Tobite o eletsa Tobiase mora oa hae
1Tsatsing lona leo, Tobite a hopola chelete eo a e siileng ha Gabaele, motseng oa Ragese e Media, 2a re ka pelong: “Ke 'na enoa, ke se ke ikopetse lefu. Pele ke e-shoa, na ke ne nke ke ka bitsa mor'a ka Tobiase, ke tl'o mo hlalosetsa tsa chelete eo?” 3Eaba o bitsa Tobiase, mora hae; 'me ha a fihla, a re ho eena: “Mohla ke shoang, u mpate ka tšoanelo. Hlompha 'm'ao, u se mo lahle matsatsing 'ohle a bophelo ba hae. Etsa se mo khahlisang, u pheme se ka utloisang pelo ea hae bohloko. 4Ngoan'a ka, se lebale mathata ao a fetileng har'a 'ona ha a n'a u jere popelong. Mohla a shoang, mo pate pel'a ka, bitleng le le leng. 5Se lebale Morena, ngoan'a ka, litšiu tsohle tsa hao. Se lakatse ho etsa sebe kapa ho tlola melao ea hae. Etsa tse lokileng matsatsi 'ohle a bophelo ba hao, se tsamaee tseleng tse fosahetseng. 6Ha u latela 'nete, u tla atleha mesebetsing eohle ea hao, joaloka bohle ba etsang tse lokileng.
7“Fana ka mpho tsa mohau ka karolo e 'ngoe ea tseo u li ruileng. U se ke ua furalla mang kapa mang ea futsanehileng; le Molimo a ke ke a u furalla. 8Fana ka mpho tsa mohau ka ho ea ka matla a hao. Ha u ruile haholo, u fane haholo. Ha u e-na le leruo le lennyane, u fane hannyane; empa u se ke ua tšaba ho etsa mpho tsa mohau. 9Ha u etsa joalo, u ipokellela letlotlo la bohlokoa bakeng sa letsatsi la tsietsi. 10Limpho tsa mohau li re pholosa lefung, 'me li re phemisa ho oela qalong ea mafifi. 11Mpho ea mohau ke nyehelo ea bohlokoa ho bohle ba fanang ka eona mahlong a Ea holimo-limo.
12“Ngoan'a ka, itlhokomele metsamaong e litšila. Nyala mosali oa lesika la heno. U se ke ua nyala mosali oa molichaba, eo e seng oa leloko la bo-ntat'ao, hobane re bana ba baporofeta. Hopola Nooe, Aborahama, Isaka le Jakobo, bao e leng bo-ntat'a rona ba khale-khale. Kaofela ha bona ba ile ba nyala basali ba leloko labo bona; ba hlohonolofala baneng ba bona 'me litloholo tsa bona li tla 'ne li rue lefatše. 13Le uena, ngoan'a ka, rata bana beno. Se ikhohomose ka pelong, se khese bana beno, e leng bara le barali ba sechaba sa heno, 'me se hane ho nyala mosali har'a bona. Boikhohomoso bo tsoala timelo le pherekano ea mefuta-futa. Botsoa bo tsoala bofuma le bohloki bo boholo; etsoe botsoa ke 'm'a tlala.
14“Se ipolokele moputso oa basebetsi ba hao ho fihlela letsatsi le hlahlamang; u mp'u ba lefe hang-hang. Ha u sebeletsa Molimo, u tla putsoa. U itlhokomele liketsong tsohle tsa hao, ngoan'a ka, u be le mekhoa e metle ka mehla. 15Se etse e mong seo le uena u sa se rateng. Se noe veine hoo u ka tahoang, se itloaetse bonyollo. 16Ngoathela ea lapileng; ea hlobotseng u mo fe tse ling tsa liaparo tsa hao. Thusa mafutsana ka tsohle tse u atelang; 'me u se ke ua sosobanya sefahleho ha u fana ka limpho tsa mohau. 17Fepa bang ka mofu ka tšoanelo, ha e le batho ba lokileng; baetsalibe, bona u ba time.
18“Kopa keletso ho motho ofe kapa ofe ea bohlale; se nyelise keletso e molemo. 19Boka Morena Molimo ka nako tsohle. Mo kope hore a otlolle litsela tsa hao, a atlehise merero le likhopolo tsa hao. Hase lichaba tsohle tse seli; empa Morena ke eena feela ea fanang ka tsohle tse molemo. Ka thato ea hae o phahamisa motho, kapa o mo kokobetsa ho isa tlase-tlase Qalong ea bafu. Joale, ngoan'a ka, se lebale litaelo tsena; li se hlakohe pelong ea hao.
20“Ngoan'a ka, ke qetella ka ho u tsebisa hore ke siile chelete e litalenta li leshome ha Gabaele, mor'a Gabari, motseng oa Ragese e Media. 21Se tšohe ngoan'a ka, ha e le moo re fetohile mafutsana. U na le monono o moholo ha u tšaba Molimo, u phema mefuta eohle ea sebe, 'me u etsa se lokileng mahlong a Morena Molimo oa hao.”
