Thapelo ea Asariea
1Bahlankana ba bararo, Hananiea le Mishaele le Asariea, ba ile ba itsamaela ka har'a malakabe, ba binela Molimo lifela, ba boka Morena. 2Eaba Asariea oa ema, 'me a le ka har'a mollo, a qala ho rapela ka lentsoe le phefa, a re:
3“U bokoe, Morena, Molimo oa bo-ntat'a rona, 'me u rorisoe; Lebitso la hao le tlotlisoe ka ho sa eeng kae. 4U lokile ho tsohle tseo u li entseng ho rona; mesebetsi eohle ea hao e nepahetse, litsela tsa hao li otlolohile, 'me likahlolo tsa hao ke tsa 'nete. 5U entse likahlolo tsa 'nete ho tsohle tseo u li tlisitseng holim'a rona, le holim'a Jerusalema, motse o halalelang oa bo-ntat'a rona; hobane u re tliselitse tsena tsohle ho ea ka 'nete le toka, ka baka la libe tsa rona.
6“Re entse libe 'me re robile molao oa hao, ra u koenehela, ra u siteloa ka mekhoa eohle. 7Ha rea ka ra mamela melao ea hao, ha rea ka ra e boloka, leha e le ho phetha seo u re laetseng sona e le hore re fumane katleho. 8Ka baka leo tsohle tseo u li tlisitseng holim'a rona, le tsohle tseo u li entseng ho rona, u li entse ka kahlolo ea 'nete. 9U re neetse ka har'a liatla tsa lira tsa rona, e leng bakoenehi ba hloehang, le ho khosi e khopo, e mpe ho feta tse ling tsohle ka lefatše lohle. 10Joale re sitoa ho bula melomo ea rona; tlontlollo le sekhobo li oetse basebeletsi ba hao le barapeli ba hao.
11“Ka baka la Lebitso la hao, u se ke ua re furalla ho isa khale, 'me u se felise selekane sa hao. 12Ka baka la Aborahama, motsoalle oa hao, le ka baka la Isaka, mohlanka oa hao, le Jakobo, mohalaleli oa hao, se re koenehetse mohau oa hao. 13Ke bao u ileng ua ba tšepisa hore u tla ngatafatsa litloholo tsa bona joaloka linaleli tsa leholimo le joaloka lehlabathe le lebopong la leoatle. 14Joale, Morena, re se re nyenyefetse ho feta lichaba tsohle, 'me kajeno re kokobelitsoe kahohle lefatšeng ka baka la libe tsa rona. 15Tšiung tsena ha ho 'musi kapa moporofeta kapa moetapele; ha ho nyehelo ea secheso kapa sehlabelo kapa nyehelo tse ling kapa mokubetso, leha e le sebaka sa ho etsa nyehelo ka pele ho uena hore u re etsetse mohau. 16Empa kaha re tlile ka pelo e soabileng le moea o ikokobelitseng, eka re ka amoheleha, joaloka hola re tlile ka linyehelo tsa secheso sa lipheleu le lipoho, kapa tsa likete-kete tsa likonyana tse nonneng. 17Eka sehlabelo sa rona se ka ba joalo kajeno ka pele ho uena, 'me eka re ka u latela ka botlalo, hobane ba u tšepang ha ba ka ke ba hlabisoa lihlong. 18Hajoale, ka lipelo tsohle tsa rona, rea u latela, rea u tšaba 'me re batla sefahleho sa hao. 19U se ke ua re hlabisa lihlong, empa u 'n'u re tšoare ka mosa le ka mohau o moholo oa hao. 20Ak'u re pholose, ho ea ka ho latela mesebetsi ea hao e hlollang, 'me u tlotlise Lebitso la hao, oho, Morena! Etsa hore bohle ba hlahisang bahlanka ba hao kotsi ba hlabisoe lihlong.
21“A ba ke ba hlajoe ke lihlong, 'me ba amohuoe matla le borena bohle; u etse hore matla a bona a felisoe. 22Ba ke ba tsebe hore ke uena u inotši Morena le Molimo, ea tlotlehang ka bophara ba lefatše!”
23Joale bahlanka ba khosi, ba ileng ba ba akhela ka seboping, ha baa ka ba khaotsa ho se beseletsa ka oli le tiri le toala le lihlahla, 24hoo malakabe a ileng a betsehela ka ntle ho sebopi, ka bophahamo bo fetang limethara tse mashome a mabeli; 25a ba a namela ka thoko ho sona 'me a chesa Bakaladea ba neng ba eme pel'a sona. 26Empa lengeloi la Morena la theohela seboping ho ba le Asariea le balekane ba hae. La qhala malakabe a mollo, 27'me la etsa hore ho be joaloka hola moea o pholileng o mongobo oa phoka o foka ka hare ho sebopi. Mollo ha oa ka oa ba thetsa le hanyenyane, leha e le ho ba hlahisa kotsi kapa ho ba tšoenya.
Sefela sa bahlankana ba bararo
28Eaba bahlankana bao ba bararo, ba le ntsoe-leng, ba binela Molimo sefela, ba mo tlotlisa 'me ba mo boka ba le ka seboping, ba re:
29“U bokoe, Morena, Molimo oa bo-ntat'a rona;
u rorisoe 'me u phahamisoe ka ho sa eeng kae.
30Ho bokoe Lebitso la hao le
halalelang 'me le tlotlisehang;
le rorisoe haholo 'me le phahamisoe ka
ho sa eeng kae.
