Bokhopo ba batho
1Pesalema ea Davida. Thothokiso e nang le thuto. Taelo ho motsamaisi oa libini: E binoe ka makolilo.
2Ka pelong sethoto se re:
“Ha ho na Molimo.”
Liketso tsa batho li bolile,
lia nyonyeha,
ha ho le ea mong ea etsang tse ntle.
3Molimo, a le maholimong,
o talima bana ba batho,
ho bona hore
na ho teng ea utloisisang,
ea batlang Molimo.
4Bohle ba khelohile,
ba senyehile kaofela;
ha ho ea etsang tse ntle,
ha ho le ea mong.
5Na baa bohle ha ba na tsebo,
baa ba etsang tse sa lokang,
baa ba itjellang sechaba sa ka,
joalokaha ba e-ja bohobe,
ba sa ipiletse ho Molimo?
6Joale ba tla tšoha haholo,
ba tšohe kantle ho lebaka,
hobane Molimo
o tla qhalanya masapo,
masapo a ba neng ba u thibeletse.
U tla ba hlabisa lihlong,
mohla Molimo a ba lahlang.
7E se eka pholoho ea Iseraele
e ka tsoa Sione!
Mohla Molimo a khutlisang
sechaba sa hae,
a se khutlisa bothōpuoeng,
Jakobo o tla nyakalla,
Iseraele le eena a thabe.
