1 Emakhosi 7

₁Solomoni kwamtsatsa iminyaka leli-13 kutsi acedze kwakha sigodlo sakhe. ₂Wakha indlu lekwakutsiwa Lihlatsi laseLebanoni. Yayingemamitha labengaba ngema-46 budze, nemamitha labengaba ngema-23 bubanti, nemamitha labengaba li-13 nesigamu kuphakama. Yayinetinhlu letintsatfu tetinsika nemishayo yemsedari leyayisetikwato. ₃Yayifulelwe ngemsedari ngetulu kwalemishayo leyayisetikwaletinhlu letintsatfu, imishayo leli-15 luhlu lulunye; setitonkhe letinhlu kwaba ngimishayo lengema-45. ₄Emafasitelo ayo bekakhiwe etulu, akhiwe ngamatsatfu abukene. ₅Onkhe emasango ayo abakhiwe amacalamane; labengembili, nawo akhiwe angamatsatfu abukene.

₆Wakha indlu yetinsika leyayingemamitha labengaba ngema-23 budze, nemamitha labengaba li-13 nesigamu bubanti. Embikwayo bekunemhubhe lowawunetinsika letatimise vulande.

₇Wakha inkhundla yesihlalo sebukhosi, lapho abetakwehlulelela khona emacala, wayimbonya ngemsedari kusukela phansi esiyilweni kuyawufika etulu eluphahleni.

₈Kwatsi sigodlo sakhe lapho abetawuhlala khona wasakha bucadlwana ngemuva, naso sasifanana nalenkhundla yesihlalo sebukhosi ngekuma kwaso. Solomoni waphindze wakha lesinye sigodlo lesifanana naleso, wasakhela inkhosikati yakhe, uLaFaro.

₉Tonkhe letakhiwo kusukela ngephandle kuze kuyewungena ngekhatsi esibuyeni lesikhulu, kusukela esisekelweni kuye engcongwaneni yeluphahla tatakhiwe ngematje elicophelo leliphakeme, ematje lacoshwe ngabolonina nangebunchakidze lobukhulu, ancolwe ngelisaha ngekhatsi nangephandle. ₁₀Tisekelo tato tatendlalwe ngematje lamakhulu elikhetselo, lamanye angemamitha labengaba mane nesigamu, lamanye angemamitha labengaba matsatfu nesigamu budze. ₁₁Etulu kwakungematje elicophelo leliphakeme, ancolwe ngabolonina; kwakunemishayo yemisedari. ₁₂Sibuya lesikhulu sasitungeletwe lubondza lolwalunemitsandvo lemitsatfu yematje lalolongiwe kanye nemtsandvo munye wetingodvo temsedari letijutjwe kahle, njengeyesibuya sangekhatsi ethempelini laSimakadze nemhubhe walo.

₁₃Solomoni watfumela eThire kutsi kulandvwe khona Huramu, ₁₄labetalwa ngulomunye umfelokati wesive sakaNaftali; uyise bekuyindvodza yaseThire, ingcweti kutelitfusi. Huramu-ke abenelikhono futsi anelwati lolubanti kuto tonkhe tekubumba ngelitfusi. Weta kaSolomoni inkhosi, wafike wenta yonkhe imisebenti labetfunywe kutsi ayente.

₁₅Wagcumeka tinsika letimbili telitfusi, iyinye yayingemamitha labengaba siphohlongo budze, nemamitha labengaba sihlanu nesigamu bucinsi bayo ngentsambo yekulinganisa. ₁₆Wase wakha netingcongwane letimbili taletinsika telitfusi, watibeka etikwetinhloko taletinsika; iyinye ingcongwane yayingemamitha labengaba mabili nesigamu kuphakama. ₁₇Wenta siviliya setinketane letincane letephotselwe kahle titsandzelwe kuletingcongwane taletinsika, ingcongwane yinye inaletisikhombisa. ₁₈Wakha nemahananandza, aba tinhlu letimbili letitungelete siviliya ngasinye ahlobisa letingcongwane letisetinhloko taletinsika. Watentela njalo tonkhe letinsika.

₁₉Letingcongwane letatisetinhloko taletinsika temhubhe tatibukeka njengetimbali tesiganga ngesimo, tatingemamitha labengaba mabili kuphakama. ₂₀Kuto totimbili letingcongwane taletinsika, ngetulu kwencenye leyayisasitja, eceleni kwaletiviliya bekunemahananadza langema-200 latinhlu letitungeletile. ₂₁Wembela tinsika ekungeneni kwemhubhe welithempeli. Kwatsi insika lengaseningizimu wayetsa libito watsi yiJakhini, lena lengasenyakatfo watsi yiBowazi. ₂₂Letingcongwane ngesimo sekubukeka kwato tatinjengetimbali tesiganga. Waphela kanjalo-ke umsebenti wekumiswa kwetinsika.

₂₃Huramu wakha libhavu ngelitfusi lelalincibilikisiwe, laba yindingilizi lengemamitha labengaba mane nesigamu bubanti, nemamitha labengaba mabili nesigamu kuphakama. Kwakuyintsambo lengemamitha labengaba li-13 nesigamu nalitungeletiswa. ₂₄Ngephansi kwalomngcengcema walo belitungeletwe tigubhu temaselwa, tilishumi ebangeni lelingaba sigamu selimitha. Letigubhu tatentiwe tinhlu letimbili elucetwini lulunye lwalelibhavu lelitfusi.

