2 Tikhronike 19

₁Watsi kube Jehoshafati, inkhosi yakaJuda, ancandzeke aphephile, nakefika esigodlweni sakhe eJerusalema, ₂Jehu, umboniswa, umsa waHanani, waphuma wafike wakhuluma enkhosini, watsi: “Wena ukubona kulungile yini kutsi usite lababi nekutsi utsandze labo labatondza Simakadze? Ngenca yaleso sento sakho intfukutselo yaSimakadze isetikwakho. ₃Kodvwa nome kunjalo, kukhona lokuhle kuwe, ngobe utisusile tinsika ta-Ashera kulelive, watimisela enhlitiyweni yakho kufuna Nkulunkulu.”

₄Nome Jehoshafati abehlala eJerusalema, kodvwa abevame kuhambahamba emkhatsini webantfu kusuka eBherisheba eningizimu, kuye etintsabeni telive laka-Efrayimu enyakatfo, ayewukhutsata bantfu kutsi babuyele kuSimakadze Nkulunkulu wabokhokho babo. ₅Wabeka behluleli eveni lonkhe kuwo onkhe emadolobha latinqaba akaJuda, ₆wabayala watsi: “Lenikwentako nibokucabangisisa, ngobe lomsebenti wekwehlulela leniwentako aniwenteli umuntfu kodvwa nentela Simakadze, lonani ngaso sonkhe sikhatsi nanikhipha sigwebo. ₇Ngako yesabani Simakadze, nehlulele ngekunakekela lokukhulu, ngobe Simakadze Nkulunkulu wetfu akanako kungalungi, akakhetsi muntfu, futsi akadizelwa.”

₈Ngisho naseJerusalema Jehoshafati wabeka lamanye emaLevi, nebaphristi kanye nebaholi bemindeni yaka-Israyeli kutsi basebentise umtsetfo waSimakadze nekutsi balamule imibango yalababehlala khona eJerusalema. ₉Wabanika umyalo watsi: “Lomsebenti wenu kufanele niwente ngekwesaba Simakadze, konkhe lenikwentako nikwente ngekwetsembeka nangenhlitiyo yenu yonkhe. ₁₀Kulelo nalelo cala leliletfwe kini liphuma kusakhamuti salamadolobha, nome ngabe lekucitsa ingati nome ngabe lekwephula umtsetfo, nemiyalo kanye netimiso, kufanele nibeluleke kutsi bangoni kuSimakadze; ngaphandle kwaloko intfukutselo yaSimakadze itakwehlela kini nakubomnakenu. Nibokwenta loko, khona ningetikona.

₁₁“Amariya, umPhristi Lomkhulu, nguye lotanengamela nonkhe kunome yini lephatselene naSimakadze, bese kutsi Zebadiya, umsa wa-Ishmayeli, umholi wesive sakaJuda, anengamele kunome yini lemacondzana nenkhosi. EmaLevi wona umsebenti wawo kutakuba kubukisisa kufezeka kwetincumo tonkhe. Banini nesibindzi, shangatsi naSimakadze angaba nalabo labenta lokuhle.”