BAROMA 11

₁Joale kea botsa: Na Molimo o lahlile sechaba sa hae na? Le khale! Le 'na ke Moiseraele, ke setlōhōlō sa Aborahama, ke oa lelōko la Benjamine. ₂Molimo ha aa lahla sechaba sa hae seo a se tsebileng e sa le pele. Kapa na ha le tsebe seo Mangolo a se bolelang ka Elia, ha a ne a lla ho Molimo ka Baiseraele, a re: ₃“Morena, ba bolaile baporofeta ba hao, ba lihile lialetare tsa hao; ke setse ke le mong, 'me ba batla ho mpolaea.” ₄Empa Molimo o mo arabile joang? O re: “Ke ipōlōketse banna ba kete tse supileng, ba sa kang ba khumamela Baale.” ₅Le nakong ea joale ho ntse ho le joalo: methoaela e setseng e teng e ileng ea khethoa ka mohau oa Molimo. ₆Empa haeba e le ka mohau, ha e sa le ka baka la liketso; ho seng joalo, mohau ha e sa le mohau.

₇Joale? Seo Baiseraele ba neng ba se batla, ha baa ka ba se fumana, empa bakhethoa ba se fumane. Ha e le ba bang ba thotofalitsoe, ₈joalokaha ho ngotsoe, ho thoe:

₁₁Joale kea botsa: Na Baiseraele ba ile ba khōptjoa hore ba oele ruri? Le khale! Empa ka baka la tšito ea bona, ho pholosoa balichaba, e le hore Baiseraele ba tle ba be lefufa. ₁₂Ha e le mona tšito ea bona e ruisitse lefatše, 'me bokoenehi ba bona bo ruisitse balichaba, tšokoloho ea bona bohle e tla ruisa lefatše hakaakang!

₁₃Joale ke bua le lōna, balichaba. Kaha ke le moapostola oa balichaba, ke motlōtlō ka mosebetsi oa ka, ₁₄'me mohlomong nka etsa hore sechaba sa heso se be lefufa, ke tle ke pholose ba bang ba sona. ₁₅Haesita ho furalloa ha sona ho tlisitse poelano ea lefatše le Molimo, ho amoheloa ha sona ho tla tlisa eng, haese bophelo ho ba shoeleng? ₁₆Ha senkhoa sa pele se nyehelloa Molimo, linkhoa tsohle tsabo sona lia halalela, 'me ha motso oa sefate o halalela, le makala a sona aa halalela.

₁₇Haeba makala a mang a sefate sa mohloaare oa hae a khaotsoe, 'me uena, u leng mohloaare oa naha, u hlomathiselitsoe ho sona, 'me ua ba le kabelo lerong le tsoang motsong oa sona, ₁₈u se ke ua ikhōhōmōsetsa makala a khaotsoeng. U ka ikhōhōmōsa ka'ng, e se uena ea fepang motso, e le motso o u fepang? ₁₉Empa u tla re: “Makala a khaotsoe hore 'na ke hlōmathisetsoe sefateng.” ₂₀E, ho joalo. A khaotsoe ka baka la ho se lumele, athe uena u hlōmathetse ka baka la tumelo. U se ke ua ikakasa, u mpe u tšabe, ₂₁hobane ha Molimo a sa ka a qenehela makala ao a sefate, a tlhaho, le uena a ke ke a u qenehela.

₂₂Ha ho le joalo, bona mosa le bohale ba Molimo. O halefetse ba oeleng, empa o mosa ho uena, haeba u itšoareletse ka mosa oo; ho seng joalo le uena u tla rengoa. ₂₃Le bona, ha ba ka khaotsa ho se lumele, ba tla hlōmathisoa, hobane Molimo o na le matla a ho boela a ba hlōmathisa. ₂₄Ha e le mona uena, eo ka tlhaho u leng lekala la mohloaare oa naha, u remiloe, 'me u hlōmathiselitsoe mohloaareng oa hae, ka mokhoa oo e seng oa tlhaho, ho tla ba bonolo hakaakang, ho bao ka tlhaho e leng makala a mohloaare oa hae, hore ba boele ba hlōmathisoe mohloaareng oa bona!

₂₅Bana beso, ho na le sephiri seo ke sa rateng hore le hloke tsebo ea sona, esere la ipona le le bohlale: e leng hore karolo e itseng ea sechaba sa Iseraele e tla thatafala ho fihlela ha ho kene palo e lekaneng ea balichaba. ₂₆Ka mokhoa ona sechaba sa Iseraele kaofela se tla pholosoa, joalokaha ho ngotsoe, ho thoe:

₂₈Bona ba fetohile lira tsa Molimo, hore lōna le tle le amohele molaetsa o molemo. Kaha ba khethiloe ke Molimo, ke baratuoa ba hae, ka baka la baholo-holo, ₂₉hobane Molimo ha a koenehele bao a ba sitsitseng, le bao a ba bitsitseng. ₃₀Pele le ne le sa mamele Molimo, empa kajeno le hauhetsoe ka baka la ho se mamele ha sechaba sa Iseraele. ₃₁Ka mokhoa o joalo, le sona kajeno ha se mamele, e le hore, ka baka la ho hauheloa ha lōna, le sona se tle se hauheloe. ₃₂Molimo o tloheletse bohle ho ipea litlamong tsa ho se mamele, e le hore a tsebe ho hauhela bohle.