BAROMA 1

₁'Na Paulosi, mohlanka oa Kreste Jesu, ke bitselitsoe ho ba moapostola. Ke khethetsoe ho bolela molaetsa o molemo oa Molimo, ₂oo a neng a o tšepise batho e sa le pele, ka baporofeta ba hae, Mangolong a halalelang. ₃Molaetsa oo o bua ka Mora oa Molimo, eo ho ea ka nama, a tsoetsoeng lelōkong la Davida; ₄athe ho ea ka Moea oa khalalelo ho ile ha boleloa, ka tsoho ea hae bafung, hore ke Mora ea matla oa Molimo, Jesu Kreste, Morena oa rōna. ₅Ke ka eena re amohetseng neo ea boapostola, e le hore re ise lichaba tsohle mamelong e tsoang tumelong, ka baka la hae. ₆Le lōna, le le ba bitsitsoeng ke Jesu Kreste, le balelloa har'a tsona.

₇Ke lumelisa ba leng Roma, bao Molimo a ba ratang, ba bitselitsoeng ho ba bahalaleli, ke re: Mohau le khotso ea Molimo Ntat'a rōna le ea Morena Jesu Kreste li ke li be le lōna.

₈Ke qala ka ho leboha Molimo oa ka, ka Jesu Kreste, ba baka la lōna bohle, hobane tumelo ea lōna e boleloa lefatšeng lohle. ₉Molimo eo ke mo sebeletsang ka moea oa ka oohle, ka ho phatlalatsa molaetsa o molemo oa Mora oa hae, ke paki ea ka, ea kamoo ke sa phetseng kateng ho le rapella. ₁₀Kamehla, lithapelong tsa ka, ke ntse ke kōpa hore qetellong ke mpe ke fumane monyetla oa ho tla ho lōna, ha e le thato ea Molimo.

₁₁Ke hlōlōhetsoe ho le bona, hore ke le abele neo e 'ngoe ea Moea, le tle le matlafatsoe. ₁₂Hona ke ho re, ha ke le ho lōna, re khothatsane ka tumelo ea rōna bohle, 'na ka tumelo ea lōna, le lōna ka ea ka. ₁₃Bana beso, ke rata ha le tseba hore ke rerile ka makhetlo ho le etela, empa ho fihlela joale ke sa hlōtsoe. Ke ne ke rata hore le har'a lōna ke tle ke fumane litholoana tsa mosebetsi oa ka, joaloka lichabeng tse ling.

₁₄Ke na le boikarabelo ho Bagerike le ho bao e seng bona, ho ba rutehileng le ho ba sa rutehang; ₁₅ke ka hona ke nang le cheseho ea ho bolella le lōna ba leng Roma molaetsa o molemo.

₁₆Ha ke hlajoe ke lihlong ho bolela molaetsa o molemo, hobane oona ke matla a Molimo, a pholosang mang le mang ea lumelang, Mojuda pele, le eena molichaba. ₁₇Molaetsa ona o senola kamoo Molimo a lokafatsang batho kateng; feela ho hlokahala tumelo ho tloha qalong ho isa qetellong, joalokaha ho ngotsoe, ho thoe: “Ea lokileng o tla phela ka tumelo.”

₁₈Khalefo ea Molimo e senotsoe e e-tsoa leholimong, e theohela holim'a bohle ba sa hlompheng Molimo, ba sa lokang, ba thibelang 'nete ka ho se loke ha bona, ₁₉hobane se ka tsejoang ka Molimo ba se bona hantle. Molimo o ba bontšitse sona. ₂₀Ho tloha tlholehong ea lefatše, tse sa bonoeng tsa hae, ke ho re matla a hae a sa feleng le bomolimo ba hae, haesale li bonoa hantle, 'me li utloisisoa ka tse entsoeng ke eena. Kahoo ba hloka boitatōlo, ₂₁hobane leha ba tsebile Molimo, ha baa ka ba mo tlotlisa le ho mo leboha joaloka Molimo. Menahano ea bona ea leba nthong tse se nang thuso, 'me pelo tsa bona tse hlokang kutloisiso tsa fifala. ₂₂Leha ba ne ba re ba bohlale, ba thotofala; ₂₃tlōtla ea Molimo ea sa shoeng, ba e fetola setšoantšo sa motho ea shoang, kapa sa linonyana, kapa sa liphoofolo, kapa sa lihahabi.

₂₄Ka baka leo, Molimo o ba tloheletse ho phetha litakatso tsa lipelo tsa bona, le ho etsa tse litšila, tse hlomphollang 'mele ea bona. ₂₅Bona ba fetotse 'nete ea Molimo leshano, ba khumamela sebōpuoa, ba se sebeletsa ho e-na le 'Mōpi ea bokoang kamehla eohle! A ho be joalo!

₂₆Ka baka leo, Molimo o ba tloheletse ho phetha litakatso tse matla, tse hlabisang lihlong. Le basali ba bona ba sebelisa bosali ba bona ka mokhoa o hananang le tlholeho. ₂₇Ka mokhoa o joalo, le banna ba tlohetse ho kopanela likobo le basali ka mokhoa o lumellanang le tlholeho, empa ba lakatsana ka bobona; ba etsa tse hlabisang lihlong le banna ba bang, 'me ba fumana kotlo e tšoanelang ho kheloha hoo ha bona.

₂₈Kaha ba ne ba sa bone ho hlokeha hore ba amohele Molimo eo ba mo tsebileng, Molimo o ba tloheletse ba ntse ba tšerehane likelello, e le hore ba etse tse sa tšoanelehang. ₂₉Ba tletse ho se loke hohle, bokhopo, meharo, bobe; ba tletse mōna, polao, liphapang, mano, mekhoa e mebe; ke basebi, ₃₀baetseletsi, ba hloileng Molimo, baikakasi, baikhōhōmōsi, baithorisi, baqapi ba tse mpe, ba sa utloeng batsoali, ₃₁ba hlokang kutloisiso, botšepehi, lerato le mohau. ₃₂Leha ba tseba hantle taelo ea Molimo e reng ba etsang tse joalo ba lokeloa ke lefu, ha ba li etse e le bona feela, empa ba bile ba thōhōletsa le ba bang ba li etsang.