SAKARIEA 11

₄Morena Molimo oa ka, o bua tjena: “Alosa mohlape o tla hlajoa. ₅Ba o rekang baa o hlaba, ebe ba re ha ba na molato. Ba o rekisang, bona ba re: ‘Ho bokoe Morena, joale re barui!’ Balisa ba oona le bona ha ba o qenehele. ₆Nke ke ka hlola ke hauhela baahi ba lefatše,” ho rialo Morena. “Ke tla neelana ka e mong le e mong ho ea ahisaneng le eena, le ho khosi ea hae. Ha naha e hatakeloa, ha nka ke ka e namolela matsohong a bona.”

₇Kahoo ke ile ka alosa mohlape o tla hlajoa, haholo-holo o neng o tlatlapuoa. Ka nka melamu e 'meli: O mong ka re ke Mohau, o mong ka re ke Kutloano; eaba ke alosa mohlape joalo. ₈Ka khoeli e le 'ngoe ka bolaea balisa ba bararo, hobane ba ne ba ntenne, ba se ba ntlhoile. ₉Eaba ke bua ho mohlape, ke re: “Ha nka ke ka hlola ke le alosa. Tse tlamehang ho shoa li shoe; tse timetsoang li timetsoe; tse salang tsona li jane.”

₁₀Eaba ke nka molamu oa ka o bitsoang Mohau, ke o roba likoto tse peli; ka mokhoa o joalo ka felisa selekane seo Morena a neng a se entse le lichaba tsohle. ₁₁Sa felisoa hona mohl'a tsatsi leo, 'me bahoebi ba neng ba ntalimile ba utloisisa hore tsena tsohle ke tse builoeng ke Morena.

₁₂Eaba ke re ho bona: “Haeba le bona ho lokile, ntefeng moputso oa ka; ho seng joalo le itjelle oona.” Eaba ba ntefa moputso oa lichelete tsa silefera tse mashome a mararo.

₁₃Morena a bua ho 'na, a re: “Li akhelle sebōpi sa lipitsa!” Ka nka lichelete tseo tsa silefera tse mashome a mararo, e leng moputso o moholo, oo ba neng ba re oa ntokela, ka li akhella sebōpi sa lipitsa ka Tempeleng ea Morena.

₁₄Joale ka roba molamu oa ka oa bobeli, o bitsoang Kutloano; ka mokhoa o joalo ka felisa selekane se pakeng tsa Juda le Iseraele.

₁₅Eaba Morena o re ho 'na: “U boele u nke melangoana ea molisa ea sethoto. ₁₆Ke tla boela ke bea molisa e mong naheng ena. Eena ha a ka ke a tsotella tse lahlehileng, kapa a batla likonyana, kapa a phekola tse robehileng, kapa a fepa tse phelang hantle. O tla itjella linku tse nonneng, a b'a kōkōne le likhōlana tsa tsona.