1Ha ho le joalo, Mojuda o feta molichaba ka eng? Ka tse ngata. Kapa molemo oa lebōllo ke ofe? 2E mengata. Haholo-holo ke hobane Bajuda ba tšepetsoe ho bōlōka lipolelo tsa Molimo.
3Joale haeba ba bang ba sa ka ba tšepahala, na ho se tšepahale hoo ha bona ho ka felisa ho tšepahala ha Molimo? 4Le khale! Batho bohle ba leshano, athe Molimo o na le 'nete, joalokaha ho ngotsoe, ka eena ho thoe:
“U tla fumanoa u lokile
lipolelong tsa hao,
u tla hlōla nyeoe ha u qōsoa.”
5Empa ha ho se loke ha rōna ho tōtōbatsa ho loka ha Molimo, re tla re'ng? Na Molimo ha a na toka ha a re otla? Ke bua ka mokhoa oa batho. 6Le khale! Ho seng joalo, Molimo a ka ahlōla lefatše joang? 7Empa haeba ka leshano la ka, 'nete ea Molimo e bonahala ho feta, 'me hona ho mo tlotlisa, ke ka baka la'ng ha ke ntse ke ahlōloa joaloka moetsalibe? 8Na ha ho molemo hore re etse bobe, e le hore tse molemo li tle li hlahe, joalokaha ba bang ba re etseletsa, ka ho re re rialo? Bona ba lokeloa ke kahlōlo.
Ha ho ea lokileng
9Joale? Na re feta ba bang? Le hanyenyane! Re se re bontšitse hore Bajuda le balichaba, bohle ba matleng a sebe, 10joalokaha ho ngotsoe, ho thoe:
“Ha ho le ea mong ea lokileng,
11ha ho ea utloisisang,
ha ho ea batlang Molimo;
12bohle ba khelohile,
kaofela ha ba na thuso;
ha ho ea etsang ho lokileng,
leha a le mong.
13'Metso ea bona ke lebitla
le ahlamileng,
ba bolela leshano
ka maleme a bona,
mahlōkō a marabe
a tsoa melomong ea bona,
14lehano la bona le tletse mahlapa
le tse babang;
15maoto a bona a bobebe
ha ba ea tšolla mali,
16tšenyeho le bōsōto
li mehlaleng ea bona,
17'me tsela e isang khotsong,
ha ba e tsebe.
18Ho tšaba Molimo,
ha ho eo ho bona.”
19Joale re tseba hore tsohle tseo Molao oa Moshe o li bolelang, o li bolella ba leng tlas'a Molao oo, hore ho se be ea ka itatōlang, 'me lefatše lohle le tle le be tlas'a kahlōlo ea Molimo. 20Ka baka leo, ha ho motho ea ka lokafatsoang pel'a Molimo ka ho phetha Molao, hobane ke ka Molao re nang le tsebo e tletseng ea sebe.
Molimo o lokafatsa ea lumelang
21Empa joale ho lokafatsoa ke Molimo ho bonahalitsoe e le ho sa itšetleheng ka Molao; hona ho pakoa ke Molao le Baporofeta. 22Ke ka ho lumela ho Jesu Kreste, Molimo a lokafatsang bohle ba lumelang, ho se khethollo. 23Bohle ke baetsalibe, ba ikamohile tlōtla ea Molimo. 24Empa ba lokafatsoa feela ka mohau oa hae, ka ho lopolloa ke Kreste Jesu. 25Ke eena eo Molimo a mo khethileng hore ka mali a hae a tšolohileng, libe tsa batho li lefelloe, ha ba e-na le tumelo. Molimo o bontšitse ho loka ha hae ka ho iphapanyetsa libe tsa mehla e fetileng, 26nakong ea mamello ea hae. Le nakong ea joale o sa bontša ho loka ha hae; o bontša hore eena o lokile, 'me o lokafatsa ea lumelang ho Jesu.
27Ha ho le joalo, ho ka ithorisetsoa'ng? Le letho! Ka eng? Na ke ka liketso? Che, ke ka tumelo. 28Re lumela hore motho o lokafatsoa ka tumelo, e seng ka ho phetha Molao. 29Kapa Molimo ke oa Bajuda feela? Na hase le oa balichaba? E, balichaba le bona ke oa bona, 30kaha Molimo o mong feela ea tla lokafatsa Bajuda ka tumelo, le balichaba ka tumelo. 31Ha ho le joalo, na ka tumelo ee re etsolla Molao? Le khale, re mpa re tiisa Molao oo.
