Boholo ba Molimo
1Ea phelang ka ho sa eeng kae
o ne a bope lintho tsohle.
2Morena ke eena feela
ea tla fumanoa a phethehile.
4Ha ho motho eo a mo fileng matla
a ho phatlalatsa mesebetsi ea hae;
ke mang ea ka phenyang
liketso tse kholohali tsa hae?
5Ke mang ea ka lekanyang
matla a botlotlehi ba hae?
'me ke mang ea ka ikemisetsang
ho pheta mehauhelo eohle ea hae?
6Ha ho letho le ka etsoang
ho e nyenyefatsa kapa ho e eketsa;
ha ho ea ka phenyang
limakatso tsa Morena.
7Ha motho a qetile, ke hona a qalang;
'me ha a ema, o tšerehana le ho feta.
Motho hase letho
8Motho ke'ng?
'me o na le thuso efe?
Botle ba hae ke bofe
'me bobe ba hae ke bofe?
9Litšiu tsa motho li ngata
ha a fihletse lilemo tse lekholo.
10Joaloka lerotholi la metsi leoatleng,
le tlhaku ea lehlabathe,
lilengoana tse seng kae tsa motho
li joalo ha li bapisoa le bosafeleng.
11Ka baka lena Morena
o iphapanyetsa batho,
'me o tšollela mohau oa hae
holim'a bona.
12Oa bona 'me o tseba hore
qetello ea bona e tla ba mpe,
ka baka lena o ba nea tšoarelo
ka bongata.
13Mohau oa motho o lebisoa
ho mohahabo feela,
empa mohau oa Morena o anela
bohle ba phelang.
Oa khalema, oa rupela, oa ruta:
joalokaha molisa a orosa
mohlape oa hae,
o ba khutlisa bobeng.
14O hauhela ba amohelang
thupelo ea hae,
'me ba thahasellang likahlolo tsa hae.
Mosa le lerato
15Ngoan'a ka, u se ke ua tsoaka
likomang le liketso tsa hao tse ntle,
leha e le ho soabisa motho
ka mantsoe a hao,
ha u fana ka mpho.
16Ana phoka ha e kokobetse
mocheso o bataolang?
Ka mokhoa o joalo, lentsoe
le thabisa ho feta mpho.
17Lentsoe le molemo le feta
mpho ea bohlokoa.
Ka bobeli li fumanoa ho motho
ea fanang ka matsoho a mabeli.
18Sethoto se fana ka litlhapa feela,
'me mpho ea lekhonatha e fahla mahlo.
Boitlhatlhobo
19Pele u bua, ithute;
'me le pele u kula, hlokomela
bophelo ba hao.
20Pele ho kahlolo, itlhatlhobe;
'me ka nako ea eona, u tla fumana
tšoarelo.
21Pele u kula, ikokobetse;
ha u oetse sebeng, baka.
22Ho se be letho le u sitisang
ho phetha kano kapele,
'me u se emele ho fihlela lefung
ho phethahatsa tšoanelo eo ea hao.
23Pele u etsa kano, itokisetse,
'me u se be joaloka motho
ea lekang Morena.
24Hopola khalefo ea hae
tsatsing la lefu,
le motsotso oa phetetso
ha a reteletsa sefahleho sa hae.
25Nakong ea nala hopola nako ea tlala;
mohla u ruileng hopola
bofuma le bohloki.
26Ho tloha hoseng ho ea mantsiboea,
nako e ntse e feta,
'me tsohle li lebelo ka pele ho Morena.
27Motho ea bohlale
o falimeha kamehla,
'me kotsing ea sebe o tla phema
liketso tse fosahetseng.
28Motho ka mong ea seli
o tseba bohlale,
'me o lebohela motho ea bo fumaneng.
29Batho ba seli lipolelong, le bona
ba hlalefile,
'me ba qapa maele a mangata
a nepahetseng.
Boitšoaro
30U se ke ua latela litakatso
tse mpe tsa hao,
empa u khine litšekamelo tsa hao.
31Haeba u itumella ho khotsofatsa
litakatso tsena tsa hao,
u tla qetella ka ho itšehisa lira tsa hao.
32U se ke ua ithabisa
ka ho ineella menyakeng,
esere ua imeloa ke litšenyehelo
tse ngata tsa eona.
33U se ke ua fetoha mofutsana ka ho ja
lijo tsa molato tse monate,
u se na letho ka mokotleng.
