1 kubaseThesalonika 3

₁Ngako-ke, sesehlulekile kubeketelela situnge senu, sase sikhetsa kusala sodvwana e-Athene; ₂sase sinitfumelela Thimothi, umzalwane wetfu, lesibambisene naye emsebentini waNkulunkulu wekushumayela liVangeli laKhristu. Samtfumela kutsi atenicinisa anikhutsate ekukholweni kwenu, ₃kuze kutsi kubete namunye wenu lohlubukako ngenca yekutanyatanyiswa nguletinhlupheko. Nine ngekwenu niyati kutsi simiselwe loko, ₄ngobe ngesikhatsi sisenani, sanitjela kucala kutsi sitakuhlushwa; njengobe sekwentekile nje, nani senati. ₅Ngako-ke ngitsite kube ngehluleke kubeketelela situnge ngani, ngase ngitfumela Thimothi, khona ngitekwati ngekukholwa kwenu. Bengesaba kutsi kungahle kube umlingi unilingile, kuze kutsi kusiphalata kwetfu kube lite.

₆Kodvwa nyalo, Thimothi sewubuyile kitsi wasiletsela netindzaba letimnandzi ngekukholwa nangelutsandvo lwenu. Usitjele nekutsi ngaso sonkhe sikhatsi ninenkhumbulo lenhle ngatsi, nekutsi nani nifisa kusibona, njengobe natsi sifisa kunibona. ₇Ngako-ke, bazalwane, nome sasiselusizini nasenhluphekweni, kodvwa sefika sadvudvuteka ngani ngekukholwa kwenu. ₈Ngobe nyalo siyaphila, nanime nicinile eNkhosini. ₉Kepha Nkulunkulu singambonga kanjani ngani, simbonge ngako konkhe kujabula lesinako ngani? ₁₀Sincusa busuku nemini ngayo yonkhe inhlitiyo yetfu kutsi simane sibonane nani buso nebuso, khona sitenengetela kuloko lokusilele ekukholweni kwenu.

₁₁Shangatsi Nkulunkulu, longuBabe wetfu, yena matfupha neNkhosi yetfu Jesu angacondzisa indlela yetfu kini. ₁₂Shangatsi iNkhosi inganandzisa inikhulise naselutsandvweni lomunye kulomunye nakubo bonkhe bantfu, njengobe nelwetfu lunjalo kini, ₁₃kuze kutsi icinise tinhlitiyo tenu tingabi nacala, kodvwa tibe ngcwele ebukhoneni baNkulunkulu, longuBabe, nakufika iNkhosi yetfu Jesu nabo bonkhe labangcwele bakhe.