SIRAKA 50

₁Ke Simone, mora oa Oniase

le moprista e moholo,

eo bophelong ba hae

a nchafalitseng Tempele

'me litšiung tsa hae

a sireletsa Sehalalelo.

₂A cheka metheo bakeng sa marako

a menahaneng habeli bophahamong,

marako a phahameng a litšehetso

bakeng sa ho kopela Tempele hare.

₃Mehleng ea hae letamo la metsi

la chekoa,

letša le kang tanka ea “Leoatle”

ka bopotoloho.

₄A imamella mokhoa oo ka oona

a ka pholosang

sechaba sa habo timelong,

a matlafatsa motse ho o sireletsa

ho ba o patelang.

₅O ne a tlotlehile hakaakang,

ha a tsamaea ka har'a Tempele,

hoba a tsoe Sehalalelong

se nang le lesira!

₆O ne a le joaloka mphatlalatsane

e har'a maru,

joaloka khoeli e tolokileng;

₇joaloka letsatsi le chabetseng holim'a

Tempele ea Ea holimo-limo,

joaloka mookoli o phatsimang

marung a khanyang,

₈joaloka lirosa nakong ea selemo,

joaloka mehalalitoe

pela seliba sa metsi,

joaloka lehlomela le letala

thabeng ea Lebanone

nakong ea hlabula;

₉joaloka mokubetso

o chesoang ka sethukhubetsing;

joaloka sejana sa khauta

e phaphathiloeng,

se khabisitsoeng ka majoe

a mefuta-futa a bohlokoa;

₁₀joaloka sefate sa mohloare

se beang litholoana,

kapa joaloka saeperese

e phahametseng marung.

₁₁Ha a ne a apere seaparo sa hae

sa tlotla

'me a ikapesitse ka bokhabane

bohle ba hae,

ho nyolohela aletareng e halalelang,

a etsa hore lebala la Sehalalelo

le tlotlehe.

₁₂Ha a amohela liabo

liatleng tsa baprista,

a eme pel'a leifo la aletare,

bana babo ba mo pota-pota

joaloka mofapahlooho,

joaloka lifatjana tsa likedare

tsa Lebanone,

ba mo pota joaloka kutu

tsa fate tsa palema.

₁₃Bara bohle ba Arone,

ka tlotla ea bona,

ba tšoere nyehelo ea Morena

liatleng tsa bona,

ka pele ho phutheho eohle ea Iseraele,

₁₄ha a ntse a sebeletsa aletareng,

a lokisa nyehelo e eang

ho Ea holimo-limo, Ea matla 'ohle,

₁₅a nanabeletsa letsoho la hae sejaneng,

'me a tšela seno sa lero la morara,

a se tšollela maotong a aletare,

monko o khahlehang

ho Ea holimo-limo,

Khosi ea libopuoa tsohle.

₁₆Eaba bara ba Arone baa hooa,

ba letsa literompeta tsa tšepe

e phaphathiloeng,

tse etsang molumo o moholo,

e le khopotso ho Ea holimo-limo.

₁₇Eaba sechaba kaofela

se phakisa se oela fatše ka lifahleho

ho khumamela Morena oa sona,

Ea matla 'ohle, Molimo

ea holimo-limo.

₁₈Libini tsa mo etsetsa lifela,

ka meloli e molumo o monate-nate;

₁₉'me sechaba sa kopa Morena

Ea holimo-limo,

sa rapela eena ea leng mohau,

ho fihlela tšebeletso ea Morena

e phethahetse,

'me meetlo eohle e entsoe.

₂₀Eaba Simone oa theoha,

a otlolla matsoho a hae holim'a

phutheho eohle ea bana ba Iseraele,

ho ba fa hlohonolofatso ea Morena

ka lentsoe la hae,

a ntse a itumela ho bolela

Lebitso la hae.

₂₁Eaba bohle ba itihela fatše

lekhetlo la bobeli,

ho amohela hlohonolofatso

e tsoang ho Ea holimo-limo.

₂₂Joale bokang Molimo

oa libopuoa tsohle,

ea etsang mesebetsi e meholo kahohle,

ea re phahamisitseng ka matsatsi 'ohle

ho tloha tlhahong ea rona,

ea entseng ho rona

ho ea ka mohau oa hae.

₂₃A ke a re fe pelo tse tletseng thabo,

a etse hore khotso e be teng

tšiung tsa rona,

e be teng Iseraele ka mehla le mehla.

₂₄A re sitse ka mohau oa hae

o sa khaotseng,

'me a re lopolle litšiung tsena tsa rona.

₂₅Ho na le chaba tse peli

tseo ke li hloileng,

'me sa boraro hase sechaba:

₂₆ba phelang thabeng ea Seire,

le Bafilesita

le batho ba lithoto

ba ahileng Shekeme.

₂₇Thuto e tletseng kutloisiso le tsebo

e ngotsoe bukeng ena

ke Jesu mora oa Siraka,

mora oa Eleasare, oa Jerusalema,

eo pelong ea hae

ho neng ho kolla bohlale.

₂₈Ho lehlohonolo ea itloaetsang

litaba tsena;

ea li bolokang pelong

o tla ba bohlale.

₂₉Ha a ka li phetha

o tla ba matla linthong tsohle,

hobane leseli la Morena

ke tsela ea hae.