2 Tikhronike 27

₁Jothamu abeneminyaka lengema-25 budzala, ngesikhatsi acala kubusa. Wabusela eJerusalema iminyaka leli-16. Libito lenina bekunguJerusha, indvodzakati yaSadoki. ₂Jothamu wenta lokuhle emehlweni aSimakadze, njengobe uyise Uziya ebentile, kodvwa yena akazange ashise imphepho ethempelini laSimakadze. Noko bantfu bachubeka ngetindlela tabo temonakalo.

₃Jothamu wakha kabusha LiSango Lelingenhla lasethempelini laSimakadze, waphindze wenta umsebenti lomkhulu elubondzeni egcumeni i-Ofeli. ₄Wakha emadolobha emagcumeni akaJuda, kwatsi tinqaba nemibhoshongo wakwakha etindzaweni letatinemahlatsi.

₅Jothamu wahlasela inkhosi yema-Amoni, wayehlula. Kuwona lowo mnyaka ema-Amoni etfula kuye isiliva leyayingemakhilogremu labengaba ti-3 400, nakolo labengemathani labengaba yinkhulungwane, nebhali leyayingemathani labengaba yinkhulungwane. Ema-Amoni loku akwetfula kuye nasemnyakeni wesibili newesitsatfu.

₆Jothamu wakhula waba nemandla, ngobe abehamba ngekwetsembeka embikwaSimakadze Nkulunkulu wakhe.

₇Leminye imininingwane ngekubusa kwaJothamu, tonkhe timphi takhe kanye nalokunye lakwenta kubhaliwe encwadzini yemilandvo yemakhosi aka-Israyeli newakaJuda. ₈Abeneminyaka lengema-25 budzala, nakabekwa kuba yinkhosi, wabusela eJerusalema iminyaka leli-16. ₉Jothamu wase uyakhotsama, wafihlwa eDolobheni laDavide. Ahazi, umsa wakhe, waba yinkhosi esikhundleni sakhe.