31U bokoe Tempeleng e halalelang ea
tlotla ea hao,
uena ea lokelang haholo ho bineloa
thoko ka ho sa eeng kae.
32A u bokoe, uena ea talimang botebo
ba maliba u lutse holim'a likerubime,
ea lokelang ho rorisoa le ho
phahamisoa ka ho sa eeng kae.
33A u bokoe, uena ea lutseng teroneng ea hao ea borena,
ea lokelang haholo ho bineloa thoko le ho phahamisoa ka ho sa eeng kae.
34U bokoe sepakapakeng sa leholimo,
uena ea lokelang ho bineloa thoko le ho tlotlisoa ka ho sa eeng kae.
35“Bokang Morena,
lona mesebetsi eohle ea Morena;
'mineleng thoko, le mo phahamise ka ho sa eeng kae.
36Bokang Morena, lona maholimo;
'mineleng thoko, le mo phahamise ka ho sa eeng kae.
37Bokang Morena, lona mangeloi a Morena;
'mineleng thoko, le mo phahamise ka ho sa eeng kae.
38Bokang Morena, lona metsi 'ohle a ka holim'a maholimo;
'mineleng thoko, le mo phahamise ka ho sa eeng kae.
39Bokang Morena, lona makhotla 'ohle a Morena;
'mineleng thoko, le mo phahamise ka ho sa eeng kae.
40Bokang Morena, lona letsatsi le khoeli;
'mineleng thoko, le mo phahamise ka ho sa eeng kae.
41Bokang Morena, lona linaleli tsa leholimo;
'mineleng thoko, le mo phahamise ka ho sa eeng kae.
42Bokang Morena, lona lipula tsohle le phoka eohle;
'mineleng thoko, le mo phahamise ka ho sa eeng kae.
43Bokang Morena, lona meea eohle e fokang;
'mineleng thoko, le mo phahamise ka ho sa eeng kae.
44Bokang Morena, lona mollo le lebatama;
'mineleng thoko, le mo phahamise ka ho sa eeng kae.
45Bokang Morena, lona mohatsela le mocheso;
'mineleng thoko, le mo phahamise ka ho sa eeng kae.
46Bokang Morena, lona phoka le tšeola;
'mineleng thoko, le mo phahamise ka ho sa eeng kae.
47Bokang Morena, lona masiu le matšeare;
'mineleng thoko, le mo phahamise ka ho sa eeng kae.
48Bokang Morena, lona leseli le lefifi;
'mineleng thoko, le mo phahamise ka ho sa eeng kae.
49Bokang Morena, lona serame le mohatsela;
'mineleng thoko, le mo phahamise ka ho sa eeng kae.
50Bokang Morena, lona maqhoa le mahloa;
'mineleng thoko, le mo phahamise ka ho sa eeng kae.
51Bokang Morena, lona matolo le maru;
'mineleng thoko, le mo phahamise ka ho sa eeng kae.
52“Lefatše a le ke le boke Morena;
le 'minele thoko, le mo phahamise ka ho sa eeng kae.
53Bokang Morena, lona lithaba le maralla;
'mineleng thoko, le mo phahamise ka ho sa eeng kae.
54Bokang Morena, lona lintho tsohle tse melang mobung;
'mineleng thoko, le mo phahamise ka ho sa eeng kae.
55Bokang Morena, lona liliba;
'mineleng thoko, le mo phahamise ka ho sa eeng kae.
56Bokang Morena, lona maoatle le linoka;
'mineleng thoko, le mo phahamise ka ho sa eeng kae.
57Bokang Morena, lona lihlapi tse kholohali
le tsohle tse sesang metsing;
'mineleng thoko, le mo phahamise ka ho sa eeng kae.
58Bokang Morena, lona linonyana tsohle tsa moeeng;
'mineleng thoko, le mo phahamise ka ho sa eeng kae.
59Bokang Morena, lona libatana le likhomo;
'mineleng thoko, le mo phahamise ka ho sa eeng kae.
60“Bokang Morena, lona bana ba batho;
'mineleng thoko, le mo phahamise ka ho sa eeng kae.
61Boka Morena, uena Iseraele;
'mineleng thoko, le mo phahamise ka ho sa eeng kae.
62Bokang Morena, lona baprista ba Morena;
'mineleng thoko, le mo phahamise ka ho sa eeng kae.
63Bokang Morena, lona bahlanka ba Morena;
'mineleng thoko, le mo phahamise ka ho sa eeng kae.
64Bokang Morena, lona meea le lipelo tsa ba lokileng;
'mineleng thoko, le mo phahamise ka ho sa eeng kae.
65Bokang Morena, lona ba halalelang le ba ikokobetsang ka pelong;
'mineleng thoko, le mo phahamise ka ho sa eeng kae.
66“Hananiea, Asariea le Mishaele, bokang Morena;
'mineleng thoko, le mo phahamise ka ho sa eeng kae.
O re lopolotse Qalong ea bafu,
a re pholosa linaleng tsa lefu,
a re ntša seboping sa mollo o tukang,
a re pholosa malakabeng a oona.
67Lebohang Morena, hobane o molemo;
mohau oa hae ke oa kamehla eohle.
68Lona bohle ba khumamelang Morena,
bokang Molimo oa melimo;
'mineleng thoko 'me le mo lebohe,
hobane mohau oa hae
ke oa kamehla eohle.”
