BAROMA 9

₁Ka Kreste, ke bua 'nete, ha ke bue leshano; le letsoalo la ka le busoang ke Moea o Halalelang, lea mpakela ₂hore ka pelong ea ka ke na le masoabi a maholo le bohlōkō bo sa khaotseng. ₃Ke ne nka lakatsa hore ke be ea rōhakehileng, ea arohantsoeng le Kreste, bakeng sa baheso, bao ke leng seng le bona ka tsoalo. ₄Ke Baiseraele, ke ba entsoeng bana ba Molimo, ke ba neiloeng tlōtla, le lilekane, le Molao, le tšebeletso ea 'nete ea Molimo, le litšepiso. ₅Ke litlōhōlō tsa baholo-holo, ke bao Kreste a tsoileng ho bona ka tsoalo, eena eo e leng Molimo, ea renang holim'a tsohle, ea bokoang ka ho sa feleng. A ho be joalo!

₆Empa hase hore lentsoe la Molimo ha lea ka la atleha, hobane hase hore litlōhōlō tsohle tsa Iseraele ke Baiseraele ba sebele. ₇Hape hase hore litlōhōlō tsohle tsa Aborahama ke bana ha hae, empa ho ngotsoe, ho thoe: “Ke litlōhōlō tsa Isaka tse tla bitsoa bana ba hao.” ₈Hona ke ho bolela hore bao e leng bana ba Molimo hase ba tsoetsoeng ka mokhoa o tloaelehileng, empa ba tsoetsoeng ka ho ea ka tšepiso, ke bona ba nkoang e le litlōhōlō tsa sebele; ₉etsoe mantsoe a tšepiso a re: “Ka eona nako ena ke tla tla hape, 'me Sara o tla be a se a e-na le mora.”

₁₀Empa hase ho fela. Rebeka o ile a emola mafahla ka ntat'a rōna Isaka. ₁₁Eare bana ba e-s'o tsoaloe, ba e-s'o etse letho le letle kapa le lebe, hore morero oa Molimo, o eang kamoo a ikhethelang kateng, o tle o tiee, ₁₂e se be o tsoaloang ke liketso, e mpe e be o tsoang ho ea bitsang, ho ile ha thoe ho Rebeka: “E moholo o tla sebeletsa e monyenyane;” ₁₃joalokaha ho ngotsoe, ho thoe: “Ke ratile Jakobo ho e-na le Esau.”

₁₄Joale re tla re'ng? Na Molimo ha a na toka? Le khale! ₁₅O itse ho Moshe: “Ke tla hauhela eo ke mo hauhelang, ke utloele bohlōkō eo ke mo utloelang bohlōkō.” ₁₆Ka baka leo, hase taba ea thato kapa ea boiteko ba motho, empa ke ea mohau oa Molimo, ₁₇hobane Mangolong ho itsoe ho Faro: “Ke u entse khosi ka lebaka lona lena: hore ke bontše matla a ka ka uena, le hore lebitso la ka le tume lefatšeng lohle.” ₁₈Ka baka leo, Molimo oa hauhela, ha a rata; le teng ha a rata, oa thatafatsa.

₁₉Joale u tla re ho 'na: “Ke ka baka la'ng Molimo a sa ntseng a bona phoso ho motho? Ke mang ea ka hanyetsang thato ea hae?” ₂₀Motho tooe, u mang uena u ka arabisanang le Molimo? Na ntho e bōpiloeng e ka re ho ea e bōpileng: “Ke'ng ha u mpōpile tjee?” ₂₁Na sebōpi sa lipitsa ha se na matla holim'a letsopa, a ho etsa ka khoabi e le 'ngoe pitsa tse peli, e 'ngoe e le ea mesebetsi e khethehileng, e'ngoe e le ea mesebetsi ea kamehla?

₂₂Re ka re'ng, haeba Molimo a ne a rata ho bontša khalefo ea hae, le ho tsebahatsa matla a hae, 'me a mameletse ka boiphapanyo bo boholo libōpuoa tseo a neng a li halefetse, tse loketseng ho timela? ₂₃Hape o ne a rata ho tsebahatsa boholo ba tlōtla ea hae holim'a libōpuoa tse hauhetsoeng, tseo a li lokiselitseng tlōtla e sa le pele; ₂₄e leng rōna bao a ba bitsitseng, e seng har'a Bajuda feela, empa le har'a balichaba. ₂₅Ho joalokaha a bolela bukeng ea Hosea, a re:

₂₇Le eena Esaea o phatlalatsa tsa Iseraele, o re: “Leha palo ea bana ba Iseraele e ka ba kaalo ka lehlabathe la leoatle, ke methoaela feela e tla pholoha, ₂₈hobane Morena o tla phethahatsa kahlōlo ea hae lefatšeng ka ho tlala, le hona ka potlako.”

₂₉Ho joalokaha Esaea a boletse pele, a re:

₃₀Joale re tla re'ng? Re re balichaba ba neng ba sa labalabele ho loka ba fumane ho loka, e le ho loka ho tsoang tumelong. ₃₁Empa Baiseraele ba neng ba labalabela molao o lokafatsang ha baa ka ba o fumana. ₃₂Hobane'ng? Hobane ba ne ba shebile liketso, e seng tumelo. Ba khōpiloe ke lejoe le khōpang, ₃₃joalokaha ho ngotsoe, ho thoe: