LIPESALEMA 8

₂Morena, mong'a rōna,

lebitso la hao le tlōtleha hakaakang,

le tlōtleha lefatšeng lohle!

Khanya ea hao,

e kaholimo ho maholimo,

₃e boleloa ka melomo ea bana

le ea masea.

U hahile qhobosheane

ho thibela lira tsa hao,

oa e haha

ho sitisa sera le moiphetetsi.

₄Ha ke boha maholimo a hao,

mosebetsi oa liatla tsa hao,

ke boha khoeli le linaleli

tseo u li beileng malulong a tsona,

₅ebe motho e ne e le eng,

hoo u ka mo hopolang?

Ngoan'a motho e ne e le eng,

hoo u ka mo hlokomelang?

₆U mo entse

ea katlasana ho mangeloi,

ua mo roesa mofapahlooho,

mofapahlooho oa tlōtla,

ua mo roesa mofapahlooho oa hlompho.

₇U mo neile puso

holim'a mesebetsi ea liatla tsa hao,

ua bea tsohle katlas'a maoto a hae:

₈manku le makhomo 'ohle,

le tsona liphoofolo tsa naha;

₉nonyana tse sepakapakeng,

le litlhapi ka leoatleng,

le tsohle tse tsamaeang ka leoatleng.

₁₀Morena, mong'a rōna,

lebitso la hao lea tlōtleha,

le tlōtleha hakaakang

lefatšeng lohle!