Boinahano bo khopo
1Khopolong e fosahetseng ea bona,
ba khopo bao ba itse:
“Bophelo ba rona bo bokhutšoanyane
'me bo tletse masoabi;
ha qetello ea bona e fihla,
ha ho pheko.
Ha ho le ea mong ea tsejoang
a kile a khutla Qalong ea bafu.
2Re ile ra belehoa ka tšohanyetso,
'me ka morao ho moo ho tla ba
joaloka hoja re sa ka ra tsoaloa.
Phefumoloho ea rona ke mosi
o kubellang,
kelello ea rona ke tlhase
e tsoang pelong e otlang.
3Ha tlhase eo e tima, 'mele oa rona
o tla fetoha molora,
'me phefumoloho ea rona
e nyamelle moeeng.
4Ka mora' nako mabitso a rona
a tla lebaloa,
'me ha ho sa tla ba le ea hopolang
mesebetsi ea rona.
Bophelo ba rona bo tla feta
joaloka melatsitsi ea maru,
bo nyamele joaloka mouoane,
o qhaloang ke mahlaseli a letsatsi,
o hloloang ke mocheso oa lona.
5Nako ea rona lefatšeng
e joaloka seriti se fetang,
letsatsi la ho shoa ha rona
ha le ka ke la thisa;
le beiloe, 'me ha ho mang kapa mang
ea ka khutlang.
6“Tloong joale, re ithabise
ka lintho tse ntle tse teng,
re sebelise tse bopiloeng
ka cheseho ea bocha.
7A re ikhotsofatseng ka liveine
le linoko tsa chelete,
re sa fete palesa leha e le 'ngoe
ea nako ea selemo.
8A re ithoeseng mefapahlooho ea
lirosa li e-s'o pone.
9Ho se be le ea mong ea sieo
monyakeng oa rona,
kae le kae re siee lipontšo
tsa boithabiso ba rona,
hobane hona ke seabo
le kabelo ea rona.
10“A re hatelleng mofutsana
ea lokileng,
re se hauhele mohlolohali,
'me re se hlomphe moriri o moputsoa.
11Likhoka tsa rona li ke li fetohe
molao le toka,
hobane bofokoli bo ipontša e se letho.
12A re lalleng ea lokileng,
hobane oa re tsietsa.
o bile o hanyetsana le liketso tsa rona,
o re khalemella litlolo tsa Molao,
'me o re qosa ka ho koenehela
koetliso ea habo rona.
13O ipolelisa ka hore o tseba Molimo,
'me o ipitsa ngoana oa Morena.
14Re bona e le mohanyetsi
oa mehopolo ea rona;
ka ho 'mona feela rea nyekeloa.
15Bophelo ba hae ha bo tšoane
le ba batho,
o ikentse mokhelo ho bohle.
16O re talima re le batho ba fapaneng,
'me o re koekoetla
joaloka ntho e litšila.
O bolelisaka lehlohonolo la lefu
la ba lokileng,
'me o ithorisaka ka hore Molimo
ke ntat'ae.
17Butleng re bone hore na lipolelo
tsa hae li na le 'nete,
re tle re bone hore na o tla fella kae.
18Haeba ea lokileng ke mora
oa Molimo, eena o tla mo thusa,
a mo ephole matsohong a lira tsa hae.
19A re mo nonyeng ka mahlapa
le ka tlhokofatso,
hore re tle re ikholise
ka boiphapanyo ba hae,
'me re be le bopaki ba mamello ea hae.
20A re ke re mo ahloleleng
lefu le lihlong,
hobane o itse o tla ba le Mosireletsi.”
21Ba nahana joalo, empa ba fositse,
ba foufalitsoe ke bokhopo ba bona.
22Ha ba tsebe makunutu a Molimo,
ha ba tšepe hore batho ba halalelang
ba ka putsoa,
ha ba lumele hore meea e se nang koli
e ka tlotloa.
23Efela Molimo o bopetse motho
ho-se-shoe,
o mo entse setšoantšo
sa seo eena a leng sona.
24Ke ka mona oa diabolosi
lefu le keneng lefatšeng,
'me bao e leng ba hae
ke bona ba tla shoa.
