Leseli le khantšetsa Baiseraele
1Empa leseli le khanyang haholo
le ile la khantšetsa
bahalaleli ba hao,
'me lira tsa utloa mantsoe a bona,
empa li sa bone libopeho tsa bona.
Li ile tsa ba bitsa ba lehlohonolo,
hobane ba sa ka ba hlokofatsoa.
2Tsa ba leboha, hobane
ba sa ka ba iphetetsa ho tsona,
tse ileng tsa ba senyetsa,
'me tsa kopa tšoarelo ka baka la
lehloeo leo li bileng le lona.
3Bakeng sa lefifi, u ile ua fa
batho ba hao khanare ea mollo,
ho ba tataisa tseleng
eo ba neng ba sa e tsebe,
le ho ba chabela
joaloka letsatsi le monate
leetong la bona le tlotlehang.
4Ha e le lira tsa bona li ile tsa tšoanela
ho tingoa leseli la letsatsi
le ho kenngoa chankaneng ea lefifi,
hobane li ile tsa boloka
bara ba hao litlamong,
bao ka bona leseli le sa timeng
la Molao
le neng le loketse ho neoa lefatše.
Lefu la matsibolo a Baegepeta
5Ha lira li ne li rerile ho bolaea masea
a bahalaleli ba hao,
ngoana a le mong,
ea beiloeng phenyoleng, a pholosoa
Joale, ho li otla, ua li amoha
bana ba bangata-ngata,
'me ua li timetsa kaofela ha tsona
leoatleng le bilohang.
6Bosiu boo bo ne bo tsebisoe
bo-ntat'a rona e sa le pele,
e le hore, ka ho tseba seo
ba se tšepisitsoeng ka kano,
ba thabe ba sa tšohe letho.
7Pholoho ea ba lokileng
le timetso ea lira
li ne li lebeletsoe ke sechaba sa hao;
8hobane seo u otlileng ka sona
ba re loantšang,
u re tlotlisitse ka sona sena,
rona bao u ba bitsitseng.
9Ka sekhukhu, bahalaleli bao e leng
litloholo tsa ba lokileng,
ba ne ba nyehela mahlabelo;
ba ba ntsoe-leng ho etsa
kutloano e halalelang
ea hore bahalaleli ba arolelane
ka ho tšoana
tse molemo le tse kotsi;
'me ba ne ba se ba qalile ho bina
lifela tsa bo-ntat'a bona.
10Ho fapana le hona, ha utloahala sello
sa mantsoe a lobokaneng a lira,
'me molumo o hlomolang
oa ba neng ba llela bana ba bona
oa hasana le naha.
11Lekhoba le mong'a lona
ba ne ba otliloe ka mokhoa o tšoanang,
mofo le khosi ba ne ba lahlehetsoe
ka ho tšoana.
12Kaofela ha bona, ka mofuta o le
mong oa lefu,
ba ba le litopo tse se nang palo,
'me ba phelang ba haelloa ho ba pata;
hobane, ka nako le motsotso,
karolo ea bohlokoa ea bana ba bona
e ile ea timela.
13Batho bao, ka ho tšepa
maqheka a boloi,
ba neng ba sa kholoe litemoso,
ba lumela, ka ho bona
timelo ea matsibolo,
hore Iseraele ke mora oa Molimo.
14Eare ha tsohle li aparetsoe ke khutso
e tletseng khotso,
ka seroko sa bosiu bo fetang ka lebelo,
15Lentsoe le matla 'ohle la hao
la theoha
setulong sa borena, leholimong,
la tsubellela holim'a naha eo e soto,
joaloka mohlabani
ea sa qeneheleng letho,
16le tšoere sabole e bohale
ea taelo ea hao e sa fetoheng.
Eaba lea ema
'me la tlatsa lefu kahohle,
le thetsitse leholimo
le ntse le hatile fatše.
17Hang-hang lipono tse hlahang
litorong tse tšabehang
tsa khathatsa batho bao hampe,
'me tšabo e neng e sa lebelloa
ea ba oela.
18Ba tabana fatše, e mong mona
e mong mane, eka ba shoele,
'me ba totobatsa lebaka
la ho shoa ha bona;
19hobane litoro tse neng li ba tšoenya
li ile tsa ba tsebisa lona e sa le pele,
e le hore ba se ke ba timela
ba sa tsebe lebaka la kotlo ea bona.
Thapelo ea Arone ea pholosa Baiseraele lefung
20Lefu le ile la ama
le bona ba lokileng,
'me batho ba bangata-ngata
ba timela feelleng;
empa khalefo ea Molimo
ha ea ka ea nka nako e telele.
21Motho ea se nang koli
o ile a potlakela ho ba sireletsa,
a tšoere lihlomo tsa tšebeletso ea hae,
e leng thapelo le mokubetso
o lefellang sebe.
A tsitlella ho kokobetsa khalefo,
'me a felisa koluoa;
ka hona a paka hore ruri
e ne e le mohlanka oa hao.
22A hlola khalefo, e seng ka likhoka
kapa ka lihlomo,
empa ke ka lentsoe la hae
a ileng a phoka Mohlokofatsi,
ka ho ipiletsa ka lilekane
tse hlapanyelitsoeng bo-ntat'a rona.
23Ha batho ba se ba e-shoa qhobololo,
a kena lipakeng, a thibela khalefo,
'me a koala tsela ea eona
e eang ho ba phelang.
24Seaparong sa hae se selelele
ho ne ho e-na le setšoantšo
sa lefatše lohle.
'me mabitso a tlotlehang
a bo-ntata a ne a ngotsoe
meleng e mene ea majoe a bohlokoa,
le lebitso la botlotlehi ba hao
moqhakeng oo a o roetseng.
25Ha a bona tsena, Motimetsi a checha,
hobane a tšaba;
ka hona, tatso feela ea khalefo
e ne e lekane.
