Papiso e nkuoang lenyalong
1Bana beso, na ha le tsebe hore molao o busa motho ka nako eohle eo a ntseng a phela ka eona? Etsoe ke bua le ba tsebang molao. 2Mosali ea nyetsoeng o tlameletsoe ke molao ho monna oa hae, ha monna a ntse a phela, empa ha monna a shoele, o lokolotsoe molaong oa monna. 3Ka baka leo, ha monna oa hae a ntse a phela, o tla bitsoa mofebi ha e ka ba oa monna e mong, empa ha monna oa hae a shoele, mosali o lokolotsoe molaong, hore e se be mofebi ha e ka ba oa monna e mong.
4Ka mokhoa o joalo, bana beso, le lōna le shoele ka nqeng ea Molao oa Moshe, ka baka la ho ba 'mele oa Kreste, hore le be ba e mong: Ke ho re le be ba ea tsohileng bafung, e le hore re tle re etse mosebetsi oa Molimo. 5Ha re ne re sa ntsane re phela ka tsa botho, litakatso tsa sebe tse leotsoang ke Molao li ne li sebetsa lithong tsa rōna, hore li tle li etse mosebetsi oa lefu. 6Empa joale, kaha re shoele ka nqeng ea se neng se re tšoere, re lokolotsoe Molaong, hore re sebeletse Molimo ka moea o mocha, e seng ka Molao oa khale.
Qaka ea sebe ka ho motho
7Joale re tla re'ng? Na Molao ke sebe? Le khale! Leha ho le joalo, nkabe ke sa tsebe sebe hoja e se be ka Molao; le takatso nkabe ke sa e tsebe, ha Molao o ne o sa re: “U se ke ua lakatsa.” 8Ka taelo eo sebe se ile sa fumana monyetla oa ho hlahisa ka ho 'na litakatso tsa mefuta eohle, hobane ha molao o le sieo, sebe se shoele. 9Pele-pele, ho e-s'o be le Molao, ke ne ke ikutloa ke phela, empa ha taelo e se e le teng, sebe sa qala ho phela, 10'me 'na ka shoa. Taelo e neng e tšoanetse ho tlisa bophelo, ka fumana e ntlisetsa lefu, 11hobane ka taelo eo sebe se ile sa fumana monyetla oa ho nthetsa, 'me ka eona sa mpolaea. 12Ka hona molao oa halalela, le taelo ea halalela, e lokile, e molemo.
13Na ke ho re ntho e molemo ee e ntliselitse lefu? Le khale! Ke sebe se ntliselitseng lefu ka ntho ena e molemo, hore se tle se bonahale e le sebe. Ka taelo, sebe e tla ba sebe ka ho fetisisa.
14Rea tseba hore Molao ke oa moea, athe 'na ke oa nama, ke lekhoba la sebe. 15Ha ke tsebe seo ke se etsang, hobane seo ke ratang ho se etsa ha ke se etse, empa ke etsa seo ke se nyonyang. 16Ha ke etsa seo ke sa rateng ho se etsa, hona ke ho lumela hore molao o nepahetse. 17Joale ha e sa le 'na ea se etsang, empa se etsoa ke sebe se ahileng ka ho 'na. 18Kea tseba hore ha ho tse lokileng ka ho 'na, ke ho re ka bothong ba ka, hobane le hoja ke rata ho etsa tse ntle, empa ketso ha e tšoane le thato. 19Tse lokileng tseo ke ratang ho li etsa ha ke li etse, empa ke etsa tse mpe tseo ke sa li rateng. 20Haeba ke etsa seo ke sa se rateng, ha e sa le 'na ea se etsang, empa se etsoa ke sebe se ahileng ka ho 'na.
21Joale ke fumana ho le tjena: Ha ke rata ho etsa tse ntle, ke etsa tse mpe. 22Bothong ba ka ba moea ke thabela Molao oa Molimo, 23empa bothong ba ka ba nama ho teng molao osele, o loantšanang le molao oa kelello ea ka, o nkenyang litlamong tsa molao oa sebe o teng bothong ba ka. 24Ke motho ea sōtō hakaakang! Ke mang ea tla ntōkōlla boemong boo bo nkisang lefung? 25A ho lebohuoe Molimo ea re lōkōlōtseng ka Jesu Kreste, Morena oa rōna!
'Na, ka bonna, ke sebeletsa Molao oa Molimo ka kelello feela, empa ka botho ke sebeletsa molao oa sebe.
