TOBITE 2

₁Joale, tlas'a puso ea khosi Asare-Hadone, ke ile ka boela hae, 'me ka khutlisetsoa Anna mosali oa ka le Tobiase mora oa ka. Ka mokete oa rona oa Pentekonta, e leng mokete oa Libeke, ka pheheloa masutsa 'me ka lula ho ja. ₂Eare hoba lijo tsa mefuta-futa li beoe tafoleng ka pel'a ka, ka re ho mora oa ka Tobiase: “Ngoan'a ka, ak'u e'o batla, har'a bana babo rona ba kholehong mona Ninife, mofutsana ea sebeletsang Molimo ka pelo eohle ea hae. U mo tlise mona, re tl'o ja le eena. Ke tla emela ho fihlela u khutla, ngoan'a ka.”

₃Ke ha Tobiase a ea batla mofutsana e mong har'a bana babo rona; empa a khutla, a re: “Ntate!” Ka araba, ka re: “U re'ng ngoan'a ka?” A tsoela pele, a re: “Ntate, e mong oa sechaba sa habo rona o sa tsoa bolaoa; o fenethiloe 'me o akhetsoe lepatlelong; le joale o nts'a le hona teng.” ₄Ka raoha hang, ka siea lijo tsa ka ke e-s'o li thetse, ka tlosa mofu lepatlelong, ka 'mea ka kamoreng e 'ngoe ke emetse hore letsatsi le likele, ke tle ke mo pate. ₅Eaba ke khutlela ka tlung ho itlhatsoa, 'me ka qala ho ja lijo tsa ka ke saretsoe, ₆ke hopotse mantsoe ana a moporofeta Amose ha a bua ka Bethele, a re: “Mekete ea lona e tla fetoha bofifi, le lifela tsohle tsa lona koli-ea-malla.”

₇Ka lla. Eare ha letsatsi le liketse, ka ea mo chekela lebitla, 'me ka mo pata. ₈Baahisani le 'na ba ntšeha, ba re: “Ha a sa tšaba letho joale. O se a ile a batloa ka morero oa ho bolaeloa taba ea mofuta oona ona 'me a baleha; empa ke enoa, o qaleletse ho epela bafu hape!”

₉Mantsiboeng ao ka itlhatsoa, eaba ke tsoela lebaleng, ke robala pel'a lerako le potileng lebala. Ka baka la ho chesa, ha kea ka ka ikhurumetsa. ₁₀Ke ne ke sa tsebe hore ho na le lirobele lerakong leo, holim'a hlooho ea ka. Mantle a chesang a tsona a mphara ka mahlong 'me a baka matheba a maputsoa. Ka ea lingakeng ho phekoloa. Empa ha ba ntse ba ntlotsa ka meriana e mengata, matheba ana a mphoufatsa ho feta. Qetellong ka foufala tu. Ka qeta lilemo tse 'ne ke sa bone. Bana beso kaofela ba ne ba soabile ka se ntlhahetseng, 'me Ahikare o ile a mphepa lilemo tse peli, ho fihlela a e-ea naheng ea Elame.

₁₁Nakong ena, Anna, mosali oa ka, o ne a sebeletsa moputso ka mesebetsi ea mefuta-futa ea basali. ₁₂O ne a ee a e romelle ho beng ba eona, 'me bona ba mo lefe moputso oa hae. Joale ka la bosupa khoeling ea Shefate, hoba a qete ho loha lesela le leng, a le romella ho beng ba lona. Ba mo lefa moputso oa hae kaofela, 'me holim'a mona ba eketsa ka potsanyane e tsoang mohlapeng oa bona, hore a ikele le eona ha hae. ₁₃Ha e fihla ha ka, ea qala ho lla. Eaba kea 'mitsa, ke re ho eena: “E tsoa kae, potsanyane ee? E seng ke e utsoitsoeng? E busetse ho beng ba eona, hobane ha re na tokelo ea ho ja letho le utsoitsoeng.”

₁₄A nkaraba, a re: “Ke mpho eo ke e fuoeng ka thoko ho moputso.” Empa ka se ke ka mo kholoa, ka mo laela ho e busetsa ho beng ba eona; ka ba lihlong ka baka la ketso eo ea hae. Eena a fetola, a re: “Li hokae liketso tsa hao tsa mohau? E hokae mesebetsi e lokileng ea hao? Joale ho hlaheletse hantle seo u leng sona.”