉Nguko nje bobabe betfu, sebabulawe ngenkemba, nekutsi nemadvodzana etfu, nemadvodzakati etfu, nebafati betfu sebatfunjiwe.

₁₀“Manje sengitimisele kwenta sivumelwane naSimakadze Nkulunkulu wema-Israyeli, kuze kutsi intfukutselo yakhe leyesabekako itewusuka lapha kitsi. ₁₁Madvodzana ami, ningacali nibe ngulabanganaki nyalo, ngobe Simakadze unikhetsile kutsi nime embikwakhe nimsebentele, nimkhonte nishise nemphepho embikwakhe.”

₁₂LamaLevi avele atihlela angena emsebentini:

₁₅Lamadvodza atsi kube ahlanganise ndzawonye bomnakabo atingcwelisa, ase ayangena ayawuhlambulula lithempeli laSimakadze, njengobe inkhosi yayiyalile, ngekulandzela livi laSimakadze. ₁₆Baphristi bangena endzaweni lengcwele yaSimakadze bayakuyihlambulula. Bakhiphela ngephandle esibuyeni selithempeli laSimakadze konkhe lokwakungcolile ngekwemtsetfo labakukhandza ngekhatsi ethempelini laSimakadze. EmaLevi akutsatsa akwetfwala akumikisa eSigodzini saseKhidroni.

₁₇Bacala kulingcwelisa ngelilanga lekucala enyangeni yekucala, kwatsi ngelilanga lesiphohlongo laleyo nyanga befikela emhubheni waSimakadze. Kwaphindze kwaba ngemalanga lasiphohlongo ngetulu seloku bangcwelisa lithempeli laSimakadze cobo lwalo, konkhe loko bakucedzela ngelilanga leli-16 kuleyo nyanga yekucala.

₁₈Base bangena ngekhatsi enkhosini Hezekiya, bafike babika batsi: “Silingcwelise lonkhe lithempeli laSimakadze, nelilati lemnikelo wekushiswa, nato tonkhe titja talo, nelitafula lekubeka sinkhwa lesingcwele, nato tonkhe timphahla letihambisana nalo. ₁₉Sesitilungise satingcwelisa tonkhe timphahla inkhosi Ahazi latikhipha ngenca yekungetsembeki kwakhe ngesikhatsi aseyinkhosi. Kwamanje nje setisembikwelilati laSimakadze.”

₂₀Ekuseni ngeluvivi ngakusasa inkhosi Hezekiya yahlanganisa tonkhe tindvuna telidolobha, yakhuphukela nato ethempelini laSimakadze. ₂₁Taletsa tinkunzi letisikhombisa, netihhanca letisikhombisa, nemazinyane etimvu lamadvuna lasikhombisa, netiphongo letisikhombisa, kutsi kube ngumnikelo wesono sembuso wonkhe, newendzawo lengcwele kanye newaJuda. Inkhosi yayala baphristi lababetitukulwane ta-Aroni, kutsi banikele konkhe loku elatini laSimakadze. ₂₂Ngako bahlaba letinkunzi, kwase kutsi baphristi batsatsa lengati banyenyeta ngayo etikwelilati; emvakwaloko bahlaba letihhanca, base banyenyeta ngalengati yato etikwelilati; baphindze bahlaba lamazinyane etimvu, base banyenyeta ngalengati yawo etikwelilati. ₂₃Letimbuti temnikelo wesono taletfwa embikwenkhosi nalo lonkhe libandla, base babeka tandla tabo etikwato. ₂₄Baphristi base bahlaba letimbuti banikela ngengati yato etikwelilati, kutsi kube ngumnikelo wesono kutsi batekwenta inhlawulo yekubuyisana egameni lebaka-Israyeli bonkhe, ngobe inkhosi yase ivele iyalile kutsi kwentiwe umnikelo wekushiswa newesono wema-Israyeli onkhe.

₂₅Wemisa emaLevi ethempelini laSimakadze aphetse emasimbali, nemahabhu, nemalire ngayo yona leyo ndlela leyayimiswe nguDavide naGadi, umboniswa wenkhosi, kanye naNathani, umphrofethi. Loko bekungumyalo lowetfulwa nguSimakadze ngebaphrofethi bakhe. ₂₆Ngako emaLevi ema asatilungiselele aphetse tingubhu taDavide kanye nebaphristi nabo sebaphetse emacilongo abo.

₂₇Hezekiya wakhipha umyalo kutsi kwentiwe umnikelo wekushiswa etikwelilati. Kwatsi kusacala umnikelo, nekuhlabelela Simakadze kwacala kuhambisana nekushaywa kwemacilongo netingubhu taDavide, inkhosi yaka-Israyeli. ₂₈Lonkhe libandla lakhonta ngekukhotsama, bahlabeli basahlabela nebashayi bemacilongo basawashaya. Konkhe loku kwachubeka kwaze kwaphela umnikelo wekushiswa.

₂₉Yatsi kube iminikelo iphele, inkhosi nabo bonkhe lababenayo baguca phansi bakhonta. ₃₀Inkhosi Hezekiya kanye netiphatsimandla takhe bayala emaLevi kutsi advumise Simakadze ngemavi aDavide kanye newa-Asafa, umboniswa. Ngako bahlabela tingoma tekudvumisa bajabulile, bakhotsamisa tinhloko tabo bakhonta.

₃₁Hezekiya wakhuluma, watsi: “Nyalo senitinikele nine matfupha kuSimakadze. Wotani niletse imihlatjelo kanye neminikelo yekubonga niyiletse ethempelini laSimakadze.” Ngako lonkhe libandla laletsa imihlatjelo kanye neminikelo yekubonga, kwase kutsi bonkhe lababenetinhlitiyo letivumako baletsa iminikelo yekushiswa.

₃₂Linani leminikelo yekushiswa leyaletfwa libandla laba tinkunzi letingema-70, netihhanca letilikhulu, nemazinyane etimvu lamadvuna langema-200; konkhe loku kwaba ngumnikelo wekushiswa kuSimakadze. ₃₃Letilwane letehlukaniselwa umhlatjelo kwaba tinkunzi letingema-600, netimvu netimbuti letiti-3 000. ₃₄Noko baphristi babembalwa kakhulu kutsi bahlinze yonkhe leyo minikelo yekushiswa; ngako tihlobo tabo lekwakungemaLevi tabasita, kwaze kwaphela lowo msebenti, kwaze nalaba labanye baphristi nabo bangcweliswa, ngobe emaLevi abekucilikele kutingcwelisa wona matfupha kwendlula baphristi. ₃₅Iminikelo yayiminyenti kakhulu, ikanye nemafutsa eminikelo yebudlelwane, neminikelo yesinatfo leyayihambisana neminikelo yekushiswa.

Ngako inkonzo yekukhonta ethempelini laSimakadze yavuseleleka. ₃₆Hezekiya nabo bonkhe bantfu bakujabulela loko Nkulunkulu labesakwentele sive sakhe, ngobe kwenteka masinyane.