TŠENOLO 20

₁Joale ka bona lengeloi le theoha leholimong, letsohong le tšoere senotlolo sa mohohlo o se nang pheletso, le ketane ea tonana. ₂La tšoara khanyapa, nōha ea khale, e leng Diabolosi le Satane, la e hōleha ka lilemo tse sekete. ₃La e akhela mohohlong o se nang pheletso, la e notlella teng, la bitiela monyako oa mohohlo, hore e se hlole e khelosa lichaba ho fihlela lilemo tse sekete li fetile. Kamorao ho moo eka khona e lokolloe nako e khutšoanyane.

₄Eaba ke bona literone le ba lutseng holim'a tsona, ba neiloeng matla a ho ahlōla. Ka bona le ba khaotsoeng lihlooho ka baka la bopaki ba Jesu, le ka baka la Lentsoe la Molimo, le ba sa kang ba khumamela sebatana le setšoantšo sa sona, ba sa kang ba fumanoa ba e-na le letšoao la sona liphatleng le matsohong a bona. Ba boela ba phela, 'me ba busa le Kreste ka lilemo tse sekete. ₅Bafu ba setseng ha baa ka ba tsoha ho fihlela lilemo tse sekete li fetile. Ena ke tsoho ea pele ea bafu. ₆Ho lehlohonolo, 'me ho halalela ba nang le kabelo tsohong ea pele ea bafu. Lefu la bobeli ha le sa na matla holim'a bona, empa e tla ba baprista ba Molimo le ba Kreste, 'me ba tla busa le eena ka lilemo tse sekete.

₇Ha lilemo tse sekete li fetile, Satane o tla lokolloa chankaneng ea hae, ₈'me o tla ea ho khelosa Gogo le Magogo, e leng lichaba tse liqoleng tse 'ne tsa lefatše. O tla li phutha hore li loane, palo ea tsona e le kaalo ka lehlabathe la leoatle. ₉Tsa tlala lefatše ka bophara ba lona, 'me tsa likanela liahelo tsa balumeli le motse o ratoang, empa mollo oa theoha leholimong, oa li felisa. ₁₀Diabolosi, ea li khelositseng, a akheloa letšeng la mollo le sebabole, moo sebatana le moporofeta oa bohata ba leng teng. Ba tla hlōkōfatsoa motšeare le bosiu, kamehla le mehla.

₁₁Joale ka bona terone e kholo, e tšoeu, le ea lutseng holim'a eona. Lefatše le leholimo tsa baleha pel'a sefahleho sa hae, tsa nyamella ruri. ₁₂Eaba ke bona bafu, ba baholo le ba banyenyane, ba eme kapele ho terone. Ha phetloa libuka, ha nt'o phetloa buka e 'ngoe hape, e leng buka ea bophelo, 'me bafu ba ahlōloa ho ea ka mesebetsi ea bona, e ngotsoeng bukeng eo. ₁₃Leoatle la hlatsa bafu ba lona, Lefu le Qalo ea Bafu tsa ntša bafu ba tsona, 'me e mong le e mong a ahlōloa ho ea ka mesebetsi ea hae. ₁₄Joale Lefu le Qalo ea Bafu tsa akheloa letšeng la mollo. Letša lena la mollo ke lona lefu la bobeli. ₁₅Mang le mang eo lebitso la hae le sa fumanoang bukeng ea bophelo, a akheloa letšeng la mollo.