SOLOMONE 5

₁Mohlang oo motho ea lokileng, a

tletse tšepo,

o tla ema ka pele ho bao

ba ileng ba mo hlorisa,

'me ba talima mekhathala ea hae

e se letho.

₂Ha ba 'mona,

ba tla thothomela ke tšabo,

'me ba tla hlolloa

hore na o pholohile joang.

₃Joale ka masoabi ba tla bolellana,

ba ntse ba lumaela 'me ba hemesela,

ba re:

₄“Motho eno ke eane

eo re ileng ra mo tšeha,

booatleng ba rona ra mo etsa sesomo.

Ra sheba bophelo ba hae

e le bohlanya,

le lefu la hae e le le sa hlompheheng.

₅Ho tla ka'ng hore a baloe

har'a bana ba Molimo,

'me a be le tulo har'a bahalaleli?

₆Joale, ke rona ba khelohileng

tsela ea 'nete;

leseli la ho loka

ha lea ka la re khantšetsa,

'me letsatsi ha lea ka la re chabela.

₇Re 'nile ra lelera tseleng

tsa bokhopo le timelo,

ra hahola mahoatata a se nang litsela,

'me 'mila oa Morena oona

ha rea ka ra o tseba.

₈Boikakaso ba rona

bo bile le thuso efe?

Re fumane molemo ofe

boithorisong ka maruo a rona?

₉Tseo tsohle li fetile joaloka seriti,

le joaloka molaetsa o fetisoang

ka potlako.

₁₀“Tsohle li ka sekepe se sesang

har'a maqhubu a leoatle,

se sa siee mohlala

oa moo se fetileng teng,

mpa ea sona e sa siee

le motoa metsing.

₁₁Hape li ka nonyana e fofang moeeng,

e sa siee letho le bontšang

moo e fetileng teng.

Ka masiba a eona e fohla moea

o mosesanyane,

e kaletse har'a oona ka ho o fehla

ka sekhahla sa mapheo;

empa kamorao ha ho fumanehe

pontšo ea ho feta ha eona.

₁₂Hape-hape tsohle li ka motsu

o betsetsoang tekeleng,

o phetle moea 'me oona o khutlele

malulong hang-hang,

'me ha ho mang ea ka supang

moo motsu o fetileng teng.

₁₃Ho joalo le ho rona:

motsotsonyana re hlahile,

rea shoa;

empa re sitoa ho bontša mohlala

oa bokhabane,

re qetiloe ke bokhopo.”

₁₄Efela tšepo ea ba se nang Molimo

e ka 'moko o fefoloang ke moea,

e ka lekoeba la leoatle le bululoang

ke sefefo,

e ka mosi o qhaloang ke moea;

kapa e nyamela joaloka khopolo

ea sefahleho sa moeti

oa letsatsi le le leng.

₁₅Empa ba lokileng ba phela

ka ho sa eeng kae,

moputso oa bona ba o fumana

ho Morena,

Ea holimo-limo oa ba baballa.

₁₆Ka hona ba tla abeloa khanya

ea borena,

Morena o tla ba roesa moqhaka

o motle-motle.

O tla ba haeletsa ka letsoho la hae

le letona,

a ba sireletse ka seatla sa hae.

₁₇Morena o tla apara

seaparo sa hae sa ntoa

e leng boiphetetso ba hae,

'me a hlomelle libopuoa tsohle

ho fenya lira tsa hae.

₁₈Ho loka e tla ba

sesireletso sa hae sa sefuba,

toka e se nang boikaketsi

e be helmete ea hae;

₁₉khalalelo e sa hloloeng ke letho

e tla ba thebe ea hae.

₂₀Khalefo ea hae e sa phokoeng

o tla e leotsa ho ba sabole,

'me libopuoa tsohle li tla mo tlatsa

ho loantša ba itlhantšang.

₂₁'Mane oa lehalima o tla tsoa marung,

o tobe tekeleng, joaloka motsu

o sa foseng o tsoang seqheng;

₂₂'me sefako se linaka

se tla ruthutha ka bohale,

eka se betsoa ke letjeketjane.

Maoatle a tla phuthumetseha

holim'a ba khopo,

'me moroallo oa linoka o ba khame

ho se mohau.

₂₃Moea o matlahali o tla ba puputlela,

sefefo se ba bulule joaloka matlakala.

Bokhopo bo tla fetola

lefatše lohle lefeella,

ho etsa bobe ho tla ketola

literone tsa babusi.