1Ea tšabang Morena
o etsa tsena tsohle,
ea bolokang Molao ka ho tlala
o tla rua bohlale.
2Bo tla mo khahlametsa joaloka 'ma,
bo mo amohele joaloka monyaluoa
ea hloekileng.
3Bo tla mo ngoathela bohobe
ba kutloisiso,
bo mo khelle metsi a bohlale ho noa.
4O tla ikokotlela ka bona,
'me a ke ke a thekesela;
o tla bo khomarela,
'me a ke ke a tlontlolleha.
5Bohlale bo tla mo phahamisetsa
ka holim'a ba habo,
bo mo fe bokheleke
ha a bua a le har'a phutheho.
6O tla fumana thabo
le mofapahlooho oa nyakallo,
'me lebitso la hae le tla tuma kamehla.
7Ba lithoto ba ke ke ba fumana
bohlale,
'me ba etsang sebe
ba ke ke ba bo bona.
8Bo hole le baikhohomosi,
'me ba leshano
ha ba ka ke ba bo hopola.
9Thoko ha e lokele ho tsoa
molomong oa moetsalibe,
hobane ha ea fanoa ke Morena.
10Thoko e ka boleloa feela ke bohlale,
'me ke Morena ea ka fanang ka eona.
Bolokolohi ba motho
11U se ke ua re: “Ke ka baka
la Morena ke khelohileng tsela,”
hobane ho ho uena ho phema
seo a se hloileng.
12U se ke ua re: “Ke eena
ea ntahlisitseng tsela,”
hobane ha a hloke motho
oa moetsalibe.
13Morena o hloile manyala
afe kapa afe,
'me ha ho ea a ratang
ho ba mo tšabang.
14Ke eena ea neng a bope motho
tšimolohong,
'me a mo fa matla a ho ikhethela.
15Ha u rata, u ka boloka melao;
botšepehi bo tla tsoa
boithatelong ba hao.
16Morena o beile metsi le mollo
ka pele ho uena;
nanabetsa letsoho, u ikhethele.
17Bophelo le lefu li beiloe
ka pele ho motho;
motho ka mong o tla neoa
seo a se khethileng.
18Bohlale ba Morena bo boholo;
o matla 'ohle 'me o bona tsohle.
19Mahlo a hae a shebile ba mo tšabang,
'me o tseba mesebetsi eohle ea batho.
20Ha ho motho eo a mo laetseng
ho ba khopo,
ha ho eo a mo fileng tumello
ea ho etsa sebe.
