SOLOMONE 1

₁Ratang toka, lona babusi ba lefatše,

le be le maikutlo a nepahetseng

ka Morena,

'me le mo batle

ka pelo e se nang mano;

₂hobane o fumanoa

ke ba sa mo lekeng,

'me o iponahatsa ho ba mo tšepang.

₃Mehopolo ea bolotsana

e arohanya batho le Molimo,

'me Ea matla 'ohle ha a lekoa

ke litlaopa, oa li hlahatsa.

₄Bohlale bo ke ke ba kena moeeng

o khomaretseng bokhopo,

leha e le ho aha 'meleng

o ineetseng sebe.

₅Moea o halalelang oa thupelo

o nena mano,

o qoaea mehopolo ea booatla,

'me o khopisoa ke liketso

tse se nang toka.

₆Bohlale ke moea o lerato ho bohle,

empa bo ke ke ba leballa monyefoli

mahlapa a hae;

hobane Molimo o bona ka pelong

ea motho,

o tsebisisa se ka sefubeng sa hae,

'me o utloa lentsoe ka leng la hae.

₇Erekaha moea oa Morena

o tletse lefatše lohle,

'me kaha e le oona

o kopanyang tsohle,

o tseba tsohle tse buuoang.

₈Ka baka leo ha ho motho

ea ka buang hampe a sa senolehe,

kapa a phonyoha kotlo ea toka.

₉Mehopolo ea motho ea se nang

Molimo e tla hlahlobisisoa,

'me molumo oa mantsoe a hae

o tla fihla ho Morena

ho mo ahlolela bokhopo ba hae.

₁₀Tsebe ea Morena e lethoethoe

e mamela tsohle,

leha u hoeshetsa joang kapa joang

e ntse e u utloa.

₁₁Ka hona qoba ho korotlela tlaase

ka mafeela-feelane,

phemisa leleme la hao lipelaelo,

hobane le tse buuoang sephiring

li tla bea litholoana tsa tsona,

'me molomo o leshano o bolaea moea.

₁₂U se ke ua imemela lefu

ka ho kheloha tsela,

se ipitsetse timelo ka liketso tsa hao.

₁₃Molimo ha aa ka a etsa lefu,

ha a thabele ho shoa ha tse phelang.

₁₄Empa o entse tsohle hore li be teng;

libopuoa tsohle tsa lefatše

li hloletsoe bophelo.

ha li na chefo e bolaeang ka ho tsona,

'me lefatše lena ha le tlas'a puso

ea Qalo ea bafu,

₁₅hobane ho loka

ha ho ka ke ha e-shoa.

₁₆Ba se nang Molimo ba hoehla lefu

ka letsoho le ka lentsoe;

kaha ba le rata joaloka motsoalle,

ba le hloloheloa,

'me ba hlaba selekane le lona,

hobane ba lokela ho ikabela lona.