LIPESALEMA 68

₂Molimo a ke a tsohe,

lira tsa hae li qhalane,

ba mo hloileng ba 'malehe.

₃Ba nyamele

joalokaha mosi o nyamela,

joalokaha tšōtso

e qhibilihisoa ke mollo,

ba khopo ba timela joalo,

ba timela joalo mahlong a Molimo.

₄Empa ba lokileng baa thaba,

ba nyakallela Molimo,

ba tlale thabo.

₅Binelang Molimo,

rokang lebitso la hae,

lokisang tsela ea ea kaletseng maru.

Lebitso la hae ke Morena,

nyakallang mahlong a hae.

₆Molimo ke ntat'a likhutsana,

ke mosireletsi oa bahlolohali,

o leahong la hae le halalelang.

₇Ba se nang moneketsela,

Molimo o ba fa bolulo,

o boela o busetsa

batšoaruoa boiketlong,

athe bahanyetsi

ba sala mahalaopeng.

₈Molimo, mohla u neng u haola

har'a lehoatata,

u eteletse chaba sa hao pele,

₉lefatše la na la reketla,

maholimo a nesa pula

mahlong a Molimo,

Molimo oa Sinai,

Molimo oa Iseraele.

₁₀Molimo, ua nesa pula,

ea litloèbèlèlè;

ua e nesetsa bao e leng lefa la hao,

ua ba matlafatsa

ha ba ne ba khathetse;

₁₁mohlape oa hao

oa fumana bolulo teng,

boo ka mohau oa hao

u bo lokisitseng,

ua bo lokisetsa bahlōphehi.

₁₂Morena a ntša taelo,

letšoele la basali

la tlisa molaetsa o reng:

₁₃“Likhosi le mabōtho a tsona

li balehile, li balehetse ruri!”

Basali ba setseng hae

ba arola tse hapiloeng.

₁₄Ha lōna le ne le paqame,

le paqame marakong a masaka,

bona ba ne ba ka maebana

a apesitsoe ka silefera,

ao masiba a 'ona a phatsimang,

a phatsimang sa khauta e tšehla,

₁₅ha Ea Matla 'ohle

a ne a qhalanya likhosi,

lehloa la khetheha

thabeng ea Salemone.

₁₆Thaba ea Bashane

ke thaba e telele,

thaba ea Bashane

ke thaba e makheka.

₁₇Lōna lithaba tse makheka,

ke'ng ha le hōnōhela thaba,

thaba eo Molimo

a khahliloeng ke eona,

ho e etsa leaho la hae,

moo Morena a tla aha teng,

a hae teng ka ho sa feleng?

₁₈Kariki tsa Molimo tsa ntoa

ke kete tsa likete,

ka tsona Morena

o tlile Sehalalelong,

o tlile Sehalalelong sa hae,

a e-tsoa Sinai.

₁₉O nyolohetse holimo

a nkile bathōpuoa,

a nyehelloa ka batho,

esita le ka bahanyetsi.

Morena Molimo a ba le leaho.

₂₀Ho bokoe Morena

ka matsatsi 'ohle,

eena ea re pepang,

eena Molimo, mopholosi oa rōna.

₂₁Molimo oa rōna

ke Molimo ea pholosang;

Morena ke Morena oa rōna,

Morena ea re phemisang lefu.

₂₂Molimo o tla pshatla lihlooho,

a pshatle hlooho tsa lira tsa hae,

mahata a lihlōthō a ba khopo.

₂₃Morena o itse:

“Ke tla ba lata Bashane,

ke ba late le botebong ba leoatle,

₂₄leoto la hao

le tla hata maling a bona,

lintja tsa hao

li itjelle nama tsa lira.”

₂₅Bohle ba bona

mekoloko ea hao, Molimo,

mekoloko ea Molimo oa ka,

khosi ea ka,

mekoloko e kenang Sehalalelong.

₂₆Kapele ke libini,

kamorao ke baletsi,

hare ke thoetsana

e tilinyang meropa.

₂₇Bokang Molimo liphuthehong,

bokang Morena

libōkeng tsa Iseraele.

₂₈Benjamine, khorula,

o ba eteletse pele,

o latetsoe ke sehlopha sa mahosana,

mahosana a Juda,

le mahosana a Sebulone,

le mahosana a Nafthali.

₂₉Oho, Molimo, bontša matla a hao,

ao u re sebelelitseng ka 'ona.

₃₀Ka baka la Tempele ea hao,

Tempele e Jerusalema,

likhosi li tla u nyehella ka limpho.

₃₁Khalema sebatana se moferong,

batho ba kang mohlape oa lipoho,

le manamane a oona,

ba ke ba ineele, ba u tlisetse silefera;

qhalanya lichaba tse ratang ntoa.

₃₂Mahosana a tla tsoa Egepeta,

Kushe e phahamise matsoho,

e a phahamisetse ho Molimo.

₃₃Binelang Molimo,

lōna mebuso ea lefatše,

le roke Morena.

₃₄Ke eena ea kaletseng maholimo,

maholimo a khale-khale;

o utloahatsa lentsoe la hae,

lentsoe la hae le matla.

₃₅Thōhōletsang matla a Molimo;

ke eena ea renang holim'a Iseraele,

matla a hae a marung.

₃₆Molimo oa tšabeha

Sehalalelong sa hae.

Ke Molimo oa Iseraele,

ea matlafatsang

sechaba sa hae haholo.

Ho bokoe Molimo!