Ruthe oa iketa
1Joale Naomi, matsal'a Ruthe, a re ho Ruthe: “Ngoan'aka, ke tšoanetse ho u batlela lehae, u tle u lule u iketlile. 2Ha ke re Boase, eo u kileng ua sebetsa le makhabunyane a hae, ke seng le rōna? Bona, bosiung bona o tla be a olosa harese seotlong. 3Ka baka leo, itlhatsoe, u tlotse, 'me u apare hantle, ebe u theohela seotlong. U se ke ua ba ua itsebisa eena ho fihlela ha a qetile ho ja le ho noa. 4E tle ere ha a itokisetsa ho robala, u hlokomele hantle moo a tla robala teng, u ee teng, u koaholle maoto a hae, u bōthe moo. Eena o tla u bolella seo u tla se etsa.”
5Ruthe a re ho matsal'ae: “Ke tla etsa tsohle tseo u reng ke li etse.”
6Eaba Ruthe o theohela seotlong, 'me a etsa tsohle tseo matsal'ae a mo laetseng tsona. 7Ha Boase a se a jele a noele, 'me a thabile, a ea ithoballa pel'a setha sa harese. Ruthe a ea ho eena ka lenyele, a koaholla maoto a hae, a bōtha pel'a 'ona. 8Har'a mpa ea bosiu Boase a phōfa, a fetoha, 'me a bona mosali a bōthile maotong a hae. 9Boase a re: “U mang?”
Ruthe a araba, a re: “Ke 'na Ruthe, lekhabunyane la hao; apesa lekhabunyane la hao ka kobo ea hao, hobane rōna le uena rea tsoalana.”
10Boase a re: “Morena a ke a u hlohonolofatse, ngoan'aka, hobane seo u se entseng hona joale se setle ho feta seo u se entseng pele. Ha ua ka ua matha kamora' bahlankana, leha e le ba futsanehileng kapa ba ruileng. 11Se tšabe, ngoan'aka, ke tla u etsetsa tsohle tseo u li kōpang, hobane batho bohle ba motse oa heso baa tseba hore u mosali ea khabane. 12Ke 'nete, ke tsoalana le uena, empa ho na le e mong ea haufi le uena ka tsoalano ho mpheta. 13Robala mona bosiung bona; haeba hosasane a rata ho phetla tšoanelo ea hae ho uena, e tla ba ho lokile. Empa ha a sa rate ho etsa joalo, ka Molimo ea phelang, 'na ke tla etsa joalo. Phomola mona ho fihlela hosasane.”
14Ruthe a bōtha pel'a maoto a Boase ho fihlela hosasane. Ruthe a tsoha e sa le hoseng, ho e-s'o bonahale hantle, hobane Boase o ne a re: “Ho se be motho ea ka tsebang hore mosali o kile a tla seotlong mona.”
15Boase a re ho Ruthe: “Hlobola kobo ea hao, u e ale mona.” Ruthe a e ala, 'me Boase a tšèla harese e ka bang boima ba likilo tse mashome a mabeli. A mo roesa eona, 'me Ruthe a ea motseng.
16Ha Ruthe a fihla hae, matsal'ae a 'motsa, a re: “Ho bile joang, ngoana'aka?”
Ruthe a 'molella seo monna eo a mo etselitseng sona, 17a re: “Monna eo o mphile harese e ka etsang boima ba likilo tse mashome a mabeli, a ba a re ho 'na: ‘U se ke ua khutlela ho matsal'ao u itlhophere.’ ”
18Eaba Naomi o re: “Ak'u mamelle, ngoan'aka, u bone hore na ho tla ba joang. Boase a ke ke a phomola moeeng ho fihlela taba ena e loka hona kajeno.”
