LIPESALEMA 99

₁Morena ke khosi,

lichaba lia thōthōmela;

o lutse holim'a likerubime,

lefatše lea reketla.

₂Morena o moholo, Sione,

o okametse lichaba tsohle.

₃Ho bokoe lebitso la hao le leholo,

lea tšabeha, lea halalela.

₄U khosi e matla, e ratang toka;

ke uena ea theileng ho loka,

ua tlisetsa lelōko la Jakobo

toka le ho loka.

₅Phafang Morena, Molimo oa rōna,

le itihele bonamelong

ba maoto a hae:

Oa halalela.

₆Moshe le Arone e ne e le

ba bang ba baprista ba hae,

Samuele e le e mong

oa ba rapelang lebitso la hae.

Ba ipiletsa ho Morena,

'me a ba araba,

₇a bua le bona a le har'a leru;

ba bōlōka litemoso tsa hae,

le litaelo tseo a ba fileng tsona.

₈Morena Molimo oa rōna,

u 'nile ua ba araba,

ua ba Molimo ea ba tšoarelang,

ea mpang a ba otla

ka baka la bokhopo ba bona.

₉Phafang Morena Molimo oa rōna,

le mo khumamele thabeng,

thabeng ea hae e halalelang;

hobane Morena Molimo oa rōna,

oa halalela.