SIRAKA 51

₁Ke tla u leboha, Morena,

uena Khosi,

ke u rosise, Molimo,

uena mopholosi oa ka,

ke boke Lebitso la hao;

₂hobane u bile moqobeletsi

le mothusi oa ka,

'me ua lopolla 'mele oa ka timelong,

lerabeng la leleme le etseletsang,

le melomong ea ba qapang mashano.

Ua ba mothusi oa ka ho ba ntoantšang;

₃ka mohau o moholo oa hao

le ka baka la Lebitso la hao,

ua ntopolla, menong

a ba itokiselitseng ho nkharola,

liatleng tsa ba batlang

ho nkamoha bophelo,

tsietsing tse ngata-ngata

tse ntlhahetseng,

₄kotsing ea ho khangoa ke malakabe

a neng a nkaparetse,

mollong o neng o sa hotetsoa ke 'na,

₅botebong ba Qalo ea bafu,

lelemeng le khopo le lipolelong

tsa mashano,

₆liketseletsong tse khopo

tseo ke qosoang ka tsona ho khosi.

Ke ne ke se ke le lintšing tsa lefu,

ke se ke atametse Qalo ea bafu

tlase-tlase.

₇Ba ne ba ntikile kahohle,

ho se mothusi.

Ka lebella thuso ea batho,

empa ka e hloka.

₈Eaba moo ke hopolang

mohau oa hao, Morena,

le lithuso tsa hao haesale,

le hore u namolela ba u tšepang,

'me u ba ephola liatleng tsa lira.

₉Ka nyollela thapelo ea ka ho uena

ke le lefatšeng,

ka u kopa ho pholosoa lefung.

₁₀Ka ipiletsa ho Morena,

eo e leng Ntate, ka re:

“U se ntahle letsatsing la mathata,

le nakong ea baikhohomosi

mohla ke hlokang thuso.

₁₁Ke tla rorisa Lebitso la hao

ke sa khaotse,

'me ke le binele thoko ka teboho.”

Thapelo ea ka e ile ea utloahala,

₁₂hobane u mpholositse timelong,

ua 'namolela mehleng e mebe

ea bomalimabe.

Ka baka lena ke tla u leboha,

'me ke u rorise,

ke boke Lebitso la hao, Morena.

₁₃Ha ke sa le mocha,

pele ke kena maetong a ka,

ke ile ka batla bohlale phatlalatsa

thapelong ea ka.

₁₄Ka pele ho Tempele ka bo kopa

'me ke tla 'ne ke bo batle

ho isa qetellong.

₁₅Lithung-thung tsa bona

li thabisitse pelo ea ka

joaloka morara o butsoang oa bona.

Leoto la ka le hatile

tseleng e otlolohileng,

ke latetse mehlala ea bohlale

ho tloha bocheng ba ka.

₁₆Hang hoba ke qale ho bo mamela, ka

bo amohela;

ka ba ka iphumanela thuto e matla.

₁₇Katleho ea ntlela ka bona,

'me ke tla tlotlisa ea mphileng bohlale.

₁₈Ka ikemisetsa ho phela ka bona,

ka chesehella ho loka, 'me nke ke ka

soabisoa ke hona.

₁₉Moea oa ka o ile oa bo loanela,

ka phetha Molao ka tlhokomelo

e kholo.

Ka otlollela matsoho a ka maholimong,

ka llela ho hloka tsebo ha ka.

₂₀Ka bea pelo ea ka ho bona,

'me ka ho ipoloka ke hloekile

ka bo fumana.

Bohlale bo mphumantšitse kutloisiso

ho tloha qalong,

ka hoo nke ke ka lahleha.

₂₁Pelo ea ka ea sisinngoa

ha ke ntse ke bo batla;

ka hona ka hapa leruo le molemo.

₂₂E le moputso, Morena o mphile

bokheleke,

'me ke tla mo rorisa ka leleme la ka.

₂₃Atamelang ho 'na,

lona ba sa rutehang,

'me le kene sekolo sa ka.

₂₄Ke ka'ng ha le ntse le haeletsoe

ke lintho tsee,

empa meea ea lona e nyoriloe hakaalo?

₂₅Ka bula molomo oa ka, ka re:

“Iphumaneleng lintho tsena

ntle ho chelete.

₂₆Beang molala oa lona tlas'a joko,

meea ea lona e ke e amohele thuto;

e ka fumaneha habonolo,

hobane e hona mona haufinyane.”

₂₇Iponeleng ka mahlo a lona

kamoo ke ikhathalitseng

hannyane kateng,

pele ke fumana phomolo e kana-kana.

₂₈Litšenyehelo tsa lona ka thuto

li ka 'na tsa le ja silefera e ngata;

empa ka thuto le tla fumana

khauta e ngata ho feta.

₂₉E se eka meea ea lona e ka thabela

mohau oa Morena,

e se ke la ba lihlong ho mo rorisa.

₃₀Etsang mosebetsi oa lona ka nako,

'me o tla le putsa ka nako ea hae.