1Ha ho bobe bo tla oela motho
ea tšabang Morena holimo;
empa mathateng o tla 'ne a mo lopolle
hangata.
2Motho ea bohlale
ha a ka ke a hloea Molao;
empa eo e leng moikaketsi ka oona
o ka sekepe har'a sefefo.
3Motho ea seli o tla tšepa Molao;
ho eena Molao o tšepahala
joaloka lotho ea moprista e moholo.
4Itokisetse hantle pele u bua,
haeba u batla ho mameloa;
hlophisa thuto ea hao,
pele u fana ka karabo ea hao.
5Pelo ea sethoto e ka lebili la kariki,
'me mehopolo ea hae
eka ase ea lona e bilikang.
6Motsoalle ea somang
o ka poho ea pere,
e tsetselang tlas'a e mong le e mong
ea e kaletseng.
Batho ha ba tšoane
7Ke ka baka la'ng ha letsatsi le leng
le feta le leng ka bohlokoa,
empa khanya ea matsatsi 'ohle
a selemo e tsoa letsatsing?
8Morena o a hlalohantse
ka qeto ea hae,
'me a bea linako tse fapaneng
tsa selemo le mekete.
9Matsatsi a mang a a phahamisa,
a ba a a halaletsa;
'me a mang a 'ona a a etsa
matsatsi feela a selemo.
10Batho bohle ba tsoa mobung,
'me Adama o ne a boptjoe ka lerole;
11empa botlalong ba tsebo ea hae
Morena o ile a ba hlalohanya,
a ba a ba khethela litsela tsa bona
tse fapakaneng.
12Bang ba bona a ba hlohonolofatsa
le ho ba phahamisa,
'me bang ba bona a ba halaletsa
a ba atametsa ho Eena;
athe ba bang a ba rohaka,
'me a ba theolela tlase,
'me a ba ketola tulong tsa bona.
13Joaloka letsopa
ka letsohong la sebopi,
litsela tsohle tsa hae li joalokaha a rata;
le bona batho ba ka har'a letsoho
la 'Mopi oa bona,
ea ba neang kamoo a ratang kateng.
14Botle bo fapane le bobe,
'me bophelo bo fapane le lefu;
ka mokhoa o tšoanang moetsalibe
o fapane le morapeli.
15Talima mesebetsi ea Ea holimo-limo,
le eona e ea ka bobeli,
o mong o fapane le o mong.
16Ka ba oa ho qetela ho lebela,
ka ba joaloka motho ea khoahlapisang
ka mora' bakotuli ba morara.
Ka hlohonolofatso ea Morena
ke fihlile pele,
'me joaloka mokotuli ofe kapa ofe
ka tlatsa setlhotlelo sa ka sa veine.
17Bonang, ha kea ka ka itšebeletsa
ka thata ke inotši,
empa ke sebelelitse bohle
ba batlang thuto.
18'Mameleng, lona ba leng baholo
ba sechaba,
le lona baetapele ba phutheho,
sekehang tsebe!
Ema ka bouena
19Ho mora kapa mosali,
ho ngoan'eno kapa motsoalle,
se fane ka matla holim'a hao,
ha feela u ntse u phela.
Se fane ka ling tsa hao ho e mong,
esere ua inyatsa 'me ua tlameha
ho li batla hape.
20Ha u sa phela, 'me u sa ntsane
u phefumoloha,
se lumelle mang kapa mang
ho nka sebaka sa hao.
21Ho molemo hore bana ba hao
ba kope ho uena,
ho e-na le hore uena u be mohaung
oa bona.
22Ipabole nthong tsohle
tseo u li etsang;
se silafatse lebitso la hao.
23Ha ho fihlile letsatsi la ho qetela
la bophelo ba hao,
u le lekhatheng la lefu, aba lefa la hao.
Makhoba
24Furu, thupa le mejaro
bakeng sa tonki;
bohobe, thupelo le mosebetsi
bakeng sa mohlanka.
25Faa lekhoba la hao mosebetsi
'me u tla fumana phomolo;
lokolla matsoho a lona mosebetsing
'me le tla batla bolokolohi.
26Joko le marapo
li tla kokobetsa molala;
mohlanka ea khopo o loketsoe
ke patlisiso ka tlhokofatso.
27Mo sebelise e le hore a se ke a lofa;
hobane ho lofa ho ruta
mefuta eohle ea bobe.
28Mo laele mosebetsi
joalokaha ho lokela,
'me haeba a sa mamele,
mo imetse ka mahlaahlela.
29Empa se tšoare mang kapa mang
hampe ho feta tekanyo,
'me u se etse letho le fapaneng le toka.
30Haeba u e-na le mohlanka
a le mong feela,
mo rate joalokaha u ithata,
hobane u mo rekile ka mali.
31Haeba u e-na le mohlanka
a le mong feela,
mo tšoare joaloka ngoan'eno,
hobane u tla mo hloka
joaloka moea oa hao.
Haeba u mo tšoara hampe,
'me a tloha, a baleha,
u tla 'matlela kae?
