SIRAKA 37

“Le 'na ke motsoalle oa hao,”

empa metsoalle e meng ke metsoalle

feela ka lebitso.

₂Ana hase bohloko bo isang lefung,

ha molekane le motsoalle a fetoha sera?

₃Uena tšekamelo e mpe ea motho,

ke ka baka la'ng u ileng ua boptjoa,

ho apesa lefatše lohle ka thetso?

₄Molekane e mong o thabela

lehlohonolo la motsoalle oa hae;

empa mohla tsietsi oa mo fetohela.

₅Molekane e mong o sebetsa

le motsoalle ho fumana lijo,

'me ha ho loanoa

o mo sireletsa ka thebe.

₆Se lebale motsoalle ea u loanetseng

molamu oa hlooho;

se mo tlolise mahlo holimo

ha u le naleng.

₇Moeletsi ka mong o bolelisa

keletso ea hae,

empa bang ba fana ka keletso

molemong oa bona.

₈U be hlokolosi ka moeletsi,

'me u ithute pele

seo a se chachehellang;

hobane o tla icheba boeena feela,

e le hore u oele matleng a hae.

₉Mohlomong o tla re ho uena:

“Tsela ea hao e lokile;”

e be joale o emella thoko ho lebella

se tlang ho u hlahela.

₁₀U se ke ua kopa keletso ho motho

ea u helolang ka la motale;

pata merero ea hao ho ba mona

ho uena.

₁₁Se kope keletso ho mosali

ka eo a fufelanang le eena,

kapa lekoala ka ntoa,

kapa mohoebi ka phaello,

kapa moreki ka thekiso,

kapa lekhonatha ka teboho,

kapa motho ea lonya ka mohau,

kapa sekhoba ka mosebetsi

ofe kapa ofe,

kapa motho ea tholetsoeng tšebetso ea

nakoana ka ho qeta mosebetsi oa hae,

kapa mohlanka ea botsoa

ka mosebetsi o boima:

se kope keletso efe kapa efe

ho batho bao.

₁₂Empa lula kamehla

le motho oa morapeli,

eo u mo tsebang e le 'moloki oa melao,

eo moea oa hae o tšoanang le oa hao,

ea u utloelang bohloko

ha u le bothateng.

₁₃Tšepa le boeletsi ba pelo ea hao,

hobane ha ho mang

ea tšepahalang ho uena ho e feta.

₁₄Moea oa motho hangata

o mo hlokomelisa litaba

ho feta balebeli ba supileng

ba lutseng qhooeng ea tora.

₁₅Empa ho feta tsena tsohle

kopa Ea holimo-limo

hore a u tataise tseleng ea 'nete.

₁₆Boinahano e ka khona e be qaleho

ea mosebetsi ka mong,

'me boimamelo bo etella pele

tšebetso efe kapa efe.

₁₇Mehopolo e metse pelong,

₁₈eo e leng eona e hlahisang

makala a mane:

botle, bobe, bophelo le lefu;

'me molaoli oa tsena

kamehla ke leleme.

₁₉Motho ea masene e ka ba moruti

oa ba bangata,

empa a hloka thuso ho eena.

₂₀Motho ea kheleke e ka ba mohlouoa,

'me a tingoa lijo ke bohle;

₂₁hobane lehlohonolo

ha aa ka a le neoa ke Morena,

ka baka la ho hloka bohlale ha hae.

₂₂Ha motho a le bohlale

boitšoarong ba hae,

litholoana tsa kutloisiso ea hae

ha a eletsa e tla ba tsa 'nete.

₂₃Ha motho ea bohlale a ruta

sechaba sa habo,

litholoana tsa kutloisiso ea hae

e tla ba tsa 'nete.

₂₄Motho ea bohlale

o tla rorisoa haholo,

'me bohle ba 'monang

ba tla 'mitsa ea lehlohonolo.

₂₅Bophelo ba motho

bo baletsoe matsatsi,

empa matsatsi a Iseraele ha a na palo.

₂₆Ea bohlale o tla tšeptjoa

har'a sechaba sa habo,

'me lebitso la hae le tla hopoloa

ka ho sa eeng kae.

₂₇Ngoan'a ka, itlhahlobe

ha u sa ntsane u phela;

elelloa se ka bang kotsi ho uena,

'me u se qobe.

₂₈Hase tsohle tse molemo ho bohle,

'me motho ka mong

ha a ke a thabela tsohle.

₂₉U se ke ua ba pelo e telele,

'me u se ke ua hlanyetsa lijo;

₃₀hobane meharo e baka mafu,

'me bonyollo bo nyekisa pelo.

₃₁Ba bangata ba bolailoe ke bonyollo,

empa ea itlhokomelang

o lelefatsa bophelo ba hae.