₂₅Lelibhavu lalisime etikwetinkunzi telitfusi letili-12: tintsatfu tato tibheke ngasenyakatfo, tintsatfu tibheke ngasenshonalanga, tintsatfu tibheke ngasemphumalanga, tintsatfu tibheke ngaseningizimu. Lelibhavu lalitinte etikwetibunu taletinkunzi, lingemuva lato lalibheke ekhatsi nendzawo. ₂₆Lalingangemphama yesandla bucinsi balo, umngcengcema walo wawunjengewenkomishi, nanjengembali lechakazile. Lalingetfwala emalitha labengaba ti-40 000.

₂₇Huramu wakha netincodlana telitfusi letatilishumi, iyinye yayingemamitha labengaba mabili budze, nemamitha labengaba mabili bubanti, nelimitha linye nesigamu kuphakama. ₂₈Tatakhiwe ngemaphanela elitfusi latikwele emkhatsini wemafulemu. ₂₉Kulamaphanela elitfusi bekunemabhubesi netinkunzi kanye nemakherubhi, kwakwentiwe njalo-ke nakulamafulemu latinsika. Ngetulu nangaphansi kwalamabhubesi netinkunzi, bekulenga imihlobiso legcotjiwe yetimbali. ₃₀Nguleyo naleyo ncodlana yayinemasondvo lamane nema-asi elitfusi; iyinye yayinemgezelo lowawusime ngetisimiso letimbili ngala nangale, letisimiso tatihlotjiswe ngetimbali. ₃₁Lingekhatsi lalencodlana lalisiyingiliti. Lalingacishe libe sigamu selimitha kuphakama. Laliyindingilizi, ekugcineni kwalo lalingacishe libe yimitha bubanti. Emlonyeni walo bekunemihlobiso lefacatiwe. Lamaphanela aletincodlana abesikwele, angesiyo indingilizi. ₃₂Lamasondvo lamane abengaphansi kwalamaphanela, lama-asi alamasondvo abehlanganiswe naletincodlana. Bubanti belisondvo lilinye bebungaba limitha linye. ₃₃Lamasondvo abakhiwe njengemasondvo encola; ema-asi, nemarimu, netipoko kanye netinkhaba temasondvo, konkhe kwakwakhiwe ngelitfusi lebelincibikilisiwe.

₃₄Iyinye incodlana yayinetibambo letine, sibambo sisinye ekoneni linye, siphumile ekoneni lalencodlana. ₃₅Etulu kwalencodlana kwakunelibhande lelitfusi lelaliyitungeleta, lalingaba yincenye yesine yelimitha kuphakama. Lelibhande lalihlanganiswe nguletisimiso nalamaphanela alo kuletincodlana. ₃₆Wahlobisa ngekucopha imifanekiso yemakherubhi, neyemabhubesi, neyetihlahla temasundvu, lapho bekunesikhala khona kuletisimiso nemaphanela, wahlobisa yonkhe indzawo. ₃₇Watakha kanjalo-ke letincodlana letilishumi. Tatibunjwe ngemfolomu yinye, tonkhe tifanana ncamashi ngebukhulu nangesimo.

₃₈Huramu wase wakha imigezelo lelishumi yelitfusi, umunye wawungetfwala emalitha labengaba ngema-800. Bubanti wawungemamitha labengaba mabili. Umunye umgezelo wawutawufakwa kuyinye yaletincodlana letilishumi. ₃₉Letisihlanu watibeka ngaseningizimu yelithempeli, letisihlanu watibeka ngasenyakatfo. Wabeka lelibhavu ngaseningizimu, ekoneni lelingaseningizimu nangasemphumalanga yelithempeli.

₄₀Huramu wakha emabhodo, nemafosholo, netitja tekunyenyeta. Wawucedzela-ke wonkhe umsebenti labewusukele, awentela inkhosi Solomoni ethempelini laSimakadze:

Tonkhe-ke letintfo letentiwa nguHuramu, atakhela inkhosi Solomoni entela lithempeli laSimakadze, tatakhiwe ngelitfusi lelicwebetelako. ₄₆Inkhosi yentelwa tonkhe letintfo ngetimfolomu telibumba etsafeni laseJordane emkhatsini weSukhothi neSarethani. ₄₇Solomoni akazange atikale tonkhe letintfo, ngobe tatitinyenti kakhulu; sisindvo salelitfusi naso sasingakakalwa.

₄₈Solomoni wabuye wenta tonkhe timphahla letatilapho ethempelini laSimakadze:

₅₁Kwatsi nase kuphele wonkhe umsebenti inkhosi Solomoni labewentele lithempeli laSimakadze, wase ungenisa ngekhatsi tonkhe tintfo letatinikelwe nguyise, Davide. Bekuyisiliva, negolide, nato tonkhe timphahla. Wakubeka konkhe endlini yengcebo ethempelini laSimakadze.