Baka-Israyeli bavukela Rehobowamu
1Rehobowamu waya eShekhemu, lapho onkhe ema-Israyeli abebutsene khona ayekumbeka inkhosi. 2Kwatsi kube Jerobowamu, umsa waNebati, akuve loko, aseseGibhithe, lapho abebalekele khona, abalekele Solomoni, wabuya esuka eGibhithe. 3Ngako kwabe sekulandvwa Jerobowamu, yena kanye naso sonkhe sive sema-Israyeli baya kuRehobowamu, befika kuye batsi: 4“Uyihlo abesetfwese lijoko lelimatima kakhulu, manje-ke wena sinciphisele lomtfwalo lomatima nalelijoko lelimatima labelibeke etikwetfu; tsine sitakukhonta.”
5Rehobowamu wabaphendvula watsi: “Nibobuya lapha kimi emvakwemalanga lamatsatfu.” Ngako-ke sive sesuka sahamba.
6Inkhosi Rehobowamu yahamba yayawutsatsisa kubantfu labadzala lababekadze basebenta neyise Solomoni aseyinkhosi, yafike yabuta yatsi: “Nine ningangeluleka kutsi ngibaphendvule ngitsini labantfu?”
7Laba labadzala bamphendvula batsi: “Nangabe wena utawuba nemusa kulabantfu, ubajabulise, ubanike imphendvulo labayifunako, bayawuhlala batisebenti takho.”
8Kodvwa Rehobowamu wasilahla leseluleko salabantfu labadzala lababemeluleke ngaso, wahamba wayawubuta kulabasha, bontsanga yakhe, lababetinceku takhe. 9Wababuta watsi: “Nine-ke sitsini senu seluleko? Singabaphendvula sitsini labantfu labatsi kimi: ‘Cekisa lelijoko lesaletfweswa nguyihlo’?”
10Lamajaha labebontsanga yakhe amphendvula atsi: “Khuluma kulabantfu labatsite kuwe: ‘Uyihlo wasetfwesa umtfwalo losindzako, kodvwa wena wente ube lula,’ batjele utsi: ‘Cikilicane wami mukhulu kunelukhalo lwababe. 11Babe wanetfwesa lijoko lelimatima, mine-ke ngitalenta libe matima kakhulu. Babe abenibhacabula ngetiswebhu, mine-ke ngitanibhacabula ngetiswebhu letinetipikili.’ ”
12Kwaphela emalanga lamatsatfu, Jerobowamu nesive sonkhe babuyela kuRehobowamu, njengobe phela inkhosi beyishito kutsi babobuya emvakwemalanga lamatsatfu. 13Inkhosi yabaphendvula ngelulaka, yalahla leseluleko salabadzala, 14yalandzela seluleko sabontsanga yayo, yatsi: “Babe wanetfwesa umtfwalo lowesindzako, mine-ke ngitawengeta, unisindze kakhulu kunakucala. Babe abenibhacabula ngetiswebhu; mine ngitanibhacabula ngetiswebhu letinetipikili.” 15Ngako inkhosi ayizange isilalele sive, ngobe kwakuyintsandvo yaNkulunkulu kutsi kwenteke ngalendlela, kuze kugcwaliseke livi laSimakadze labelikhulume kuJerobowamu, umsa waNebati, nga-Ahiya waseShilo.
16Sonkhe sive sema-Israyeli satsi kube sibone kutsi inkhosi ayisilaleli sicelo saso, sakhuluma enkhosini satsi:
“Sinabudlelwane buni naDavide?
Sinasabelo sini nemsa waJese?
Emathendeni enu, ma-Israyeli!
Tibone kucedza, wena muti waDavide!”
Ngako ema-Israyeli esuka onkhe atibuyelela emathendeni awo. 17Kodvwa Rehobowamu wachubeka wabusa etikwawo onkhe lawo ma-Israyeli labehlala emadolobheni akaJuda.
18Inkhosi Rehobowamu watfumela Adoniramu labeyindvuna yalababentiswa imisebenti lematima, kodvwa ema-Israyeli amtselekela, amgcoba ngematje, waze wafa. Noko inkhosi Rehobowamu yaphumelela kugibela encoleni yayo yemphi, yabaleka yacondza eJerusalema. 19Ngako ema-Israyeli solomane yesuka ngalelo langa alwisana nendlu yakaDavide kuze kube ngulamuhla.
